UWOU-EBE ITANẸTE Uwou-Eroro
UWOU-EBE ITANẸTE
Uwou-Eroro
Isoko
Ọ
  • Ẹ
  • ẹ
  • Ọ
  • ọ
  • EBAIBOL
  • EBE GBE EWARE EFA
  • IWUHRẸ
  • Ẹvẹ Esẹro Okogho A bi ro Fiobọhọ kẹ Omai?
    Amono A Bi Ru Oreva Jihova Nẹnẹ?
    • UWUHRẸ AVỌ 17

      Ẹvẹ Esẹro Okogho A bi ro Fiobọhọ kẹ Omai?

      Ọsẹro okogho avọ aye riẹ

      Malawi

      Osẹro okogho nọ o bi ru ewuhrẹ omakugbe kẹ usi uwoma ota

      Utu usi uwoma ota

      Ọsẹro okogho nọ ọ rrọ usi uwoma evaọ ẹgbede

      A rrọ usi uwoma ota

      Ọsẹro okogho nọ ọ be gba ẹgwae kugbe ekpako ukoko

      Ọ be gba ẹgwae kugbe ekpako ukoko

      Ikereakere Griki Ileleikristi na e fodẹ odẹ Banabas avọ Pọl ukọ na unuẹse buobu. Ezae ivẹ nana e jọ esẹro ọnyawariẹ, nọ i je weze kpohọ ikoko ikpe-udhusoi ọsosuọ na. Fikieme? A je ru onana re a fiobọhọ kẹ inievo ukoko na dikihẹ ga ziezi evaọ egagọ Ọghẹnẹ. Pọl ọ ta nọ ọ gwọlọ nọ o re “zihe . . . bru inievo na” re ọ riẹ epanọ a rrọ. U no rie eva ze re ọ nya emaele udhusoi buobu, re ọ ruẹse bọ inievo na ga. (Iruẹru Ikọ 15:36) Isiuru ọvo yena esẹro ọnyawariẹ mai nẹnẹ a wo re.

      A rẹ nyaze te tuduhọ omai awọ. Ọsẹro okogho o re weze kpohọ enwenọ ikoko 20, yọ ọ rẹ rria ẹkpoka ọvo kugbe ukoko ovuovo isiava ẹgbukpe. Ma rẹ sai wo irere buobu no eware nọ inievo nana a rọ ẹro ruẹ no ze, gbe eyae rai, otẹrọnọ a rọo no. Esẹro okogho avọ eyae rai a rẹ daoma riẹ te emaha te ekpako, yọ o rẹ were ai gaga re a lele omai kpohọ usi uwoma ota gbe ebe-uwuhrẹ Ebaibol mai. Esẹro nana a re kuomagbe ekpako na kpohọ iweze ẹruọsa, yọ a rẹ jẹ kẹ evuẹ nọ e rẹ tuduhọ omai awọ evaọ iwuhrẹ ukoko gbe ikokohọ.​—Iruẹru Ikọ 15:35.

      A wo isiuru kpahe inievo na kpobi. O rrọ isiuru esẹro okogho gaga re inievo na kpobi a kru ukoko na ga ziezi. A rẹ gba ẹgwae kugbe ekpako gbe idibo ruiruo na re a ta kpahe ẹnyaharo nọ a wo, ọ vẹ jẹ kẹ ae ohrẹ nọ u re fiobọhọ kẹ ae ru iruo rai ziezi. A re fiobọhọ kẹ ekobaro na re a sae reawere iruo usi uwoma ota rai, yọ o rẹ were ai re a riẹ enọ i kurẹriẹ ze obọ, jẹ riẹ kpahe ẹnyaharo nọ a bi wo evaọ ukoko na. Inievo nana ọvuọvo a be rọ unevaze rọ omarai kẹ wọhọ “ibe oruiruo . . . fiki ewoma [mai].” (2 Ahwo Kọrint 8:23) Ma rẹ daoma rọ aro kele ẹrọwọ gbe ẹzi omarọkẹ Ọghẹnẹ nọ a wo.—Ahwo Hibru 13:7.

      • Ẹjiroro vẹ esẹro okogho a bi ro weze kpohọ ikoko?

      • Irere vẹ who re wo no iweze rai ze?

      GBẸ KIẸ VIA

      Jọ ukeledẹ ra kpe oka họ ẹdẹ nọ ọsẹro okogho o ti ro weze ziọ ukoko rai, re whọ sae jariẹ evaọ okenọ ọ te rọ kẹ evuẹ riẹ kpobi evaọ obọ Ọgwa Uvie. Whọ tẹ gwọlọ nọ ọsẹro okogho na hayo aye riẹ ọ jariẹ evaọ etoke nọ a ti ro wuhrẹ obe kugbe owhẹ, vuẹ oniọvo nọ o bi wuhrẹ owhẹ obe re o ru ọruẹrẹfihọ na kpahotọ.

