Inwene Jọ Evaọ Ọruẹrẹfihotọ nọ A Rẹ rọ Rehọ Ọgwa Uvie Ru Ehaa-Orọo Evaọ Nigeria
1 Oware jọ nọ u wuzou gaga nọ a rẹ jọ Ọgwa Uvie Isẹri Jihova ru họ ehaa-orọo. (Emu. 2:24) U te no itee abọ-uzi nọ a rẹ nya lele no, u wo eruẹrẹfihotọ ukoko na nọ ahwo nọ a gwọlọ rehọ Ọgwa Uvie ru ehaa-orọo a rẹ nya lele. Uzoẹme nana u dhesẹ inwene jọ nọ ma bi ru evaọ ọruẹrẹfihotọ nọ ahwo jọ a nya lele no evaọ oke nọ u kpemu.
2 Evaọ eruẹrẹfihotọ ivẹ nọ a rẹ rọ ruọ orọo eva Nigeria na, Isẹri Jihova a rẹ sae rehọ ọvo jọ evaọ ivẹ nana rọ ruọ orọo: a sai ru orọo uzi-ẹwho hayo orọ uzi-egọmeti. Dede nọ oghẹrẹ erọo ivẹ na i kiehọ eva abọ-uzi jẹ rọwokugbe uzi Ebaibol, o roja re ma mu ẹro họ inọ ivẹ na i wo ohẹriẹ, yọ i wo abọ kugbe ohwohwo ho. Oghẹrẹ vẹ i ro wo ohẹriẹ?
3 Orọo Uzi-Ẹwho: Orọo nọ a re ru lele uzi-ẹwho u re wo ohẹriẹ no oria ruọ oria. Rekọ, evaọ Nigeria, izi egọmeti i dhesẹ igogo eware jọ nọ i wuzou nọ e rẹ lẹliẹ orọo uzi-ẹwho gba. Nọ a te ru igho ọmọtẹ na no, je si obọ noi kẹ ọzae na no, yọ a zihe ruọ ọzae avọ aye no evaọ abọ-uzi jẹ rọwo kugbe Ikereakere na.
4 Dede nọ orọo uzi-ẹwho u kiehọ ababọ obe-orọo nọ a rẹ nyai kere eva obọ egọmeti, re ọzae avọ aye na a sae reawere uvẹ-iruo efa evaọ ukoko na, a rẹ nyai kere obe-orọo rai evaọ obọ egọmeti. Obe-orọo nọ a re kere evaọ obọ egọmeti o rẹ thọ ọzae avọ aye na gbe emọ rai evaọ abọ-uzi. Fikiere, ekpako ukoko a rẹ tuduhọ Ileleikristi nọ e rọo lele uzi-ẹwho awọ re a nyae jọ obọ egọmeti kere obe-orọo rai nọ a tẹ nwane ruọ orọo na no. Local government nọ i wo ọruẹrẹfihotọ kẹ ekere obe-orọo nọ a ru lele uzi-ẹwho họ oria nọ a rẹ jọ ru obe-ukere nana.
5 Orọo-Uzi Egọmeti: Orọo uzi-egọmeti họ oghẹrẹ orọo avivẹ nọ uzi egọmeti Nigeria o kuvẹ riẹ. Evaọ orọo uzi-egọmeti, ọzae avọ aye na a rẹ ta eyaa orọo do via evaọ iraro ohwo nọ egọmeti ọ kẹ udu inọ o ru oghẹrẹ orọo utioye na. Fibae, o tẹ kawo, isẹri ivẹ e rẹ jariẹ hrọ, yọ imava nọ e be rọo na gbe isẹri rai a rẹ whobọhọ obe-orọo na evaọ oria na. Orọo nana u du gwọlọ nọ uviuwou ahwo nọ a be rọo na a rẹ rọwo tao ho, yọ o gwọlọ igho-iruo gbe he. Rekọ evaọ Nigeria, egọmeti ọ kẹ Egwa Uvie jọ elasisi no re a sae jarae kere obe-orọo nọ a re ru lele uzi-egọmeti.
