Usiuwoma Ota U re Fi Obọ họ kẹ Omai Thihakọ

¹ Ẹme Ọghẹnẹ ọ tuduhọ omai awọ inọ ma “rehọ oriori dhẹ ohrẹ nọ a fihọ kẹ omai na.” (Hib. 12:1) Wọhọ epanọ ọdhẹ-ohrẹ ọ gwọlọ ithihakọ re ọ sae dhẹ te oka na, ere ọvona ma gwọlọ ithihakọ re ma sai wo osa uzuazọ ibẹdẹ bẹdẹ. (Hib. 10:36) Ẹvẹ odibọgba Oleleikristi na ọ sai ro fiobọhọ k’omai rọ ẹrọwọ thihakọ te urere?—Mat. 24:13.

² O be Bọ Omai Ga Evaọ Abọ-Ẹzi: Ewhowho nọ ma bi whowho eyaa igbunu Ebaibol orọ akpọ ọkpokpọ ẹrẹreokie na u re fiobọhọ ru nọ ẹruore mai o je muẹro. (1 Tẹs. 5:8) Ma te bi kpohọ usiuwoma ota ẹsikpobi, ma re wo uvẹ nọ ma rẹ rọ ta uzẹme nọ ma wuhrẹ no Ebaibol ze no via. Ma wo uvẹ nọ ma rẹ rọ tha ẹrọwọ mai uke, nọ o rẹ rọ ere bọ omai ga evaọ abọ-ẹzi.

³ Re ma sai wuhrẹ amọfa ziezi, ma re wo otoriẹ uzẹme Ebaibol na kẹ omobọ mai tao. Ma re ru ekiakiẹ je roro didi kpahe ẹme na. Oma nọ ma rẹ dawo evaọ edhere nana u re ru otoriẹ mai rro, bọ ẹrọwọ mai ga, jẹ sasa omai oma evaọ abọ-ẹzi. (Itẹ 2:3-5) Fikiere, nọ ma be gwọlọ fiobọhọ kẹ amọfa na, yọ ma be bọ oma mai ga re.—1 Tim. 4:15, 16.

⁴ Ajọwha nọ ma re ro wobọ evaọ odibọgba na yọ abọjọ nọ o wuzou evaọ “ẹgọ-ẹmo Ọghẹnẹ” na, nọ ma gwọlọ re ma sai dikihẹ ga kẹ Ẹdhọ avọ idhivẹri na. (Ẹf. 6:10-13, 15) Obọ nọ ma re wo ẹsikpobi evaọ iruo Ọghẹnẹ u re fiobọhọ k’omai tẹrovi eware ọbọga je ru nọ akpọ Setan ọ gbẹ raha omai hi. (Kọl. 3:2) Nọ ma bi wuhrẹ amọfa idhere Jihova na, yọ ma be kareghẹhọ oma mai ẹsikpobi oware nọ o jẹ gwọlọ nọ ma yọrọ uruemu ofuafo.—1 Pita 2:12.

⁵ Ẹgba nọ Ọghẹnẹ Ọ rẹ kẹ: Orọ urere, obọ nọ ma re wo evaọ iruo odibọgba na u bi wuhrẹ omai nọ ma fi eva họ Jihova. (2 Kọr. 4:1, 7) Ẹvẹ oyena o rrọ oghale te! Evaifihọ itieye na nọ ma re wo orọnikọ o rẹ ruẹrẹ omai kpahe re ma ru odibọgba mai gba ọvo ho rekọ u re fiobọhọ k’omai yeri lele uyero kpobi nọ ma nyaku evaọ uzuazọ. (Fil. 4:11-13) Evaọ uzẹme, epanọ a rẹ rọ rehọ ẹro so Jihova nọ ma re wuhrẹ họ otọhotọ kẹ ithihakọ. (Ol. 55:22) Evaọ idhere buobu, usiuwoma ota u re fiobọhọ k’omai thihakọ.