  • Oghẹrẹ Vẹ Ma re ro Fiobọhọ Kẹ Inievo Mai nọ Okpẹtu O Via Kẹ?
    Amono A Bi Ru Oreva Jihova Nẹnẹ?
    • UWUHRẸ AVỌ 18

      Oghẹrẹ Vẹ Ma re ro Fiobọhọ Kẹ Inievo Mai nọ Okpẹtu O Via Kẹ?

      Isẹri Jihova nọ i bi fiobọhọ kẹ ahwo nọ okpẹtu o via kẹ evaọ Dominican Republic

      Dominican Republic

      Inievo nọ e be bọ Ọgwa Uvie nọ ọ raha evaọ Japan

      Japan

      Omọvo Isẹri Jihova nọ ọ be tuduhọ ohwo jọ awọ nọ okpẹtu o via evaọ Haiti

      Haiti

      Nọ okpẹtu o tẹ via, Isẹri Jihova a re ru ọruẹrẹfihotọ kpata kpata re a fiobọhọ kẹ inievo nọ okpẹtu o via kẹ na. Obufihọ utionana u bi dhesẹ uvi uyoyou nọ ma wo kẹ ohwohwo via. (Jọn 13:34, 35; 1 Jọn 3:17, 18) Idhere vẹ ma re ro fiobọhọ?

      Ma rẹ rọ igho ru unevaze. Okenọ ohọo ulogbo u mu evaọ Judia, Ileleikristi ikpe-udhusoi ọsosuọ nọ e jọ Antiọk a vi igho se ibe Ileleikristi rai evaọ Judia ro fiobọhọ kẹ ae. (Iruẹru Ikọ 11:27-30) Epọvo na re, nọ okpẹtu o tẹ via kẹ inievo mai nọ e rrọ ofẹ jọ akpọ na, ma re ru unevaze evaọ ukoko nọ ma rrọ, re a sai vi eware se inievo nọ okpẹtu o via kẹ na.​—2 Ahwo Kọrint 8:13-15.

      Ma rẹ rọ oma mai fiobọhọ re. Ekpako ukoko nọ e rrọ okegbe nọ okpẹtu o jọ via, a rẹ gwọlọ inievo nọ e rrọ ukoko na re a ruẹ nọ aikpobi a gba unu jẹ rrọ oma kọkọ. Ẹsejọhọ ogbẹgwae ogbodhẹ o ti ru ọruẹrẹfihotọ nọ a rẹ rọ rehọ emuore, ame, gbe iwu kẹ inievo na, jẹ ruẹrẹ oria fihọ nọ a rẹ jọ, a vẹ jẹ rẹrote enọ e gwọlọ usiwo. Inievo buobu nọ i wo onaa sa-sa a rẹ fialoma via, a vẹ raha ugho obọrai rọ jofa nyai fiobọhọ evaọ iruo ogbodhẹ na hayo re a bọ iwou inievo na gbe Egwa Uvie nọ e raha. Okugbe nọ ma wo evaọ ukoko na gbe onaa sa-sa nọ ma wuhrẹ mi ohwohwo no fikinọ ma bi ru eware kugbe, u bi fiobọhọ kẹ omai kake ruẹ eware gbe inievo nọ e rẹ sae dhogbo evaọ oke okpẹtu. Dede nọ “enọ ma gbẹ rrọ ẹrọwọ na” ma rẹ mai fiobọhọ kẹ, ma re fiobọhọ kẹ amọfa re nọ o tẹ lọhọ, ghelọ egagọ nọ a rrọ kẹhẹ.​—Ahwo Galesha 6:10.

      Ma rẹ rọ eme Ebaibol na sasa ae oma. Ahwo nọ okpẹtu o via kẹ a ginẹ gwọlọ omosasọ gaga. Evaọ oke utioye na, ma re wo omosasọ no obọ Jihova ze, “Ọghẹnẹ omosasọ kpobi” na. (2 Ahwo Kọrint 1:3, 4) Ma rẹ rọ eyaa Ebaibol na tuduhọ ahwo nọ a rrọ ọkora awọ, jẹ kẹ ae imuẹro inọ kẹle na, Uvie Ọghẹnẹ u ti si eware iyoma kpobi nọ e be wha edada gbe uye-oruẹ ze na no.​—Eviavia 21:4.

      • Fikieme Isẹri Jihova a be sae rọ fialoma via kpata kpata nọ okpẹtu o tẹ via?

      • Didi eme ma rẹ sae ta no Ebaibol na ze rọ sasa ahwo nọ okpẹtu o via kẹ oma?

  • Ono Họ Ọrigbo nọ A re Fievahọ nọ O Wo Areghẹ Na?
    Amono A Bi Ru Oreva Jihova Nẹnẹ?
    • UWUHRẸ AVỌ 19

      Ono Họ Ọrigbo nọ A re Fievahọ nọ O Wo Areghẹ Na?

