Uruemu nọ U n’Otọ Ze Gheghe Manikọ Udi-Ojẹ?

EVAỌ ekọleji Poland jọ, o rrọ uruemu emọ-isukulu na re a zọhọ igho dẹ ekẹ rọkẹ iticha rai, avọ irẹro inọ iticha na e te kẹ ae emake evaọ oke ẹdawọ. Agbẹta nọ Oleleikristi ọmoha jọ nọ a re se Katarzyna ọ rọ rẹriẹ ovao dhe ẹbẹbẹ na. O je roro nnọ: “Kọ mẹ jẹ ugho na, manikọ mẹ jẹ hẹ?” Ibe emọ-isukulu riẹ e ta kẹe nnọ: “Nọ uruemu nọ u n’otọ ze. O rẹ raha oware ovo ku owhẹ hẹ, ukpoye who re wo erere noi ze, fikiere, eme who bi ro wo avro?”

Katarzyna ọ ta nọ: “Uzẹme riẹ họ, ukpe ọsosuọ mẹ evaọ isukulu na, me fi obọ họ mi azọhọ na. Uwhremu na mẹ tẹ te riẹ nnọ udi-ojẹ me wo obọ kugbe na, oware nọ Ebaibol na e ghọ.” Ọ kareghẹhọ ikereakere jọ nọ i dhesẹ nnọ Jihova ọ ghọ udi-ojẹ gaga. (Iziewariẹ 10:17; 16:19; 2 Iruẹru-Ivie 19:7) Katarzyna ọ ta nọ: “Mẹ riẹ epanọ o lọhọ te re ohwo o kie kẹ otunyẹ ọhwa. Me roro ẹme na kpemu kparo, yọ no anwọ oke oyena ze, me gbe w’obọ kpahe uruemu nana ofa ha.” Evaọ ikpe esa nọ e vrẹ na, ghelọ ẹkoko nọ emọ-isukulu efa i je sei, ọ sai ru ei vẹ kẹ ejọ inọ o re w’obọ kpahe uruemu nana nọ a bi se azọhọ “okẹ” na ha fiki ẹrọwọ riẹ nọ o no Ebaibol na ze.

Ahwo jọ a ta kpahe Katarzyna nnọ o wo oriobọ gbe nnọ ọ gwọlọ ewoma amọfa ha. Ọ ta nọ: “Rite inẹnẹ ejọ i re gbolo ovao k’omẹ. Dede na, ibuobu i wo adhẹẹ kẹ eriwo mẹ, onọ o be lẹliẹ eva were omẹ.” A tẹ te riẹ Katarzyna wọhọ omọvo Isẹri Jihova, ọnọ o bi koko ehri-izi Ebaibol evaọ uzuazọ ekẹdẹ kẹdẹ.

Kọ Whọ Gwọlọ Dede Iweze Rehọ?

Makọ evaọ akpọ ukpokpoma ọnana dede, whọ rẹ sai wo evawere no eriariẹ egbagba Ebaibol kpahe Ọghẹnẹ ze, Uvie riẹ, gbe ẹjiroro igbunu riẹ kẹ ohwo-akpọ. Whọ tẹ gwọlọ dede evuẹ efa rehọ hayo whọ tẹ gwọlọ re ohwo jọ ọ nyaze ti ru uwuhrẹ Ebaibol ọvọvẹ kugbe owhẹ, iviena kere se Watch Tower, P.M.B. 1090, Benin City 300001, Edo State, Nigeria, hayo oria adrẹse nọ u fo evaọ ẹwẹ-obe avọ 2 na.