Kọ Whọ Sai W’obọ Evaọ Usiuwoma Ota Ẹdoka?
1. Eme ma sai wuhrẹ mi Pọl avọ ibe etausiuwoma riẹ okenọ a jọ obọ Filipai?
1 O jọ ẹdijala nọ ibuobu ahwo Ju nọ e jọ Filipai a jẹ hai ro serihọ. Pọl avọ ibe etausiuwoma riẹ a kpohọ okpẹwho na evaọ erẹ usiuwoma ota rai jọ. Ohwo ọvo ọ hae fo ae he o hẹ jọnọ a rehọ ẹdẹ yena serihọ. Rekọ, a riẹ inọ ahwo a re kokohọ otafe okpẹwho na kẹ olẹ, fikiere a tẹ rehọ uvẹ yena nyae ta usiuwoma kẹ ae. Eva e were Pọl avọ ibe etausiuwoma riẹ gaga nọ Lidia ọ gaviezọ kẹ ae, kẹsena tei te ekru riẹ soso a tẹ họ-ame. (Iruẹru 16:13-15) Nọ orọnọ ibuobu a re serihọ evaọ Ẹdoka na, kọ whọ gbẹ rehọ oke jọ evaọ ẹdẹ nana rọ ta usiuwoma kẹ ae?
2. Ise-abọ vẹ ahwo Jihova a fi kparobọ no re ma sae ta usiuwoma evaọ Ẹdoka ababọ ukpokpoma?
2 Omodawọ re Usiuwoma Ota Ẹdoka U Dikihẹ: Evaọ 1927, a tuduhọ ahwo Jihova awọ re a raha oke jọ evaọ Ẹdoka kpobi rọ ta usiuwoma. Onana o wha omukpahọ ze. A mu inievo buobu evaọ obọ United States inọ a raha uzi Ẹdijala Ẹdoka, inọ a bi kpokpo ahwo, jẹ zẹ ebe ababọ obe-udu nọ a kẹ rai. Rekọ, ahwo Jihova a siọ usiuwoma Ẹdoka ba ha. Evaọ etoke 1930 a te mu “usiuwoma ota utu” họ, onọ iwhowho-uvie ikoko ekẹloma a re jo kokohọ re a ru ẹkwotọ jọ. U wo unuẹse jọ nọ elakpa a je mu iwhowho-uvie na, rekọ fiki epanọ a bu te a sae whaha ae he. Kọ edikihẹga inievo na re a ruẹ nọ ma ta usiuwoma evaọ Ẹdoka ababọ ukpokpoma o da owhẹ ẹro?
3. Fikieme Ẹdoka ọ rọ rrọ obọdẹ ẹdẹ nọ a re ro kpohọ usiuwoma?
3 Obọdẹ Ẹdẹ Rọkẹ Usiuwoma Ota: Ibuobu ahwo a re kpohọ iruo ho evaọ Ẹdoka. Ẹdẹ yena a rẹ mai wo uvẹ. O rẹ sae were ikpichọche jọ re a ta ẹme kpahe Ọghẹnẹ evaọ Ẹdoka. Otẹrọnọ Ẹdoka ma re ru ewuhrẹ, ma sae wha ẹgọ nọ ma wha kpohọ ewuhrẹ na kpohọ usiuwoma re, kọ whọ gbẹ ma omaa epanọ who re ro kpohọ usiuwoma taure who te ti kpohọ ewuhrẹ hayo nọ ewuhrẹ ọ tẹ fa no? O tẹ lọhọ, whọ rẹ sae wha emu kakao lele oma nọ whọ rẹ re.
4. Eme o rẹ sae wha evawere se omai nọ ma tẹ rehọ oke jọ evaọ Ẹdoka kpohọ usiuwoma?
4 Ma tẹ rehọ oke jọ kpohọ usiuwoma evaọ Ẹdoka ma ti gbe wo oke jọ nọ ma re ro serihọ ghele. Yọ eva e te were omai okenọ ma bi serihọ fikinọ ma rehọ abọjọ oke mai ru iruo Ọghẹnẹ. (Itẹ 19:23) Ẹsejọhọ ma ti duku ohwo jọ wọhọ Lidia nọ o te wha evawere se omai.