Uyoyou O rẹ Lẹliẹ Emamọ Iyẹrẹ No Odibọgba Mai Ze
1 “Wha bru omẹ ze, mẹ rẹ kẹ owhai udhedhẹ.” (Mat. 11:28) Eme omosasọ yena i dhesẹ uyoyou udidi nọ Jesu o wo kẹ ahwo. Wọhọ egbodibo Ileleikristi, o rrọ isiuru mai re ma rehọ aro kele Jesu evaọ uyoyou udhesẹ kẹ ahwo nọ akpọ o bi dhọvẹ fiki uyoyou nọ o kare akpọ na. Ẹvẹ ma sai ro dhesẹ uyoyou kẹ ahwo evaọ iruo usiuwoma ota mai?
2 Ẹkwoma Ẹme Ọta Kugbe Ahwo: Uyoyou nọ Jesu o wo kẹ ahwo o wọ riẹ rehọ uvẹ kpobi nọ u rovie fihọ ro whowho emamọ usi na kẹ ahwo. (Jọn 4:7-14) Uyoyou u ti fiobọhọ k’omai fi ẹbẹbẹ omovuọ hayo ozọ nọ ma re ro se isẹri oke-gheghe kparobọ. Ọmọtẹ ikpe ezeza jọ o se obọdẹ isẹri kẹ aye jọ nọ ọ keria kẹle iẹe evaọ ubrukpẹ nọ ahwo a rẹ jọ hẹrẹ evaọ obọ ẹsipito. Eme ọ wọ riẹ ru ere? Ọ ta nọ: “Me rri aye na wọhọ ohwo nọ u fo nọ ọ rẹ riẹ kpahe Jihova.”
3 Ma rẹ sae rehọ ohwẹ osasa nọ u no eva ze gbe uvou ẹme uwowolẹ ro dhesẹ isiuru nọ ma wo kẹ ahwo. Nọ ma tẹ gaviezọ ziezi nọ amọfa a tẹ be ta ẹme, ma te wo ovuhumuo kẹ eware nọ e rrọ ọdawẹ rai, gbe uvi isiuru nọ ma re dhesẹ kpahe ai, u re dhesẹ nọ ma wo uyoyou kpahe ae. (Itẹ 15:23) Evaọ aro o ro kele Jesu, u fo nọ ma re fi ẹgba họ ovuẹ ọbọga Uvie na gbe ohrọ-oriọ nọ Jihova o wo kẹ ahwo.—Mat. 24:14; Luk 4:18.
4 Ẹkwoma Obọ-Ufihọ kẹ Amọfa: Jesu o fiobọhọ kẹ ahwo. (Mat. 15:32) Uvẹ nọ ma re ro dhesẹ uyoyou-ẹwo o sai rovie fihọ re nọ ma tẹ rrọ usiuwoma ota. Oniọvo-ọmọtẹ mai jọ o muẹrohọ aye jọ nọ ọ jẹ riẹ otọ eme nọ a be jọ ifonu ta kẹe he. Oniọvo-ọmọtẹ mai ọ tẹ rọ udu obọriẹ fialọ oma via nọ o re fiobọhọ fa otọ eme na kẹ aye na. Uruemu uyoyou nana u rovie uvẹ fihọ nọ ọ rọ rehọ Ikereakere na lele aye na tẹme nọ u ru nọ aye na ọ rọ jẹ uwuhrẹ Ebaibol rehọ. Oriruo ọfa họ, oniọvo-ọmọzae jọ nọ o kpohọ ozihebro ọ nyaku ohwo nọ o zihe bru na nọ uzou u bi dhe fiki agbara ọgbẹgbẹdẹ nọ ọ be sae wọ nya unuẹthẹ vrẹ hẹ. Oniọvo na o te fiobọhọ lele ọzae na wọ agbara na, yọ agbara na aimava a keria nọ o je mu uwuhrẹ Ebaibol họ kugbe ọzae na nọ eva e were gaga na.
5 Nọ ma be ta usiuwoma na, ma bi dhesẹ uyoyou nọ ma wo kẹ Ọghẹnẹ gbe erivẹ mai. (Mat. 22:36-40) Uyoyou utioye na nọ ma re dhesẹ ẹkwoma ẹmeunu gbe eware nọ ma re ru kẹ amọfa u re fiobọhọ kẹ ahwo nọ a wo udu oruọzewọ vuhumu nọ ma wo uzẹme na.