Abọ Avọ 7: Eru Ebe-Iwuhrẹ Ebaibol nọ E rẹ Nyaharo

Olẹ nọ A rẹ Lẹ Evaọ Uwuhrẹ Na

¹ Re ọmọ-uwuhrẹ Ebaibol ọ sai wo ẹnyaharo abọ-ẹzi, o gwọlọ oghale Jihova. (1 Kọr. 3:6) Fikiere, u woma re a rehọ olẹ ro mu uwuhrẹ nọ a tohọ no họ jẹ rọ olẹ ku ei họ. Ẹsibuobu ma rẹ sai mu onana họ evaọ ẹdẹ ọsosuọ nọ ma bi ro ru uwuhrẹ kugbe ahwo nọ a wo isiuru egagọ. Nọ ma te bi ru uwuhrẹ kugbe emọ-uwuhrẹ efa, ma rẹ sae jiroro oke nọ u kiehọ nọ ma rẹ rọ to olẹ họ. Whọ rẹ sae rehọ Olezi 25:4, 5 gbe 1 Jọn 5:14 ro fiobọhọ kẹ ọmọ-uwuhrẹ na re ọ riẹ oware nọ ma jẹ lẹ, whọ vẹ rehọ Jọn 15:16 ro dhesẹ epanọ u wuzou te re ma rọ ẹkwoma Jesu Kristi lẹ se Jihova.

² Ono ọ rẹ lẹ evaọ obe-uwuhrẹ Ebaibol? Otẹrọnọ oniọvo-ọmọzae nọ ọ họ-ame no o lele oniọvo-ọmọtẹ kpohọ obe-uwuhrẹ Ebaibol, oniọvo-ọmọzae na ọ rẹ lẹ, rekọ oniọvo-ọmọtẹ na ọ sai ru uwuhrẹ na avọ uzou riẹ nọ ọ rẹ fare. (1 Kọr. 11:5, 10) Eva abọdekọ riẹ, otẹrọnọ oniọvo-ọmọzae nọ ọ re họ-ame he o lele oniọvo-ọmọtẹ kpohọ obe-uwuhrẹ, oniọvo-ọmọtẹ na ọ rẹ lẹ. Evaọ uyero utioye, oniọvo-ọmọtẹ na ọ rẹ fare uzou riẹ re o te mu olẹ na họ gbe okenọ o bi ru uwuhrẹ na.

³ Eware nọ A rẹ Sae jọ Olẹ na Tẹme Kpahe: U du gwọlọ re elẹ nọ a rẹ jọ obe-uwuhrẹ Ebaibol lẹ e jọ thethei hi, rekọ e rẹ jọ avọ ugogo ẹjiroro. U te no eghale Ọghẹnẹ nọ ma rẹ lẹ kpahe uwuhrẹ na gbe uyere nọ ma rẹ kẹe fiki uzẹme nọ ma wuhrẹ no, u woma re ma kẹ Jihova ujiro wọhọ Ehri ithubro. (Aiz. 54:13) Ma rẹ jẹ sai ku eme nọ i dhesẹ uvi isiuru nọ ma wo kpahe ọmọ-uwuhrẹ na gbe ovuhumuo nọ ma wo kẹ ukoko nọ Jihova o bi ro ruiruo. (1 Tẹs. 1:2, 3; 2:7, 8) Jihova nọ ma rẹ lẹ se inọ ọ ghale omodawọ ọmọ-uwuhrẹ na re o fi eware nọ o bi wuhrẹ họ iruo o rẹ sai fiobọhọ kẹe ruẹ epanọ u wuzou te re ọ jọ ọnọ o re ‘ru ẹme na.’—Jem. 1:22.

⁴ Irere buobu i re no olẹ ze. O rẹ wha oghale Ọghẹnẹ ze. (Luk 11:13) U re fi ẹgba họ epanọ ewuhrẹ Ẹme Ọghẹnẹ ọ roja te. Nọ ọmọ-uwuhrẹ ọ be kezọ kẹ elẹ mai na, yọ o bi wuhrẹ epanọ ọ rẹ rọ lẹ. (Luk 6:40) Ofariẹ, elẹ nọ i re no udu nọ o vọ avọ uyoyou kẹ Ọghẹnẹ gbe ọjẹrehọ kẹ ekwakwa riẹ nọ i wo ibe he ze o rẹ sai fiobọhọ kẹ ọmọ-uwuhrẹ na mu usu kugbe Jihova.

Ẹme nọ Whọ rẹ Ta Kpahe Emagazini Na

Awake! Mar. 22

“Ahwo buobu a you igbehru fiki erru nọ i wo, kọ whọ riẹ inọ i wo iruo kẹ uzuazọ evaọ otọakpọ na? [Kuvẹ kẹ uyo.] Emagazini nana o ta kpahe oware nọ ma jẹ gwọlọ igbehru gbe oware nọ o be via kẹ ae nẹnẹ. U te je dhesẹ epanọ Ọnọma na ọ te rọ rawo ekwakwa nana nọ i wuzou gaga na.” Se Olezi 95:4.

Uwou-Eroro Na Apr. 1

“Ahwo a re jiri iwuhrẹ Jesu evaọ akpọ na soso. [Se Matiu 22:37, 39.] Rekọ, oriobọ yọ ọzadhe ologbo jọ nọ ọ rrọ kẹ ekoko uzi Kristi na, gbe ‘Jihova Ọghẹnẹ mai nọ ma rẹ rọ eva, ẹzi, gbe iroro mai kpobi you, gbe erivẹ mai nọ ma re you wọhọ oma mai.’ Emagazini nana o ta kpahe owojẹ-esa nọ i re fiobọhọ k’omai whaha oriobọ.”

Awake! Apr. 8

“Ẹvẹ who roro nọ esẹgbini e sai ro fiobọhọ kẹ emọ rai whaha ebẹbẹ evaọ etoke nọ emọ na e tẹ rrọ ikpe ikpegbọ? [Kuvẹ kẹ uyo. Who ve se Aizaya 48:17, 18.] Emagazini nana o dhesẹ epanọ ohrẹ Ebaibol nọ a re fihọ iruo o sai ro fiobọhọ kẹ esẹgbini nọ a jẹ sae ta ẹme kugbe emọ rai ziezi, je fi ọnyaba nọ o fo họ rọ kẹ ae.”