Who Siobọno Uyoyou nọ Who Wo Eva Oke Ọsosuọ Họ
1 Jesu nọ a kẹ oruaro no na ọ whọku ukoko Ileleikristi ikpe-udhusoi ọsosuọ nọ o jọ obọ Ẹfẹsọs inọ: “Mẹ rehọ fiki onana whọku owhẹ, fiki epanọ whọ se uyoyou ọsosuọ ra ba no.” (Evia. 2:4) O rrọ vevẹ inọ, ahwo buobu a siobọno uyoyou ọsosuọ rai nọ a wo kẹ Jihova no. Nọ ma je kurẹriẹ obọ, uyoyou nọ ma wo kẹ Ọghẹnẹ gbe erivẹ mai o jọ gaga, yọ onana o w’omai rehọ ọwhọ whowho ẹruore ọkpokpọ mai kẹ amọfa. Eme o re fiobọhọ k’omai yọrọ uyoyou ọsosuọ mai jẹ whaha uke nọ ma re si kpemu evaọ iruo odibọgba na?
2 Uwuhrẹ Omobọ-Ohwo gbe Iwuhrẹ Enya: Eme ọ wọ omai wo uyoyou kẹ Ọghẹnẹ gbe erivẹ mai nọ ma wuhrẹ uzẹme na obọ? Kọ ogbẹrọnọ eware nọ ma wuhrẹ kpahe Jihova no Ebaibol na ze? (1 Jọn 4:16, 19) Fikiere, re uyoyou mai “u hedhe ẹruẹruọ,” o gba omai họ inọ ma rẹ ruabọhọ ewuhrẹ re ma wo eriariẹ egbagba, wuhrẹ kodo re ma wo otoriẹ “eware ididi Ọghẹnẹ.”—Fil. 1:9-11; 1 Kọr. 2:10.
3 O rẹ sae ginẹ jọ bẹbẹ re ma yọrọ emamọ omaa uwuhrẹ omobọ-ohwo orọ ikẹse-kẹse evaọ edẹ urere nana nọ e vọ avọ awaruọ gbe eware buobu nọ e rẹ wha ereghe ze na. (2 Tim. 3:1) Ma rẹ ruẹrẹ oke fi họ nọ ma re ro wuhrẹ Ẹme Ọghẹnẹ kẹ oma mai. Iwuhrẹ ukoko nọ ma rẹ nya ẹsikpobi u wuzou gaga re, maero nọ ma riẹ inọ “ẹdẹ na ọ kẹlino” na.—Hib. 10:24, 25.
4 Odibọgba Na: Ajọwha nọ ma re ro ru iruo odibọgba na u re fiobọhọ k’omai yọrọ uyoyou ọsosuọ nọ ma wo kẹ Ọghẹnẹ. Nọ ma tẹ be ta usiuwoma na yọ ma be rọ ere kareghẹhọ oma mai eyaa Jihova, yọ onana u re fiobọhọ k’omai kru ẹruore mai ghaghae jẹ lẹliẹ uyoyou mai jọ dhidhidhi. Re ma wuhrẹ amọfa uzẹme Ebaibol o gwọlọ nọ ma re ru ekiakiẹ re ma wo otoriẹ oware nọ ma bi wuhrẹ na vẹvẹ, yọ onana o rẹ bọ ẹrọwọ mai ga.—1 Tim. 4:15, 16.
5 Jihova o te ọnọ a rẹ sae rehọ eware kpobi kẹ, makọ uyoyou mai. (Evia. 4:11) Whọ kuvẹ re uyoyou ra u kiekpo ho. Yọrọ uyoyou ọsosuọ ra whawha ẹkwoma uwuhrẹ omobọ ra nọ who re ru kẹse kẹse, iwuhrẹ enya ẹsikpobi, gbe ajọwha nọ whọ rẹ rọ ta usiuwoma na kẹ amọfa.—Rom 10:10.