Oma Rọkẹ Oka ọ Ava 17

OKA NỌ O RỌ AVA 17 MUHỌ

Ole avọ 31 gbe Olẹ

□ Uwuhrẹ Ebaibol Ukoko:

jl ẹwẹ. 3 gbe Uwuhrẹ 1-2 (Iminiti 30)

□ Isukulu Odibọgba Esuo-Ọghẹnẹ:

Isase Ebaibol: Emuhọ 29-31 (Iminiti 10)

Ẹme 1: Emuhọ 29:21-35 (Iminiti 4 hayo kpẹre viere)

Ẹme 2: Usiwo Igbunu Oke Nana U Wo Ọjẹrehọ Ọghẹnẹ Hẹ—td 40C (Iminiti 5)

Ẹme 3: Ẹmeoyo Ọ rẹ Thọ Owhẹ—lr uzou 7 (Iminiti 5)

□ Ewuhrẹ Odibọgba:

Ole avọ 92

Iminiti 10: Ẹvẹ Ma Ru Te? Ẹme nọ a rẹ kpahe fihọ nọ ọsẹro usiuwoma ota o re ru. Vuẹ inievo na eria nọ a ghale Usi Uvie avọ 38 na te evaọ ẹkwotọ usiuwoma ota rai. Nọ ogbotu na re a fodẹ irere nọ a wo evaọ etoke nọ a rọ ghale Usi Uvie na, jẹ nọ ae re a gbiku emamọ iyẹrẹ nọ a wo.

Iminiti 5: Kọ Whọ be rọ jw.org na Ruiruo Evaọ Usiuwoma? Ẹme nọ a rẹ kpahe fihọ. Nọ inievo na re a ta kpahe epanọ a rọ rehọ Oria Evuẹ jw.org na ro ruiruo no evaọ usiuwoma. Tuduhọ inievo na awọ re a rehọ uvẹ kpobi nọ u rovie fihọ ro fi obọ họ kẹ ahwo riẹ kpahe oria evuẹ mai na.

Iminiti 15: “Ru re Ezi Ekareghẹhọ Nana O Jọ Oke Oghọghọ.” Enọ gbe iyo. Nọ inievo nọ e gwọlọ ru ọkobaro obufihọ dede nọ oma o ga rai tere he hayo iruo rai e rẹ kẹ ae uvẹ hẹ re a fodẹ inwene nọ a ti ru re a sai ru ọkobaro na. Nọ wha tẹ rrọ edhe-ẹme avọ 3 na, zizie ọsẹro usiuwoma ota na re ọ fodẹ edẹ nọ a te hai kpohọ usiuwoma gbe oria nọ a te hae jọ kuomagbe evaọ Asa, Ane, gbe Asoi.

Ole avọ 8 gbe Olẹ

Ru re Ezi Ekareghẹhọ Nana O Jọ Oke Oghọghọ

1. Edhere vẹ ma sai ro wo evawere ziezi evaọ ezi Ekareghẹhọ nana?

¹ Kọ whọ gwọlọ wo oghọghọ ziezi evaọ amara Asa, Ane, gbe Asoi? Edhere jọ nọ whọ sai ro ru ere họ, usiuwoma ota na nọ whọ rẹ jọ w’obọ ziezi, yọ whọ sai tube ru ọkobaro obufihọ dede. Ẹvẹ whọ sai ro wo evawere ziezi no onana ze?

2. Ẹvẹ obọ nọ ma re wo ziezi evaọ usiuwoma o rẹ rọ kẹ omai oghọghọ?

² Wo Oghọghọ Ziezi: Jihova ọ ma omai re ma wo evawere nọ ma tẹ be gọe je wo emamọ usu kugbei. (Mat. 5:3) Ọ tẹ jẹ ma omai re ma wo evawere nọ ma te bi ru eware ezi kẹ amọfa. (Iruẹru 20:35) Usiuwoma ota na u re fi obọ họ kẹ omai wo emamọ usu kugbe Ọghẹnẹ je fi obọ họ kẹ amọfa. Fikiere, epanọ ma w’obọ te evaọ iruo na, ere ma re wo oghọghọ te re. U te no ere no, epanọ ma ta usiuwoma te, ere ma re wo onaa te re. Yọ onaa nọ ma wo u re ru omai ta usiuwoma na ududu ababọ ozọ. Uvẹ sa-sa u ti rovie fihọ kẹ omai nọ ma rẹ rọ ta usiuwoma je mu uwuhrẹ Ebaibol họ kugbe ahwo. Enana kpobi e rẹ kẹ omai evawere evaọ usiuwoma ota na.

3. Fikieme amara Asa gbe Ane e rọ rrọ etoke obọdẹ nọ ma sai ro ru ọkobaro obufihọ?

³ Amara Asa gbe Ane yọ etoke obọdẹ nọ ma sai ro ru ọkobaro obufihọ keme ma rẹ sae salọ euwa 30 hayo 50. Ofariẹ, no Ẹdẹ-Ọmaha, 22 Asa rite Ẹdọvo-Oka, 14 Ane nọ ma ti ro ru Ekareghẹhọ na, ma ti zizie ahwo ziọ Ekareghẹhọ na, yọ onana o te kẹ omai evawere. Oghọghọ o te jọ ukoko kpobi nọ a te rehọ “evevo” ghale ebe-uzizie na evaọ ẹkwotọ rai.—Zef. 3:9.

4. Whọ tẹ gwọlọ ru ọkobaro obufihọ, eme who re ru?

⁴ Ruẹrẹ Oma Kpahe Enẹna: Otẹrọnọ whọ re ma omaa ha, romatotọ kiẹ omaa ra riwi re whọ riẹ inwene nọ whọ rẹ sai ru re who wo uvẹ ta usiuwoma ziezi evaọ amara ọvo, hayo bu vi ere. Fi ei họ olẹ. (Jem. 1:5) Rehọ iẹe jiroro kugbe uviuwou ra gbe amọfa evaọ ukoko na. (Itẹ 15:22) Who ti wo evawere no ọkobaro obufihọ nọ who ti ru ze, o tẹ make rọnọ oma o ga owhẹ hẹ hayo iruo ra e rẹ k’owhẹ uvẹ hẹ.

5. Nọ ma tẹ jọ ezi Ekareghẹhọ nana w’obọ ziezi evaọ usiuwoma ota na, eme o ti noi ze?

⁵ Jihova ọ gwọlọ nọ idibo riẹ a wo evawere. (Ol. 32:11) Nọ ma tẹ jọ ezi Ekareghẹhọ nana w’obọ ziezi evaọ usiuwoma ota na, ma ti wo oghọghọ ulogbo. Yọ maero na, eva e te were Jihova, Ọsẹ obọ odhiwu mai.—Itẹ 23:24; 27:11.