Abọ Avọ 6: Eru Ebe-Iwuhrẹ Ebaibol nọ E rẹ Nyaharo

Nọ Ọmọ-Uwuhrẹ Ọ tẹ Nọ Onọ

¹ Nọ a tẹ to obe-uwuhrẹ Ebaibol họ ziezi no, o rẹ mai woma re a ta kpahe iwuhrẹ Ebaibol na unọjọ utọjọ, orọnikọ a rẹ la no uzoẹme ruọ uzoẹme he. Onana u re fiobọhọ kẹ ọmọ-uwuhrẹ na wo otọhotọ eriariẹ egbagba je wo ẹnyaharo abọ-ẹzi. (Kọl. 1:9, 10) Dede na, ẹsibuobu emọ-uwuhrẹ e rẹ nọ enọ kpahe izoẹme sa-sa evaọ etoke uwuhrẹ na. Ẹvẹ a rẹ rọ kẹ iyo enọ nana?

² Dhesẹ Orimuo: A rẹ sae kẹ iyo enọ nọ i kpomahọ uwuhrẹ na ẹsiẹsiẹe. Otẹrọnọ wha te jọ obe nọ wha bi wuhrẹ na tẹme kpahe onọ jọ eva obaro, u re woma re whọ ta oyena via. Dede na, otẹrọnọ onọ na u gbe kie kpahe uwuhrẹ na ha hayo o te gwọlọ re who ru ekiakiẹ re whọ sae kẹ uyo na ziezi, o rẹ sai woma re wha t’ẹme kpahe iẹe nọ uwuhrẹ na o tẹ fa no hayo oke ofa. Iwhowho-uvie jọ i muẹrohọ nnọ onọ na nọ a re kere fihọ otọ o rẹ kẹ ọmọ-uwuhrẹ na imuẹro inọ a se onọ riẹ na gboja ziezi, u ve je fiobọhọ whaha eware efa nọ i re reghe uwuhrẹ na.

³ Evaọ igogo ebe mai jọ nọ a re wuhrẹ, ẹme kpẹkpẹe ọvo a ta kpahe iwuhrẹ Ebaibol buobu. Kọ ẹvẹ o rẹ jọ otẹrọnọ ọmọ-uwuhrẹ jọ ọ be rọwo ugogo uwuhrẹ Ebaibol jọ họ, hayo o kru uwuhrẹ erue jọ kekeke? O rẹ sai woma re wha rri ebe efa nọ e ta ziezi kpahe oware nọ Ebaibol e ta kpahe ẹme na. Otẹrọnọ ọmọ-uwuhrẹ na ọ gbẹ rọwo ghele he, kẹ ẹme na uvẹ bọo oke ofa, re who ru uwuhrẹ riẹ na haro. (Jọn 16:12) Nọ o bi wo otoriẹ Ebaibol na haro je bi wo ẹnyaharo abọ-ẹzi na, ẹsejọhọ o ti wo otoriẹ uwuhrẹ Ebaibol nọ ọ jẹ vro avro kpahe na.

⁴ Jọ Owowa: Otẹrọnọ uyo onọ jọ u gbe vẹ owhẹ ẹro ho, who du rọ okpakpa kẹ uyo onọ na ha. (2 Tim. 2:15; 1 Pita 4:11) Ta kẹe inọ whọ te kiẹ kpahe onọ na re whọ tẹ kẹe uyo riẹ okiofa. Whọ sae tubẹ rehọ uvẹ yena wuhrẹ ọmọ-uwuhrẹ na epanọ o re ro ru ekiakiẹ. Rọ oma totọ dhesẹ kẹe epanọ ọ rẹ rọ rehọ ekwakwa ekiakiẹ sa-sa nọ ukoko Jihova o kẹ na ro ruiruo. Ọ vẹ te rọ enẹ muọ iyo enọ obọriẹ họ ẹruẹ evaọ obaro.—Iruẹru 17:11.

