Ẹkpẹlobọ: Oniọvo-ọmọzae nọ a be gwọlọ mu fikinọ ọ jẹ ta usiuwoma evaọ obọ Eindhoven, Netherlands, 1945; Obọze: Kọ egọmeti e be kẹ owhai uvẹ ta usiuwoma na evaọ orẹwho nọ whọ rrọ?
ABỌ AVỌ 4
Obokparọ Uvie Na—A Ru Usi Uwoma na Dikihẹ Evaọ Abọ Egọmeti
DAE rehọ iẹe nọ whọ rrọ usiuwoma, nọ who rri emu, whọ tẹ jọ ugbo ruẹ omoto iporisi nọ ọ be dhẹ ze. Nọ whọ be ta usiuwoma kẹ ohwo jọ na, oniọvo nọ wha gbẹ rrọ usu ọ tẹ tẹrovi iporisi na keme o wọhọ nọ whai a be nya bru ze. Nọ a te owhai oma no, ọjọ evaọ usu rai ọ tẹ nọ owhai nọ: “Kọ whai họ ahwo nọ a be hae ta usiuwoma n’uwou ruọ uwou na? Ma yo nọ wha bi kpokpo ahwo gaga.” Wha te dhesẹ oma rai avọ adhẹẹ inọ whai yọ Isẹri Jihova. Kọ eme who roro nọ a ti ru owhai?
Oghẹrẹ nọ a rehọ Isẹri Jihova evaọ orẹwho rai u ti dhesẹ oware nọ a ti ru owhai. Anwọ ikpe jọ ze na, oghẹrẹ ubiẹro vẹ egọmeti orẹwho rai o bi ro rri Isẹri Jihova? Kọ a be kẹ owhai uvẹ gọ Ọghẹnẹ? O tẹ rrọ ere, kiyọ anwọ ikpe buobu ze na, ibe Ileleikristi ra a daoma gaga no re a thọ “usi uwoma na je ru ei dikihẹ evaọ abọ egọmeti.” (Fil. 1:7) Makọ oria kpobi nọ whọ rrọ kẹhẹ, nọ who te roro kpahe edhọ ekọto nọ Isẹri Jihova a jọ rease no, o rẹ bọ ẹrọwọ ra ga. Evaọ abọ nana ma te ta kpahe edhọ ekọto nana jọ. Edhọ ekọto nọ ma rease rai no i dhesẹ vevẹ nọ a ginẹ rehọ Uvie na mu no keme ma hae sae rọ ẹgba obọmai rease edhọ yena vievie he.