‘Rọ Eme Orọwọ na Kuọ Oma’

¹ Ele uzuazọ omarọkẹ Ọghẹnẹ o gwọlọ omodawọ ogaga. (1 Tim. 4:7-10) Ma tẹ be gwọlọ lele edhere otiọye evaọ ẹgba obọ mai, oma o rẹ sae lọhọ omai yọ ma rẹ sai zoruẹ. (Aiz. 40:29-31) Edhere jọ nọ ma sai ro wo ẹgba no obọ Jihova ze họ ẹkwoma ‘eme orọwọ na nọ ma rẹ rọ kuọ oma’ mai.— 1 Tim. 4:6.

² Emamọ Emu Abọ-Ẹzi: Jihova ọ be rọ ẹkwoma Ẹme riẹ gbe ‘ọrigbo nọ o wo ẹrọwọ avọ areghẹ na’ k’omai emamọ emu abọ-ẹzi. (Mat. 24:45) Kọ ma bi ru ẹkẹ abọ mai re ma wo erere noi ze? Kọ ma bi se Ebaibol na kẹdẹ kẹdẹ? Kọ ma fi oke họ kẹ uwuhrẹ omobọ-ohwo gbe eroro? (Ol. 1:2, 3) Obọdẹ emu abọ-ẹzi otiọye ọ rẹ k’omai ẹgba jẹ thọ omai no okpomahọ elọhoma akpọ Setan. (1 Jọn 5:19) Ma tẹ rọ eware abọ-ẹzi vọ iroro mai je fi ai họ iruo evaọ uzuazọ mai, Jihova ọ te jọ kugbe omai.—Fil. 4:8, 9.

³ Jihova ọ be rehọ ẹkwoma iwuhrẹ ukoko na bọ omai ga re. (Hib. 10:24, 25) Ithubro abọ-ẹzi gbe uvi omakugbe nọ ma re wo evaọ iwuhrẹ nana e rẹ k’omai ẹgba nọ ma re ro dikihẹ whawha nọ ma tẹ rẹriẹ ovao dhe edawọ. (1 Pita 5:9, 10) Uzoge Oleleikristi jọ ọ ta nọ: “Me re kpohọ isukulu kẹdẹ kẹdẹ, yọ isukulu na e rẹ lẹliẹ udu whrehe omẹ. Rekọ iwuhrẹ na e wọhọ ẹtẹre-ame evaọ otọ oyaya, nọ e rẹ k’omẹ ẹgba nọ mẹ sai ro thihakọ ẹdẹ isukulu notha.” Ma bi gine wo erere no oma nọ ma be dawo re ma kpohọ iwuhrẹ ze!

⁴ Ewhowho Uzẹme Na: Usiuwoma nọ ọ rẹ ta kẹ amọfa o jọ wọhọ emu kẹ Jesu. O kẹ riẹ ẹgba. (Jọn 4:32-34) Epọvo na re, nọ ma tẹ be vuẹ amọfa kpahe eyaa urirẹ nọ Ọghẹnẹ ọ yaa na, o rẹ wha omosasọ se omai. Odibọgba na nọ ma rẹ jọ wobọ ẹsikpobi o rẹ lẹliẹ udu gbe iroro mai tọ vi Uvie na gbe eghale nọ e be tha kẹle na. Oyena o rẹ ginẹ sasa omai oma.—Mat. 11:28-30.

⁵ Ẹvẹ o rrọ uvẹ-ọghọ k’omai te re ma wo erere no obọdẹ emu abọ-ẹzi nọ ọ rẹ kẹ ẹgba nọ Jihova ọ be kẹ ahwo riẹ nẹnẹ ze! Joma ruabọhọ ewhowho via ujiro riẹ avọ oghọghọ.—Aiz. 65:13, 14.

