Odẹ ofuafo Ọghẹnẹ a ro se Ọgwa Uvie Isẹri Jihova kpobi. Fikiere, Ọgwa Uvie mai nọ ma re ru fuafo tẹtẹtẹ jẹ ruẹrẹ eria nọ e jariẹ raha, yọ uvẹ-ọghọ, o tẹ jẹ rrọ abọjọ egagọ mai nọ u wuzou gaga. Onana yọ oware nọ ohwo kpobi ọ rẹ sai ru.

Fialoma via nọ ewuhrẹ ọ tẹ fa no re wha ru Ọgwa Uvie na fo. Oke kpobi nọ ewuhrẹ ọ tẹ fa no, inievo-emetẹ gbe erọ emezae a rẹ rọ evawere ru Ọgwa Uvie na fo. Evaọ ẹsiẹvo ẹkpoka, a rẹ romatotọ ru orufuọ evaọ Ọgwa Uvie na. Ọkpako ukoko hayo odibo oruiruo ọ rẹ rẹrote iruo na, jẹ nya lele omaa eware nọ i fo eruo evaọ Ọgwa Uvie na. Ohwo kpobi ọ rẹ sae fialoma via ru oware jọ, inievo jọ a re hwere, ririe, hayo wozẹ otuwou na, ririe ovu no eware, ruẹrẹ egbara na họ, ru oria ame-okuo na fo, ririe inwido hayo ighẹgbe na, ku erara kufiẹ, hayo ru otafe na fo jẹ gbẹ ẹbe ighẹ na. O tẹ kawo evaọ ẹsiẹvo ẹgbukpe, a re fi ẹdẹ jọ họ nọ a re ro ru orufuọ ologbo jọ. Ma tẹ be wha emọ mai lele oma kpohọ orufuọ otiọnana, yọ ma bi wuhrẹ ae epanọ a re ro wo adhẹẹ kẹ eria egagọ mai.​—Ọtausiuwoma Na 5:1.

Fialoma via re who fiobọhọ ruẹrẹ eria nọ e raha. Kukpe kukpe, a rẹ romatotọ kiẹ Ọgwa Uvie na riwi, te obeva te otafe riẹ. Eware nọ a kiẹ via evaọ ọkiẹriwo na a re rri ro ru iruo aruẹrẹ re ọgwa na ọ jọ gbẹsinẹdẹ ẹsikpobi, a vẹ jẹ rọ ere whaha igho nọ a rẹ raha kufiẹ fiki abọgbekẹ. (2 Iruẹru-Ivie 24:13; 34:10) Ọgwa Uvie nọ ọ rrọ fuafo nọ a be rẹrote ziezi yọ oria nọ u kiehọ nọ ma rẹ jọ gọ Ọghẹnẹ. Ma tẹ be fialoma via kẹ iruo nana, u re dhesẹ nọ ma you Jihova je se oria egagọ mai gboja. (Olezi 122:1) Onana o rẹ jẹ jọ emamọ oriruo kẹ ahwo ẹwho na.​—2 Ahwo Kọrint 6:3.

• Fikieme ma gbe gbabọkẹ oria egagọ mai hi?

• Eruẹrẹfihotọ vẹ e riẹ nọ a re ro ru Ọgwa Uvie fo?

Kọ o te were owhẹ re who ru ekiakiẹ nọ i re fiobọhọ kẹ owhẹ gbe wo eriariẹ Ebaibol ziezi? Kọ whọ gwọlọ riẹ oware nọ a ta kpahe oria jọ Ebaibol na, ohwo, ẹwho, hayo oware jọ nọ a fodẹ evaọ Ebaibol na? Hayo kọ u bi gbe owhẹ unu sọ Ẹme Ọghẹnẹ ọ sai fiobọhọ kẹ owhẹ ku ẹbẹbẹ jọ nọ who wo họ? O tẹ rrọ ere, whọ rẹ sai ru ekiakiẹ evaọ oria-ebe nọ o rrọ Ọgwa Uvie na.

