Ẹyọrọ Emamọ Emọ—Kọ O Gbẹ Lọhọ?

“ENẸNA ma be rria okegbe ona, uruemu ọguakugbe, oria nọ emamọ uruemu nọ u fo o rọ họ,” ere Robert Glossop, ọrọ Ogbẹguae Uviuwou Vanier, Ottawa, Canada, o muẹrohọ. Eme o no rie ze no? Iyẹrẹ jọ evaọ obe-usi ọ The Toronto Star o ta nọ: “Edihọ emoha, ozighi izoge gbe ethuwhuo emoha i bi vihọ.”

Ẹbẹbẹ na o nya thabọ vrẹ Ẹkpẹlobọ-Ọre America. Bill Damon, ọnọ o bi su Ehri Ẹnyaharo Ohwo-Akpọ eva Brown University evaọ Rhode Island, U.S.A., ọ kiẹ ebẹbẹ enana no evaọ Britain gbe erẹwho Europe efa, je kugbe Australia, Izrẹl, gbe Japan. Ọ fodẹ ekiekpo ichọche, isukulu, gbe eria efa nọ e be sae kpọ emọ họ. Ọ ta nnọ, uruemu mai “u ku oware nọ emọ a gwọlọ fiẹ no re a ruẹse wo emamọ uruemu gbe ẹgba.” Be fodẹ ewena eyewọ enọ i wuhrẹ nọ “ọwhọkuo o rọ yoyoma kẹ omokpokpọ gbe ẹria ẹzi emọ,” Damon o sikẹ nọ onana “yọ uruemu nọ a rẹ rọ yọrọ emọ nọ i re keke aro fihọ ghẹmeeyo.”

Kọ eme izoge inẹnẹ a gwọlọ? A gwọlọ uwuhrẹ uyoyou onọ o rẹ kpọ iroro gbe udu na vi ẹsikpobi. Izoge sa-sa a gwọlọ ọwhọkuo sa-sa. Nọ uyoyou o tẹ rọ emu riẹ, a rẹ sae rọ iroro ejẹ kẹ ọwhọkuo. Oye jabọ a jẹ ta kẹ omai eva Itẹ 8:33 re ma ‘gaviezọ kẹ ọwhọkuo’ na. Rọ kẹ ejọ ‘ẹme unu gheghe o rẹ kpọ ai vi hi.’ Rọ kẹ ai, uye nọ u fo nọ a rẹ kẹ ai fiki aghẹmeeyo, onọ a rẹ rehọ uye nọ u fo rọ kẹ, u re fo. (Itẹ 17:10; 23:13, 14; 29:19) Evaọ ẹfodẹ ẹgwọlọ ọnana, orọnikọ Ebaibol na ọ be ta nọ a re mu ọmọ fa hayo a re kpei ukpe ogaga ha, onọ o rẹ sae fi ela hayo nwa ọmọ oma. (Itẹ 16:32) Ukpoye, ọmọ o re wo otoriẹ oware nọ a be rọ kpọe họ ọ vẹ jẹ riẹ nnọ fikinọ ọsẹ hayo oni na ọ rọ kugbei, ọrọ abọ riẹ.—Wawo Ahwo Hibru 12:6, 11.

Ohrẹ oliọliọ owoma Ebaibol otiọye na a t’ẹme tei evaọ obe na Edidi Evawere Uviuwou.