Abọ Avọ 5: Eru Ebe-Iwuhrẹ Ebaibol nọ E rẹ Nyaharo

Iroro-Ejẹ Epanọ Oria nọ A re Wuhrẹ U re Theri Te

¹ Nọ Jesu o je wuhrẹ, o wo epanọ ẹgba ilele riẹ o te họ iroro, ọ t’ẹme kẹ ai epaọ “utho nọ a sai yo.” (Mak 4:33; Jọn 16:12) Evaọ edhere ọvona, u fo nọ ahwo nọ a bi wuhrẹ amọfa Ẹme Ọghẹnẹ nẹnẹ a rẹ jiroro epanọ oria nọ a re wuhrẹ evaọ obe-uwuhrẹ Ebaibol u re theri te. Epanọ oria nọ a bi wuhrẹ u re theri te o roma wha ẹgba gbe iyero owuhrẹ na gbe ọmọ-uwuhrẹ na.

² Bọ Ẹrọwọ Ọgaga: Oware nọ emọ-uwuhrẹ jọ e rẹ sai wo otoriẹ riẹ evaọ uwuhrẹ ẹsiẹvo o rẹ sae rehọ emọ-uwuhrẹ efa isiava hayo isiasa re a te wo otoriẹ riẹ. O roja re ma fiobọhọ kẹ ọmọ-uwuhrẹ na wo otoriẹ oware nọ o bi wuhrẹ na ziezi viukpenọ ma re wuhrẹ eware buobu ẹsiẹvo. Ọmọ-uwuhrẹ kpobi ọ gwọlọ emamọ otọhotọ kẹ ẹrọwọ ọkpokpọ nọ ọ jọ Ẹme Ọghẹnẹ duku na.—Itẹ 4:7; Rom 12:2.

³ Nọ who bi ru uwuhrẹ na koka koka na, raha oke nọ o gwọlọ kpobi re who fiobọhọ kẹ ọmọ-uwuhrẹ na wo otoriẹ jẹ rọwo oware nọ o bi wuhrẹ no Ẹme Ọghẹnẹ ze na. Whaha ovẹrẹ nọ who re ro ru uwuhrẹ na nọ ọmọ-uwuhrẹ na o gbe wo erere vọvọ no uwuhrẹ na ze he. Rehọ oke ru igogo-eme vẹ je se ugogo ikereakere nọ i dhesẹ otọhotọ oware nọ wha bi wuhrẹ na via.—2 Tim. 3:16, 17.

⁴ Tọ Ẹro vi Uwuhrẹ Na: Nọ ma be gwọlọ whaha ugidi nọ ma re ro ru uwuhrẹ na, ma gwọlọ whaha eware nọ e rẹ lẹliẹ omai reghe re. Otẹrọnọ ọmọ-uwuhrẹ ọ gwọlọ rehọ oke thethei ro gbiku oma riẹ, o sae gwọlọ nọ ma ru ọruẹrẹfihotọ nọ ma rẹ rọ ta eme yena nọ ma te ku uwuhrẹ na họ no.—Ọtausi. 3:1.

⁵ Evaọ abọdekọ riẹ, ajọwha mai kẹ uzẹme na o rẹ sai ru nọ ma jẹ gwọlọ ta eme buobu evaọ etoke uwuhrẹ na. (Ol. 145:6, 7) Ẹmẹme jọ nọ ọ nwani kpomahọ ewuhrẹ na dẹẹ hẹ nọ ma sai ro ru ẹme vẹ hayo oware jọ nọ o via nọ ma rẹ ta kpahe o rẹ sai fiobọhọ evaọ uwuhrẹ. Rekọ ma gwọlọ nọ e rẹ nwani bu hrọ hayo theri te epanọ e rẹ rọ whaha ọmọ-uwuhrẹ ewo eriariẹ egbagba orọ ugogo iwuhrẹ Ebaibol na ha.

⁶ Ẹkwoma umutho oria nọ ma re wuhrẹ evaọ ẹkeriotọ ọvo, ma re fiobọhọ kẹ ọmọ-uwuhrẹ Ebaibol re ọ “nya evaọ elo Ọnowo na.”—Aiz. 2:5.