Epanọ A Sae rọ Yọrọ Ajọwha
1 Ajọwha nọ Apọlọs o je ro ruiruo odibọgba riẹ o sae kareghẹhọ omai ibe Ileleikristi mai nẹnẹ enọ i wo ajọwha ziezi evaọ iruo usiuwoma ota na. (Iruẹru 18:24-28) Dede na, a k’omai kpobi ohrẹ nọ: “Wha moyẹlẹ eva iruo ho, wha jọ jajaja eva Ẹzi.” (Rom 12:11) Eme ọ rẹ sai fiobọhọ k’omai wo jẹ yọrọ ajọwha evaọ odibọgba Oleleikristi na?
2 Eriariẹ E rẹ Tua Ajọwha: Nọ Jesu ọ romavia kẹ ilele ivẹ riẹ jọ je “dhesẹ eware kpobi nọ a kere kpahe iẹ kẹ ae” no, a ta nọ: “Kọ eva mai egbẹ ghariẹ okenọ ọ jẹ ta eme ko mai eva edhere?” (Luk 24:27, 32) Epọvo na re, kọ oghọghọ o gbẹ be hae vọ idu mai nọ otoriẹ mai orọ Ẹme Ọghẹnẹ u bi vihọ na? Ẹhẹ, eriariẹ e rẹ lẹliẹ ẹrọwọ rro. Ahwo Rom 10:17 o ta nọ: “Epanọ ohwo o yo ere ọ rẹ rọ rọwa.” Nọ idu mai e tẹ vọ avọ imuẹro kpahe eyaa Jihova, ma te sae siọ eware nọ ma wuhrẹ no ba ẹta kpahe he!—Ol. 145:7; Iruẹru 4:20.
3 Re ma yọrọ uyoyou mai kẹ Ọghẹnẹ, jẹ yọrọ ajọwha ọgaga mai kẹ iruo riẹ ziezi, orọnikọ eriariẹ nọ ma wo no eware nọ ma wuhrẹ vrẹ no ze ọvo ma rẹ rọ ẹro so ho. O gba omai họ nọ ma re ru otoriẹ mai orọ uzẹme na kẹre je ru uyoyou mai kẹ Jihova kodo. O gbẹ rrọ ere he, egagọ mai kẹe e sai zihẹ ruọ oware ọ ma je ru ọvo. (Evia. 2:4) Ebaibol na e tuduhọ omai awọ inọ ma ‘nya họ aro evaọ eriariẹ Ọghẹnẹ.’—Kọl. 1:9, 10.
4 Epanọ Ma bi Ru Uwuhrẹ Mai: U re woma re ma kiẹ oghẹrẹ nọ ma bi ro ru uwuhrẹ mai riwi. Wọhọ oriruo, o sae jọ nọ ma re kpoka họ iyo nọ e rrọ oria uwuhrẹ Uwou-Eroro jẹ kẹ iyo gbagba. Kọ ma be hai se ikereakere nọ a fodẹ je roro kpahe epanọ ma re ro fi eme na họ iruo evaọ uzuazọ mai? Evaọ isase Ebaibol ẹkpoka na, kọ ma be hae daoma re ma ru ekiakiẹ efa otẹrọnọ iyero mai e kuvẹ te ere, je roro didi kpahe eware nọ ma wuhrẹ no isase na ze? (Ol. 77:11, 12; Itẹ 2:1-5) Ẹvẹ o rrọ oware erere te re ma roro kpahe Ẹme Ọghẹnẹ, jẹ kẹe uvẹ re o daruọ omai oma! (1 Tim. 4:15, 16) Obọdẹ uwuhrẹ utioye na u ti fiobọhọ k’omai jẹ lẹliẹ omai wo ẹgba “kẹ iruo iwoma iruo.”—Tait. 2:14.