Whọ rẹ jariẹ ruẹ eware buobu nọ who re ro ru ekiakiẹ. O sae jọnọ who wo ebe Isẹri Jihova kpobi evaọ ẹvẹrẹ ra ha. Rekọ whọ rẹ jọ oria-ebe nọ o rrọ Ọgwa Uvie na ruẹ ebe ekpokpọ mai buobu. Whọ sae jẹ jariẹ ruẹ Ebaibol efa sa-sa nọ amọfa a fa, emamọ obe-ofeme, gbe eware ekiakiẹ efa buobu. Whọ rẹ sae jọ oria-ebe na ru ekiakiẹ kẹ omara taure ewuhrẹ o te ti muhọ hayo nọ o te kuhọ no. Otẹrọnọ ekọmputa ọ rrọ oria-ebe na, ẹsejọhọ whọ te jọ eva riẹ ruẹ Watchtower Library. Onana yọ oware nọ o rrọ eva ekọmputa nọ whọ rẹ jọ ruẹ ebe mai buobu, yọ u wo oria nọ whọ rẹ sai kere ẹme fihọ rọ gwọlọ uzoẹme jọ, ugogo ẹme jọ, hayo oria ikere jọ ababọ oke-oraha.

U re fiobọhọ kẹ emọ-isukulu nọ i re ru ẹme evaọ Ewuhrẹ Uzuazọ gbe Usi Uwoma Ota na. Whọ sae jọ oria-ebe Ọgwa Uvie na ru ekiakiẹ nọ whọ tẹ be ruẹrẹ ẹme ra kpahe. Ọsẹro Ewuhrẹ Uzuazọ gbe Usi Uwoma Ota na họ ọnọ ọ rẹ rẹrote oria-ebe na. Ọye ọ rẹ ruẹ nọ a fi ebe ekpokpọ kpobi họ eva oria-ebe na, jẹ ruẹ nọ a ruẹrẹ e rai họ ziezi. Ọye hayo oniọvo nọ o bi wuhrẹ Ebaibol kugbe owhẹ ọ rẹ sai dhesẹ oghẹrẹ nọ whọ rẹ rọ ruẹ evuẹ nọ whọ be gwọlọ kẹ owhẹ. Rekọ, ohwo ọvo ọ rẹ tọlọ ebe nọ e rrọ oria-ebe na no Ọgwa Uvie na kpo ho. Yọ u fo nọ ma rẹ rẹrote ebe na ziezi, ma re kere eme hayo si usi fihọ ae vievie he.

Ebaibol ọ ta nọ re ma sai “duku eriariẹ Ọghẹnẹ,” u re no omai eva ze re ma kiẹ gwọlọ iẹe “wọhọ ekwakwa-aghae nọ a ko dhere.” (Itẹ 2:1-5) Whọ rẹ sae jọ oria-ebe nọ o rrọ Ọgwa Uvie mu ekiakiẹ họ eru kẹ omara.

• Didi eware nọ a sai ro ru ekiakiẹ e rrọ oria-ebe Ọgwa Uvie na?

• Ono ọ rẹ sai fiobọhọ kẹ owhẹ riẹ oghẹrẹ nọ whọ sae rọ ruẹ evuẹ nọ whọ gwọlọ evaọ oria-ebe na?

Jesu ọ ta kẹ ilele riẹ nọ: “Jọ elo rai o lo evaọ iraro ahwo, re a ruẹse ruẹ iruo iwoma rai, a vẹ rọ oruaro kẹ Ọsẹ rai nọ ọ rrọ obọ idhiwu na.” (Matiu 5:16) Fiki onana, ma be rọ eware nọ a bi ku evaọ ọgbọna ru iruo evaọ emamọ edhere, onọ u kugbe Itanẹte. Oria evuẹ mai evaọ Itanẹte nọ a re se jw.org họ ugogo oria Itanẹte nọ whọ sae jọ ruẹ evuẹ kpahe eware nọ Isẹri Jihova a rọwo gbe iruẹru rai. Eware vẹ e rrọ eva riẹ?