      Jesu nọ ọ be ta ẹme kẹ ilele riẹ
      Omọvo Isẹri Jihova nọ o bi wuhrẹ obe ukoko

      Mai kpobi ma bi wo erere no ẹme Ọghẹnẹ nọ ma bi wuhrẹ ze

      Imava nọ e rrọ usu utu ẹruorote Isẹri Jihova

      Evaọ omoke jọ taure Jesu o te ti whu, o lele ilele ene riẹ jọ nọ a re se Pita, Jemis, Jọn, gbe Andru ta ẹme okenọ ae ọvo a jọ oria. Nọ Jesu ọ jẹ ta kpahe oka ọzino riẹ evaọ edẹ urere na, ọ tẹ nọ onọ jọ nọ u wuzou gaga inọ: “Kọ ginọ ono họ ọrigbo nọ a re fievahọ nọ o wo areghẹ na, ọnọ olori riẹ o ro mu inọ ọ rẹrote idibo uwou riẹ, re ọ rehọ emu kẹ ae evaọ ẹruoke?” (Matiu 24:3, 45; Mak 13:3, 4) Jesu ọ be rọ enẹ kẹ ilele riẹ imuẹro inọ ọyomariẹ nọ ọ rrọ “olori” rai na, ọ te rehọ ahwo jọ mu nọ a te hae kẹ ilele riẹ emu ẹme Ọghẹnẹ ẹsikpobi evaọ edẹ urere na. Ono họ ọrigbo nana?

      Ọrigbo na yọ utu osese jọ evaọ usu ilele Jesu nọ a rọ ẹzi wholo. “Ọrigbo” na họ Utu Ẹruorote ukoko Isẹri Jihova. Ọrigbo na ọ be rọ emu ẹme Ọghẹnẹ kẹ ahwo nọ aikpobi a gbẹ be gọ Jihova. Ọrigbo nana nọ a re fievahọ na ma rẹroso ẹsikpobi inọ ọ rẹ ‘kẹ omai emu evaọ ẹruoke.’​—Luk 12:42.

      Ọ be rẹrote uviuwou Ọghẹnẹ. (1 Timoti 3:15) Jesu ọ kẹ ọrigbo na iruo ilogbo nọ ọ be rọ rẹrote abọ ukoko Jihova nọ o rrọ otọakpọ obonẹ, koyehọ, ọ be rẹrote ekwakwa kpobi nọ a be rọ wha iruo Uvie na haro, be kpọ iruo usi uwoma ota na, je bi wuhrẹ omai evaọ iwuhrẹ ukoko mai. Fikiere, re “ọrigbo nọ a re fievahọ nọ o wo areghẹ na” ọ sae kẹ omai oware kpobi nọ ma gwọlọ evaọ ẹruoke, ọ be kẹ ahwo emu ẹme Ọghẹnẹ ẹkwoma ebe nọ ma be rọ ta usi uwoma nọ o bi kere, jegbe iwuhrẹ ukoko gbe ikokohọ nọ ọ be ruẹrẹhọ.

      Ọrigbo na o bi dhesẹ nọ a re fievahọ iẹe evaọ oghẹrẹ nọ o bi ro wuhrẹ eware nọ e rrọ Ebaibol na je bi ru iruo usi uwoma ota nọ a kẹ riẹ na, yọ o wo areghẹ evaọ oghẹrẹ nọ ọ be romatotọ rẹrote ekwakwa Kristi nọ e rrọ otọakpọ na. (Iruẹru Ikọ 10:42) Jihova ọ be ghale iruo ọrigbo na, keme o bi ru re ahwo buobu a kurẹriẹ ziọ ukoko na, je bi fiobọhọ kẹe rehọ oghoghẹrẹ emu ẹme Ọghẹnẹ kuọ omai ziezi.​—Aizaya 60:22; 65:13.

      • Ono Jesu o ro mu re ọ rọ ẹme Ọghẹnẹ wuhrẹ ilele riẹ?

      • Oghẹrẹ vẹ ọrigbo na ọ rọ rrọ ohwo nọ a re fievahọ je wo areghẹ?

Ebe Isoko Kpobi (1992-2025)
Noi No
Rueva
  • Isoko
  • Vi Ei Se Omọfa
  • Ru Ei Fihọ Oghẹrẹ nọ O Were Owhẹ
  • Copyright © 2025 Watch Tower Bible and Tract Society of Pennsylvania
  • Izi Kpahe Eroruiruo Evuẹ Na
  • Izi Oria Evuẹ Omobọ Ra
  • Esẹtini Oria Evuẹ Omobọ Ra
  • JW.ORG
  • Rueva
Vi Ei Se Omọfa