Ẹdẹ Jihova Ọ Kẹle No

¹ Ileleikristi a be rọ ajọwha rẹro ẹtha ẹdẹ Jihova, nọ ọ te rọ raha eyero eware nana jẹ wha akpọ ọkpokpọ ẹrẹreokie tha. (2 Pita 3:12, 13) Nọ ma riẹ uzedhe oke nọ ẹdẹ yena ọ te rọ tha ha na, ma rẹ yọrọ aruọjajavi mai je fiobọhọ kẹ amọfa re a ru epọvo na re. (Izik. 33:7-9: Mat. 24:42-44) Eroro kpahe Ẹme eruẹaruẹ Ọghẹnẹ o te bọ imuẹro mai ga inọ ‘ẹdẹ ologbo Jihova ọ kẹle no.’—Zef. 1:14.

² Egaga-Esuo Akpọ Unọjọ Utọjọ: Wọhọ epanọ a kere fihọ Eviavia 17:9-11 na, Jọn ukọ na ọ fodẹ “ivie ihrẹ,” nọ i dikihẹ kẹ egaga-esuo akpọ ihrẹ unọjọ utọjọ. Jọn ọ tẹ jẹ ta kpahe ‘ovie avọ eree,’ nọ o dikihẹ kẹ Okugbe Erẹwho na nẹnẹ. Kọ ma re rre ẹro egaga-esuo efa nọ e te roma via? Ijo, eruẹaruẹ na e ta inọ ovie avọ eree nana ‘o re ti kpohọ ọraha,’ yọ u noi no a gbẹ fodẹ ivie akpọ efa ha. Kọ eruẹaruẹ nana i fiobọhọ k’owhẹ vuhu oria nọ ma nyate no evaọ oke mai na?

³ Daniẹl 2:31-45 u fiobọhọ k’omai wo otoriẹ ẹtha ẹdẹ Jihova. Evaọ eruẹaruẹ yena, ẹmema ologbo nọ Nebukadneza ọ ruẹ evaọ ewezẹ na o dikihẹ kẹ egaga-esuo akpọ na unọjọ utọjọ. Egaga-esuo nana e roma via no unọjọ utọjọ. Etoke esuo vẹ ma nyate no nẹnẹ? Etoke esuo nọ evawọ ẹmema na o dikihẹ kẹ. Eruẹaruẹ na i dhesẹ oware nọ o te via lele iei vevẹ. A te raha esuo ahwo-akpọ no riẹriẹriẹ, a vẹ te rehọ “uvie nọ a rẹ raha ha muẹ.” Kọ whọ gbẹ ruẹ epanọ onana u ro dhesẹ nọ ẹdẹ Jihova ọ kẹle no?

⁴ Imuẹro Efa: Ma be rọ ẹro ruẹ imuẹro efa nọ i dhesẹ nọ ẹdẹ Jihova ọ kẹle no. Ma be ruẹ orugba oware nọ Pọl ukọ na ọ ta kpahe uruemu ahwo “eva edẹ urere” na. (2 Tim. 3:1-5) Yọ ma bi wobọ evaọ usiuwoma nọ o gbahọ nọ ma rẹ jọ akpọ na soso ta taure urere na o tẹ ze. (Mat. 24:14) Jọ odibọgba ẹgbede mai ọ hai dhesẹ via inọ ma vuhu ovuẹ okpakpata ẹnjẹle na mu: “Dhozọ Ọghẹnẹ jẹ rehọ oruaro kẹ e, keme oke oziẹobro riẹ o te no.”—Evia. 14:6, 7.

Abọ Avọ 9: Eru Ebe-Iwuhrẹ Ebaibol nọ E rẹ Nyaharo

Ọmọ-Uwuhrẹ na nọ A re Wuhrẹ re O Se Isẹri Oke-Gheghe

¹ Okenọ Andru avọ Filip a vuhumu nọ Jesu họ Mesaya nọ a yeyaa riẹ na, a sai fibo ho re a siọ amọfa ba ẹtakẹ kpahe usi oghọghọ igbunu na. (Jọn 1:40-45) Ere ọvona re nẹnẹ, nọ emọ-uwuhrẹ Ebaibol a bi mu ẹrọwọ họ efihọ oware nọ a bi wuhrẹ na, oma o rẹ wọ ae re a tẹme kpahe iẹe. (2 Kọr. 4:13) Ẹvẹ ma sae rọ ta udu họ ai awọ re a ta usiuwoma oke-gheghe je wuhrẹ ai re a ru ere ziezi?

² Whọ sae nọ ọmọ-uwuhrẹ na sọ ọ sae tẹme kẹ ohwo jọ no kpahe oware nọ o bi wuhrẹ no Ebaibol ze na. Ẹsejọhọ o wo egbẹnyusu hayo ahwo uviuwou nọ ọ rẹ sai zizie re a ku oma gbei evaọ uwuhrẹ na. Nọe sọ ibe-iruiruo riẹ, ibe emọ-isukulu, hayo amọfa jọ a dhesẹ isiuru kpahe emamọ usi na no. Ọ sae rọ edhere nana mu usiuwoma họ ẹta. Fiobọhọ kẹe wo otoriẹ oware nọ u je fo nọ a dhesẹ ovuhumuo, je dhesẹ adhẹẹ gbe ẹwo evaọ okenọ a bi lele amọfa tẹme kpahe Jihova Ọghẹnẹ gbe ẹjiroro riẹ.—Kọl. 4:6; 2 Tim. 2:24, 25.

³ Oware nọ A Rọwo nọ A rẹ Ta kẹ Amọfa: U wuzou gaga re a wuhrẹ emọ-uwuhrẹ Ebaibol re a rehọ Ẹme Ọghẹnẹ ruiruo nọ a tẹ be ta oware nọ a rọwo kẹ amọfa. Nọ wha te ru uwuhrẹ na te eria sa-sa no, nọ ọmọ-uwuhrẹ na nọ: “Ẹvẹ whọ sae rọ rehọ Ebaibol na ru uzẹme nana vẹ kẹ ahwo uviuwou ra?” hayo “Ikere Ebaibol vẹ whọ sai ro dhesẹ ẹme nana vẹ kẹ omọfa?” Kezọ kẹ uyo nọ ọ te kẹ, who ve dhesẹ kẹe epanọ ọ sai ro si uwuhrẹ riẹ no Ikereakere na ze. (2 Tim. 2:15) Eva ere oruo, yọ who bi wuhrẹ ọmọ-uwuhrẹ na re o se isẹri oke-gheghe, gbe okenọ o te te no, o ve kuomagbe ukoko na kpohọ usiuwoma ota.

⁴ U fo re a ruẹrẹ ọmọ-uwuhrẹ Ebaibol kpahe kẹ ọwọsuọ. (Mat. 10:36; Luk 8:13; 2 Tim. 3:12) Nọ amọfa a tẹ nọ enọ hayo ta ẹme kpahe Isẹri Jihova, onana u re rovie edhere fihọ kẹ ọmọ-uwuhrẹ re ọ ta usiuwoma. Ibroshọ na Isẹri Jihova—Oghẹrẹ Ahwo Vẹ A Rrọ? Eme A Rọwo? o rẹ sai fiobọhọ kẹ ae ‘ta unu rai vevẹ.’ (1 Pita 3:15) U wo evuẹ egbagba nọ ahwo kpokpọ a sai ro fiobọhọ kẹ uvi egbẹnyusu gbe ahwo uviuwou re a wo otoriẹ iruẹru gbe ẹrọwọ mai nọ o no Ebaibol ze na.