Abọ Avọ 10: Eru Ebe-Iwuhrẹ Ebaibol nọ E rẹ Nyaharo

Ọmọ-Uwuhrẹ na nọ A re Wuhrẹ Kpahe Usiuwoma Ota Nuwou Ruwuo Na

¹ Nọ ekpako na a tẹ jiroro nọ ọmọ-uwuhrẹ o te epanọ ọ rẹ rọ jọ owhowho-uvie nọ ọ re họ-ame he no, ọ sai mu oma họ ekugbe ukoko na evaọ usiuwoma ota nuwou ruwou na. (Rri obe ọ A Koko Omai Họ re Ma Ru Oreva Jihova, ẹwẹ. 79-81.) Ẹvẹ ma sai ro fiobọhọ kẹ ọmọ-uwuhrẹ na re ọ nyate use-abọ usiuwoma ota nuwou ruwou na?

² Oma nọ Wha rẹ Ruẹrẹ họ Kugbe: Oware ofa nọ u woma vi oma nọ a rẹ ruẹrẹhọ ziezi o riẹ hẹ. Dhesẹ kẹ ọmọ-uwuhrẹ na oria nọ ọ jẹ sae ruẹ idhere usiuwoma ota nọ a jiroro rai evaọ Odibọgba Uvie Mai, obe ọ Reasoning na, gbe omobe ọ Epanọ A ro Muhọ Jẹ Ruabọhọ Ebaibol E rọ Jiroro na, who ve fiobọhọ kẹe salọ edhere ọlọlọhọ jọ nọ o kiehọ nọ a sai ro lele ohwo tẹme evaọ ẹkwotọ ukoko rai. No emuhọ ze, tuduhọ iẹe awọ re ọ rehọ Ebaibol na ruiruo evaọ odibọgba na.—2 Tim. 4:2.

³ Ọmọ-uwuhrẹ ọkpokpọ nọ a rẹ keria kugbe ruẹrẹ oma kpahe u wuzou gaga. Nọ ọmọ-uwuhrẹ na ọ be wariẹ edhere usiuwoma ota na ẹwẹwariẹ re u mu ei unu na, dhesẹ kẹe epanọ ọ sae rọ rehọ ona kiyo eme nọ ahwo a rẹ kpahe ẹsikpobi evaọ ẹkwotọ ukoko rai. (Kọl. 4:6) Kẹe imuẹro inọ orọnikọ uyo onọ kpobi nọ ohwo nọ a be ta ẹme kẹ ọ nọ egbodibo Oleleikristi e rẹ riẹ hẹ. Evaọ ẹsibuobu, o rẹ mai woma re whọ ta kẹ ohwo na inọ who ti ru ekiakiẹ je zihe nyai lele iei t’ẹme na haro.—Itẹ 15:28.

⁴ Usu nọ Wha rẹ Jọ Kugbe Evaọ Usiuwoma Ota: Evaọ ẹdẹ ọsosuọ nọ ọmọ-uwuhrẹ ọ te rọ ta usiuwoma nuwou ruwou, ta kẹe nọ o muẹrohọ epanọ whọ te rọ t’ẹme nọ whẹ avọ iẹe a ruẹrẹhọ kugbe na kẹ ohwo. Kẹsena whọ vẹ ta kẹe re ọ ta omojọ. Evaọ ẹsejọ, o rẹ mai woma re a ta kẹ owhowho-uvie ọkpokpọ nọ ọ ta abọjọ ẹme nọ wha gbẹ ruẹrẹ họ kugbe na, wọhọ ese nọ o re se gbe ẹme nọ ọ rẹ kpahe fihọ ikereakere jọ. Wo oghẹrẹ nọ ọmọ-uwuhrẹ na ọ rrọ gbe epanọ ẹgba riẹ o te họ iroro. (Fil. 4:5) Hai jiri ei ẹsikpobi nọ who bi wuhrẹ iẹe evaọ kabọ kabọ iruo usiuwoma ota na.

⁵ O roja re a fiobọhọ kẹ owhowho-uvie ọkpokpọ re o wo omaa ẹsikpobi nọ o re ro wo obọ evaọ odibọgba na, o tẹ lọhọ, ọ hai ru ei koka koka. (Fil. 3:16) Wha ru ugogo ọruẹrẹfihotọ nọ wha re ro kpohọ usiuwoma ota kugbe, whọ vẹ jẹ tuduhọ iẹe awọ re ọ hai lele amọfa nọ a wo ajọwha kpohọ usiuwoma ota re. Oriruo gbe omakugbe rai u ti fiobọhọ kẹe wo ona jẹ ruẹ oghọghọ evaọ usiuwoma nuwou ruwou na.