Idibo Ọghẹnẹ A Wọhọ Ire Evaọ Oghẹrẹ Vẹ?

NỌ Ọ jẹ ta kpahe ohwo nọ o wo isiuru kpahe ehri-izi Ebaibol je bi fi ai họ iruo evaọ uzuazọ riẹ, ọso-ilezi na ọ ta nnọ: “Ọ rẹ te jọ wọhọ ure nọ a kọ họ akotọ ame, nọ o rẹ mọ ubi evaọ ezi riẹ, ebe riẹ i re lo gbe he. Koware koware nọ o ru, u re woyei obọ.” (Olezi 1:1-3) Fikieme ẹwawọ nana o ro fo?

Ire e rẹ tọ gaga. Wọhọ oriruo, a ta inọ ire olivi jọ evaọ ofẹ Mediterenia na i kri te ikpe odu ọvo hayo ivẹ no. Epọvo na re, ire baobab nọ e rrọ ofẹ udevie Africa e rẹ tọ gaga, yọ a ta nnọ ure nọ a re se bristlecone pine evaọ obọ California o tọ te ikpe 4,600 no. Evaọ owhawho, ire ilogbo e rẹ jọ erere kẹ okegbe rai. Wọhọ oriruo, ire ithethei e rẹ kẹ ire eboba na edhedhẹ, yọ ebe nọ i re kie no ire na ze e rẹ lẹliẹ otọ na wou eware.

Ire nọ e mai theri evaọ akpọ na a rẹ rue rai nọ e be rro kugbe evaọ ewhawho, oria nọ ire na e rẹ jọ tha ohwohwo uke. Nọ awọ rai e rẹ whaliẹ ohwohwo na, ire buobu nọ e rrọ kugbe e rẹ kaki vurie he okenọ okpofou o te fo, wo ohẹriẹ no ure ovo nọ u dikihẹ goli evaọ ogẹ. Awọ riẹ nọ e rẹ jọ ruaro e rẹ jẹ lẹliẹ ure wo ame gbe emu ziezi no otọ na ze. Evaọ ẹsejọ, awọ ure nọ e rrọ obotọ na e rẹ sai tube theri vi oma ure na dede, hayo ẹkẹtẹkẹ awọ ure na o rẹ kẹre vi egha ure na.

O sae jọ nọ ire Pọl ukọ na ọ jẹ ta kpahe nọ ọ ta nnọ Ileleikristi a re ‘yeri uzuazọ rai wọhọ Kristi, tawọ mu ei re a dikihẹ eva riẹ re ẹrọwọ rai ọ ga.’ (Ahwo Kọlọsi 2:6, 7) Evaọ uzẹme, Ileleikristi a sae jọ gaga evaọ ẹrọwọ rai otẹrọnọ a t’owọ mu Kristi wọhọ epanọ ure o rẹ t’awọ mu otọ na.—1 Pita 2:21.

Idhere vẹ a sae rọ rehọ idibo Ọghẹnẹ ro dhesẹ ire? Whaọ, wọhọ epanọ ire nọ e rrọ owhawho i re fi obọ họ kẹ omoma rai na, ere enọ e talamu ukoko Ileleikristi na a re wo obufihọ mi ibe enọ e rọwo. (Ahwo Galesha 6:2) Ileleikristi ẹrọwọ nọ e kpako, fikinọ a wo awọ abọ-ẹzi nọ e kẹre ziezi, a bi fi obọ họ kẹ enọ i kurẹriẹ obọ re a dikihẹ ga evaọ ẹrọwọ na, makọ okenọ a tẹ rẹriẹ ovao ku ọwọsuọ nọ ọ wọhọ okpofou. (Ahwo Rom 1:11, 12) Ileleikristi ekpokpọ a rẹ sai ru ziezi evaọ otọ “edhedhẹ” idibo Ọghẹnẹ nọ e mai wo eriariẹ. (Ahwo Rom 15:1) Yọ ahwo ukoko Ileleikristi na kpobi evaọ akpọ na soso a bi wo erere no emu abọ-ẹzi nọ ọ rẹ kẹ erri nọ “ire-ọkaa ẹrẹreokie” na, okiọkotọ nọ a wholo na, a be kẹ.—Aizaya 61:3.

Ẹvẹ o rrọ urirẹ te inọ idibo Ọghẹnẹ kpobi a wo irẹro ewo orugba eyaa nọ e rrọ Aizaya 65:22 na, onọ o ta nọ: “Epanọ ire e rẹ tọ te na ere ahwo mẹ a rẹ te tọ te.”