Ọkiẹkpemu Isukulu Odibọgba Esuo-ọghẹnẹ

A te rehọ unu kẹ iyo enọ nọ e rrọ obotọ na eva Isukulu Odibọgba Esuo-Ọghẹnẹ nọ a ti ru eva oka nọ o rọ February 28, 2005 muhọ. Ọsẹro isukulu na ọ te rehọ iminiti 30 ru ọkiẹkpemu ọrọ eme nọ a ru eva eka ọ January 3 rite February 28, 2005. [Muẹrohọ: Nọ a gbe kere oria nọ a rehọ ẹme no ze lele onọ na ha, o gwọlọ nọ who re ru ekiakiẹ kẹ omobọ ra ro duku uyo na.—Rri obe ọ Isukulu Odibọgba, ẹwẹ. 36-37.]

EKWAKWA ẸMEỌTA

1. Ẹvẹ ma sai ro ru ẹme mai vẹ amọfa ẹro ziezi? [be-IS ẹwẹ. 226 edhe. 1–ẹwẹ. 227 edhe. 1]

2. Oghẹrẹ eme jọ vẹ o rẹ sae gwọlọ nọ ma ru vẹ ziezi? [be-IS ẹwẹ. 227 edhe. 2–ẹwẹ. 228 edhe. 1]

3. Edhere vẹ o ti fi obọ họ kẹ omai ru ẹme mai evaọ oghẹrẹ nọ ahwo nọ a be kezọ kẹ omai a re ro wuhrẹ noi ze? [be-IS ẹwẹ. 231 edhe. 1-3]

4. Ẹvẹ ma sai ro ru ikereakere nọ ma bi se nọ ogbotu mai ọ riẹ no vẹre re a wuhrẹ eware efa noi ze? [be-IS ẹwẹ. 231 edhe. 4-5]

5. Eme ọ rẹ sai noi ze nọ ma tẹ ta udu họ ahwo nọ a be kezọ kẹ omai awọ re a tẹrovi igogo eware jọ evaọ ikuigbe Ebaibol jọ nọ a riẹ no vẹre? [be-IS ẹwẹ. 232 edhe. 2-4]

Ẹme 1

6. Re a wuhrẹ ahwo inọ a ‘dhẹozọ Ọghẹnẹ je koko izi riẹ,’ eme o kẹre te? (Ọtausi. 12:13) [be-IS ẹwẹ. 272 edhe. 3–ẹwẹ. 273 edhe. 1]

7. Ẹvẹ ma sai ro si iroro ahwo kpohọ orọnikọ odẹ na Jihova ọvo ho, rekọ ro kpohọ oghẹrẹ Ọghẹnẹ nọ ọ rrọ? (Joẹl 2:32) [be-IS ẹwẹ. 274 edhe. 3-5]

8. Ẹvẹ u wuzou te re a wo eriariẹ kpahe Jesu, re a je se isẹri kẹe? (Jọn 17:3) [be-IS ẹwẹ. 276 edhe. 1]

9. Ẹvẹ ewo ọjẹrehọ Ọghẹnẹ gbe ewo otoriẹ Ebaibol na u ro wobọ kpahe ovuhumuo nọ ma re dhesẹ kẹ ọkwa nọ Jesu o wo? [be-IS ẹwẹ. 276 edhe. 2]

10. Ẹvẹ ma sai ro dhesẹ nọ ma ginẹ rọwo nnọ Jesu Kristi yọ Ovie? [be-IS ẹwẹ. 277 edhe. 4]

ISASE EBAIBOL ẸKPOKA

11. Kọ ọgẹdhọ ọsẹ Abraham, Tera, ọ jọ? (Jos. 24:2)

12. Kọ edhere nọ Gidiọn o ro ru iruo nọ Jihova ọ kẹ riẹ u dhesẹ nọ ọ kare aruọwha? Fikieme whọ jẹ kuyo na ere? (Ibr. 6:25-27)

13. Eme ma rẹ sai wuhrẹ no oghẹrẹ nọ Gidiọn o ro lele ahwo orua Ifremu tẹme ze? (Ibr. 8:1-3)

14. Eme ẹzi odederehọ nọ a rẹ rọ ghọ erara nọ ahwo Gibia a wo ho na u dhesẹ? (Ibr. 19:14, 15)

15. Otẹrọnọ “kohwo kohwo o je ru o rọ eva riẹ,” kọ onana o gbẹ wha ozighi ze? (Ibr. 21:25)