Dhesẹ Uvi Isiuru—Ẹkwoma Ẹwo Odhesẹ
1 Be kareghẹhọ oke ọsosuọ nọ o ro lele omọvo Isẹri Jihova tẹme, aye jọ nọ eva Isẹri Jihova e rẹ were he ọ ta nọ: “Eva uzẹme, mẹ kareghẹhọ ugogo oware nọ ma tẹme kpahe he, rekọ oware nọ mẹ kareghẹhọ họ epanọ o ro dhesẹ ẹwo kẹ omẹ, uruemu odederehọ gbe omarokpotọ riẹ. Onana o lẹliẹ omẹ si kẹle iẹe gaga.” Eme nana i dhesẹ epanọ uvi isiuru nọ ma re dhesẹ kpahe ahwo nọ ma be ta usiuwoma kẹ u wuzou te.—Fil. 2:4.
2 Uyoyou U Wo Ọriẹruo: Edhere jọ nọ ma sai ro dhesẹ uyoyou kẹ amọfa họ ẹkwoma ẹwo nọ ma re dhesẹ kẹ ae. (1 Kọr. 13:4) Ohwo nọ ọ rrọ wowou o re dhesẹ uvi isiuru kpahe ewoma amọfa, gwọlọ idhere nọ o re ro fiobọhọ kẹ ae. Evaọ uzẹme, iruo usiuwoma ota na yọ abọjọ ẹwo odhesẹ. Rekọ uvi isiuru nọ ma wo kẹ ahwo u re dhesẹ oma via orọnikọ ẹkwoma usiuwoma nọ ma rẹ ta kẹ ae ọvo ho. Oghẹrẹ kpobi nọ ma re ro yeri kugbe ahwo—oghẹrẹ nọ ma rẹ jọ whẹtiẹ whẹtiẹ, emamọ uruemu mai, oghẹrẹ nọ ma rẹ gaviezọ, eme nọ ma rẹ ta gbe oghẹrẹ nọ ma rọ tae, makọ oghẹrẹ nọ ma re ro rri amọfa dede—u re dhesẹ sọ ma gine wo ọdawẹ.—Mat. 8:2, 3.
3 Uvi ọdawẹ nọ ma wo kẹ ahwo o rẹ jẹ w’omai fiobọhọ kẹ ae evaọ idhere nọ i wiruo. Nọ oniọvo-ọmọzae jọ nọ ọ rrọ ọkobaro ọ jẹ ta usiuwoma no uwou ruọ uwou, ayeuku jọ nọ ọ kpako no o je lei no unuẹthẹ riẹ nọ ọ riẹ nọ oniọvo na yọ omọvo Isẹri Jihova. Aye na ọ ta inọ ọ jọ ehru ewewe jẹ gwọlọ nwene eke-ukpẹ ẹlẹtriki riẹ evaọ oria nọ o je there-ẹbẹ evaọ okenọ oniọvo na o kporo ẹgogo uwou na. Oniọvo-ọmọzae na ọ tẹ ta nọ: “O nwani kiehọ họ re whẹ ọvo who ru oyena.” Aye na ọ tẹ ta kẹe nnọ ọ ruọ uwou. Oniọvo-ọmọzae na o te nwene eke na kẹe koyehọ ọ nya vrẹ. Nọ ọmọzae aye na o weze ze te ruẹ epanọ oni riẹ ọ rrọ, oni na o te gbiku oware nọ o via kẹe. Oware na o were ọmọ aye na te epanọ ọ nyae rọ gwọlọ oniọvo-ọmọzae mai na re o yere iei. Onana o wha riẹ ze nọ a rọ tẹme kugbe ziezi, je ru nọ ọmọ aye na ọ rọ jẹ obe-uwuhrẹ Ebaibol rehọ.
4 Ẹkwoma ẹwo nọ ma re dhesẹ, yọ ma bi dhesẹ uyoyou nọ Jihova o wo kẹ ahwo jẹ whẹ erru họ ovuẹ Uvie na. Fikiere, joma hai ‘dhesẹ oma mai, wọhọ iruiruo Ọghẹnẹ . . . ẹkwoma ẹwo odhesẹ.’—2 Kọr. 6:4, 6.