‘Ọrigbo’ Nọ O Wo Ẹrọwọ Avọ Areghẹ

‘Ono họ ọrigbo nọ o wo ẹrọwọ avọ areghẹ na ọnọ olori riẹ o fihọ, inọ o rri uwou riẹ?’—MATIU 24:45.

1, 2. Fikieme o rọ r’oja re ma wo emu abọ-ẹzi ikẹse kẹse nẹnẹ?

EVAỌ uvo Edivẹ-Oka, Nisan 11, 33 C.E., ilele Jesu a nọ onọ jọ nọ u wo otofa ulogbo k’omai nẹnẹ. A nọ riẹ nọ: “Eme ọ rẹ te jọ oka ẹtha ra gbe urere akpọ na?” Evaọ uyo, Jesu ọ fodẹ eruẹaruẹ igbunu jọ. Ọ t’ẹme kpahe etoke ẹvohẹ ọrọ emo, ohọwo, etọ nọ i ti nuhu, gbe ẹyao. Yọ oyena o rẹ te jọ “emuhọ uye na” gheghe. Eware i ti yoma viere. Ẹvẹ iroro oyena o rrọ idudu te!—Matiu 24:3, 7, 8, 15-22; Luk 21:10, 11.

² Anwọ 1914, abọ buobu ọrọ eruẹaruẹ Jesu na i rugba no. Ahwo-akpọ a be rọ ẹro ruẹ “uye” gaga. Ghele na, Ileleikristi uzẹme a re du dhozọ họ. Jesu ọ yeyaa inọ ọ te rehọ obọdẹ emu abọ-ẹzi rọ ko ai. Nọ Jesu ọ rrọ obọ odhiwu enẹna, ẹvẹ ọ rọ gbẹ edhere k’omai no evaọ otọakpọ obonẹ re ma wo emu abọ-ẹzi mai?

3. Didi eruẹrẹfihotọ Jesu o ru no re ma wo ‘emu eva ẹruoke’?

³ Jesu omariẹ ọ riẹ obọ họ uyo onọ yena. Okenọ ọ jẹ ta eruẹaruẹ ilogbo riẹ, ọ nọ inọ: ‘Kọ ono họ ọrigbo nọ o wo ẹrọwọ avọ areghẹ na ọnọ olori riẹ o fihọ, inọ o rri uwou riẹ, re nọ oke u te ọ rehọ emu kẹ ae?’ Kẹsena, ọ tẹ ta nọ: “[Ọrigbo] nọ olori riẹ ọ rẹ nyatha o di ei họ e re eruo o wo oghale. Uzẹme mẹ ta kẹ owhai, ọ rẹ te rehọ iẹ e mu uzou eware riẹ kpobi.” (Matiu 24:45-47) Ẹhẹ, a te rehọ “ọrigbo” jọ mu re ọ rehọ emu abọ-ẹzi kẹ, “ọrigbo” nọ o ti wo ẹrọwọ avọ areghẹ. Kọ ọrigbo ọyena yọ omọvo jọ, omomọvo nọ ọ be hae rehọ ẹta omọfa evaọ etoke sa-sa, hayo kọ oware ofa? Nọ o rọnọ ọrigbo ẹrọwọ na ọ rẹ rehọ emu abọ-ẹzi nọ a gwọlọ gaga kẹ na, o rrọ isiuru mai re ma riẹ uyo na.

Omọvo Jọ Manikọ Utu-Ahwo?

4. Ẹvẹ ma rọ riẹ nnọ “ọrigbo nọ o wo ẹrọwọ avọ areghẹ na” ọ sae jọ omọvo jọ họ?

⁴ ‘Ọrigbo nọ o wo ẹrọwọ avọ areghẹ na’ ọ sae jọ omọvo ho. Eme jabọ? Keme ọrigbo na ọ te rehọ emu abọ-ẹzi kẹ evaọ ikpe-udhusoi ọsosuọ na, yọ wọhọ epanọ Jesu ọ ta, ọrigbo na o ti gbe ru ere evaọ okenọ Olori na ọ rọ nyaze evaọ 1914. Oyena u re dhesẹ nọ omọvo o re ru iruo na evaọ oware wọhọ ikpe 1,900. Makọ Methusẹla dede ọ rria kri te ere he.—Emuhọ 5:27.