6 Nọ A te Ku Orọo Uzi-Ẹwho gbe Orọ Uzi-Egọmeti Kugbe: Anwọ ikpe buobu ze na, u zihe ruọ uruemu Isẹri Jihova buobu no re a ruọ orọo lele uzi-ẹwho, nọ a je ru oyena vrẹ no a ve kpohọ Ọgwa Uvie nyai ru onọ o nya lele uzi-egọmeti. Ẹsejọhọ ahwo jọ a roro nọ enẹ a re ro kere orọo uzi-ẹwho nọ a ru no fihotọ evaọ obọ egọmeti. Rekọ, o r’oja re ma kareghẹhọ inọ orọo uzi-ẹwho gbe orọ uzi-egọmeti i wo ohẹriẹ, yọ onọ who ru kpobi evaọ usu ivẹ na o gba evaọ abọ-uzi jẹ gba evaọ abọ Ikereakere na. Fikiere, otẹrọnọ imava nọ a ruọ orọo lele uzi-ẹwho no vẹre a kpohọ Ọgwa Uvie nyai ru orọo nọ o nya lele uzi-egọmeti, koyehọ isiava a be rọo na.
7 Ugogo ehri-uzi na họ, otẹrọnọ imava nọ uzi ovo o gba ha a tẹ ruọ orọo eva obọ oguẹdhọ egọmeti hayo omọfa nọ egọmeti o ro mu inọ o dikihẹ kẹ ahwo nọ a be rọo, orọo yena u kiehọ evaọ aro Ọghẹnẹ gbe ukoko Ileleikristi na. U fo ho re a wariẹ ruọ orọo lele ọruẹrẹfihotọ egagọ nọ a rrọ nọ emerae jọ hayo ikpe jọ e tẹ vrẹ no. Ofariẹ re, otẹrọnọ imava nọ e be rọo na a ruọ orọo nọ o nya lele uzi-ẹwho, orọo yena u kiehọ eva aro Ọghẹnẹ gbe ukoko Ileleikristi na. Fikiere, u fo ho, yọ o roja gbe he re imava nọ i ru orọo uzi-ẹwho no a wariẹ nyai ru orọ uzi-egọmeti evaọ Ọgwa Uvie nọ a kẹ elasisi nọ a rẹ jọ ru orọo uzi-egọmeti.
8 Eroruiruo Ọgwa Uvie kẹ Orọo Uzi-Egọmeti: Rọwo kugbe eware nọ ma jọ obehru tẹme te no na, u fo ho re imava nọ e ruọ orọo no lele uzi-ẹwho a wariẹ nyae jọ Ọgwa Uvie ruọ orọo nọ a re ru lele uzi-egọmeti. Otẹrọnọ imava itieye na a gwọlọ nọ a jọ Ọgwa Uvie kẹ ovuẹ orọo nọ o rẹ sai fiobọhọ kẹ ae, a sai ru ere, rekọ a rẹ whobọhọ obe-orọo hayo whobọhọ uvumọ obe abọ-uzi hi wọhọ epanọ a re ru evaọ orọo uzi-egọmeti na. O gwọlọ nọ imava na a rẹ jiroro oghẹrẹ orọo nọ a gwọlọ ru, jọ orọ uzi-ẹwho hayo orọ uzi-egọmeti. Oware nọ u wuzou nọ ma re wo họ iroro họ, te a ru orọ uzi-ẹwho hayo orọ uzi-egọmeti, onọ whọ jọ ivẹ na ru kpobi o gba evaọ abọ-uzi, jẹ rọwo kugbe Ikereakere na.