Iyo enọ nọ ahwo a rẹ nọ gaga nọ a kẹ no Ebaibol ze. Whọ rẹ sae jọ oria evuẹ na ruẹ iyo enọ jọ nọ i wuzou gaga nọ ahwo a nọ no. Wọhọ oriruo, ma jọ oria evuẹ mai na wo emebe-evẹvẹ na, Kọ Uye-Oruẹ U ti Kuhọ Ẹdẹ Jọ? gbe Kọ Ahwo nọ A Whu no A Sae Ginẹ Wariẹ Ziọ Uzuazọ? evaọ evẹrẹ nọ i bu vi egba ihrẹ (700). Whọ rẹ sae jẹ jariẹ ruẹ Ebaibol Efafa Akpọ Ọkpokpọ na evaọ evẹrẹ nọ i bu vi udhuhrẹ-gbikpe (150) gbe ebe nọ ma re ro ru uwuhrẹ Ebaibol kugbe ahwo, obe wọhọ, Eme Ebaibol na Ọ rẹ Sai Wuhrẹ Omai? gbe Uwou-Eroro Na avọ Awake! ekpokpọ kpobi. Whọ rẹ sae jọ oria evuẹ mai na se hayo gaviezọ kẹ ibuobu ebe nana hayo danlodu rai kẹ omara evaọ MP3, PDF, hayo EPUB. Whọ sai tube printi umutho ewẹ-ebe jọ nọ whọ sae rọkẹ ohwo nọ o dhesẹ isiuru kpahe ovuẹ mai evaọ ẹvẹrẹ riẹ. Whọ rẹ jẹ ruẹ ebe mai nọ a ru fihọ ividio evaọ evẹrẹ obọ rọ t’ẹme buobu. Whọ rẹ sae danlodu isase Ebaibol nọ a ru wọhọ edrama, edrama nọ a si ikuigbe rai no Ebaibol ze, gbe ile ukoko na nọ whọ rẹ sai kporo evaọ okenọ o were owhẹ.

Whọ rẹ ruẹ ikuigbe uzẹme kpahe Isẹri Jihova. Whọ rẹ jẹ jariẹ ruẹ iyẹrẹ eware nọ e via kẹle na gbe ividio ekpẹkpẹe nọ e ta kpahe iruo akpọ-soso mai, eware nọ e via nọ i kpomahọ Isẹri Jihova, gbe iruo ogbodhẹ mai nọ okpẹtu o tẹ via. Whọ rẹ ruẹ ideti gbe edẹ eria nọ ma re jo kpohọ ikokohọ gbe adrẹse iwou ogha mai.

Ma be rehọ ẹkwoma idhere nana ru elo uzẹme na lo te eria nọ e mai siomano evaọ otọakpọ na. Ahwo nọ a rrọ unuakpọ kpobi a bi wo erere vọvọ no iruẹru mai ze, makọ enọ e rrọ unuakpọ nọ a re se Antarctica, nọ u thabọ gaga jẹ rrọ dhedhẹ gaga. Ma be lẹ nọ ajọ “ẹme Jihova o gbe do ruọ oria kpobi vẹrẹ vẹrẹ” evaọ otọakpọ na soso, onọ o rẹ wha oruaro se Ọghẹnẹ.​—⁠2 Ahwo Tẹsalonika 3:⁠1.

• Ẹvẹ jw.org o bi ro fiobọhọ kẹ ahwo buobu wuhrẹ kpahe iwuhrẹ uzẹme Ebaibol na?

• Eme whọ te gwọlọ nọ whọ rẹ kiẹ kpahe evaọ oria evuẹ mai na?