9 Fiki ẹjiroro nana, ma gbẹ kuvẹ hẹ re a rọ Egwa Uvie nọ e rrọ Nigeria ro ru orọo uzi-egọmeti nọ a jẹ jọ Ọgwa Uvie na whobọhọ obe-orọo kpakiyọ imava na a ruọ orọo lele uzi-ẹwho no vẹre. Otẹrọnọ ọzae avọ aye a ru orọo uzi-ẹwho, u du gwọlọ nọ a nyae jọ oria nọ a je kere obe-orọo ru orọo uzi-egọmeti hi. Rekọ otẹrọnọ imava Ileleikristi nọ e ruọ orọo lele uzi ẹwho no a salọ nọ a bi ru orọo uzi egọmeti evaọ oria nọ a je kere obe-orọo, oyena yọ ẹme obọrai (rekọ a rẹ jọ Ọgwa Uvie ru ei hi). Orọnikọ onana u fiba oware nọ u dhesẹ nọ a rọo no ho. Fikiere, otẹrọnọ a ru onana, a re du kẹ ovuẹ orọo hayo ru ehaa ha. Epọvo na re, u fo ho, yọ o roja gbe he re ọzae avọ aye a ru orọo uzi-ẹwho kpakiyọ a ru onọ o nya lele uzi-egọmeti no vẹre.
10 Ẹme Orọo Nọ A rẹ Ta no Ebaibol Ze: Otẹrọnọ imava a ruọ orọo uzi-ẹwho hayo ruọ orọo lele uzi-egọmeti, kẹsena a tẹ gwọlọ nọ a ta ẹme orọo no Ebaibol ze nọ o rẹ sai fiobọhọ kẹ ae, a rẹ sai mi ekpako na uvẹ re a jọ Ọgwa Uvie ru ei, makọ Ọgwa Uvie na o wo elasisi nọ a rẹ rọ jariẹ ru orọo uzi-egọmeti hayo o wo ho. Nọ a te bi ru onana, o rrọ oware areghẹ re a ruẹ nọ edẹ buobu e vrẹ hẹ nọ a rọ ruọ orọo na no taure a tẹ te kẹ ovuẹ na. (w97-E 4/15 ẹwẹ. 24, edhe. 1) O rẹ mai woma re a kẹ ovuẹ na evaọ obọ Ọgwa Uvie evaọ ẹdẹdẹ nọ a ro ru orọo uzi-ẹwho hayo orọ uzi-egọmeti na hayo evaọ ẹdẹ nọ o lele i rie. Nọ o tẹ rehọ edẹ buobu nọ a ruọ orọo na no taure a tẹ te kẹ ovuẹ na, ẹme na o re gbe wo ẹgba tere he. U fo nọ ẹme na o re fiẹgba họ epanọ ọruẹrẹfihotọ orọo o wo wuzou je wo ọghọ te. Ẹme na ọ rẹ jọ ẹme nọ a rẹ ta no Ebaibol na ze, ọ rẹ jọ jajaja jẹ kẹ ọbọga abọ-ẹzi, orọnikọ rọkẹ imava nọ e be rọo na ọvo ho rekọ kẹ amọfa nọ a nyaze te gaviezọ na. Ofariẹ, eva ọruẹrẹfihotọ nọ a be te rọ ta ẹme orọo na, a rẹ whaha oware kpobi nọ o rẹ lẹliẹ ahwo roro nọ ehaa-orọo avivẹ a bi ru na.
11 Ahwo kpobi nọ a rrọ ukoko Ileleikristi na a re wo ovuhumuo inọ orọo yọ ọruẹrẹfihotọ nọ Ọghẹnẹ ọ tohọ. Fikiere, tọ imava nọ e be rọo na a salọ nọ a re ru orọo uzi-ẹwho hayo orọ uzi-egọmeti, a rẹ dao ẹgba rai kpobi re a ruẹ nọ ‘Ee rai yọ Ee’ rọ kpahe ọtamuo eyaa orọo nọ a ru na. (Mat. 5:37; 19:6) Nọ ma tẹ rọ ubiẹro “adhẹwẹ” otiọye na ro rri orọo, o rẹ wha ujiro se odẹ Jihova, jẹ lẹliẹ omai nya lele itee ikpehru Riẹ kpahe orọo.—Hib. 13:4.