Anwọ edẹ esa ena nọ Jesu avọ ilele riẹ a ro no Jẹriko ziọ Bẹtani na. Kẹsena evaọ ohiohiẹ Nisan 10 nọ u kiehọ Ẹdọvo-Oka, a tẹ ruọ edhere bi kpobọ Jerusalẹm. Ohọo u bi kpe Jesu. Fikiere nọ ọ ruẹ ure ifigi, ọ tẹ nya sọ ọ te jariẹ ruẹ ifigi kọrọ. Kọ ọ ruẹ?

Whaọ oke nana o jọ ubrobọ urere amara Asa, yọ amara Azeza họ ezi ifigi. Rekọ, fikinọ ure na o kake whẹ ebe họ oma, Jesu o je roro nọ ẹsejọhọ ibi e te jariẹ. Nọ Jesu ọ nya te ure na, ọ ruẹ ifigi ọvuọvo ho. Dede nọ o whẹ ebe ekpokpọ họ oma, ubi ovo o rrọ ehru riẹ hẹ. Kẹsena Jesu ọ tẹ ta nọ: “Ohwo ọvo ọ rẹ gbẹ jọ ehru ra ruẹ ubi kọrọ re ofa ha.” (Mak 11:14) Ẹsiẹvo na, ure na u te muhọ elo no, yọ ilele na a ti wuhrẹ oware jọ no onana ze evaọ ohiohiẹ okiokiọ riẹ.

Jesu avọ ilele riẹ a te ti te Jerusalẹm. Jesu o te kpobọ etẹmpol na, onọ ọ nyai rri no vẹre evaọ uvo odẹnukpo. Evaọ inẹnẹ na, orọnikọ o bi rri etẹmpol na ọvo ho, o ru ọkpọ oware jọ nọ o ru evaọ ikpe esa nọ i kpemu evaọ ehaa Ọnyavrẹ ọrọ 30 C.E. (Jọn 2:14-16) Jesu o le “enọ e jẹ zẹ eware gbe enọ e jẹ dẹ evaọ etẹmpol na” ruọ otafe. O te je “gele emẹjẹ inwene-igho na kie gbe ekpala enọ e jẹ zẹ irueruẹ.” (Mak 11:15) Ọ tubẹ kẹ uvẹ hẹ re ahwo a wọ eware rai nya etẹmpol na vrẹ fikinọ edhere yena ọ mae kẹle nọ a re ro kpohọ abọdekọ ẹwho na.

Fikieme Jesu o ro ru ahwo nọ a je nwene igho gbe enọ e jẹ zẹ erao evaọ etẹmpol na ere? Ọ ta nọ: “Kọ a gbe kere inọ, ‘A re ti se uwou mẹ uwou olẹ rọkẹ erẹwho na kpobi’? Rekọ wha ru rie fihọ uwou iwhewheriwhe no.” (Mak 11:17) Oware nọ o lẹliẹ e riẹ se ai iwhewheriwhe na họ, a jẹ zẹ erao na ghare vrẹta kẹ ahwo nọ a be dẹ ae ro dhe idhe evaọ etẹmpol na. Jesu o rri uruemu utioye fihọ ofruriọ, hayo uji-utho.

Nọ ilori izerẹ na, otu ikere-obe, gbe ikpahwo rai a yo oware nọ Jesu o ru na, a tẹ be gwọlọ oghẹrẹ kpobi nọ a re ro kpei. Rekọ a wo ẹbẹbẹ jọ. A riẹ oghẹrẹ nọ a sai ro mu ei re a kpei hi keme ahwo na kpobi a bi su lele Jesu re a gaviezọ kẹe.

Ahwo nọ a ziọ ehaa Ọnyavrẹ na orọnikọ ahwo Ju ọvo ho rekọ te ahwo erẹwho efa nọ i kurẹriẹ ziọ egagọ ahwo Ju. Ahwo Griki jọ a jariẹ re, nọ a nyaze te gọ evaọ etoke ehaa na. Ahwo Griki na a tẹ nya bru Filip inọ a gwọlọ ruẹ Jesu, ẹsejọhọ fikinọ Filip o wo odẹ Griki a rọ nya bru rie na. Filip ọ nwane riẹ hẹ sọ u fo re ọ rehọ ae bru Jesu, fikiere ọ tẹ ta ẹme na kẹ Andru. Aimava a tẹ rọ ẹme na bru Jesu, yọ o wọhọ nọ oke yena Jesu ọ gbẹ rrọ etẹmpol na.

Jesu ọ riẹ nọ umutho edẹ jọ ọvo i kiọkọ re o whu, fikiere oke nana o rrọ oke nọ ọ rẹ rọ ruẹ ohwo kpobi nọ ọ gwọlọ ruẹ e riẹ hẹ. Ọ tẹ rọ ọtadhesẹ jọ ta ẹme kẹ ikọ ivẹ riẹ na, inọ: “Auwa na o te no nọ a rẹ rọ kẹ Ọmọ ohwo oruaro. Uzẹme uzẹme mẹ be ta kẹ owhai, ajokpanọ ubi ọka o re kie fihọ otọ o ve gbo, o gbẹ rrọ ere he, ubi ọka ọvo o rẹ gbẹ jọ; rekọ o te gbo, o vẹ mọ ibi buobu.”—Jọn 12:23, 24.

Ubi ọka ọvo u te oware ovo ho. Rekọ, nọ a tẹ kọe fihọ otọ, u je “gbo” no o vẹ dhẹze, kẹsena o vẹ mọ eka buobu. Epọvo na re, Jesu yọ ohwo ọgbagba ọvo. O te kru ẹrọwọ riẹ te uwhu, ahwo buobu nọ a se uzuazọ rai gb’oware he fikinọ a gwọlọ ru oreva Ọghẹnẹ a te rọ ẹkwoma riẹ wo uzuazọ ebẹdẹ bẹdẹ. Oye o soriẹ nọ Jesu ọ rọ ta nọ: “Ohwo kpobi nọ o you uzuazọ riẹ ọ te raha iẹe kufiẹ, rekọ ohwo kpobi nọ o mukpahe uzuazọ riẹ evaọ akpọ nana ọ te rọ ere sẹro riẹ kẹ uzuazọ ebẹdẹ bẹdẹ.”—Jọn 12:25.

Orọnikọ Jesu o bi roro kpahe omobọ riẹ ọvo ho, ọ ta nọ: “Otẹrọnọ ohwo jọ ọ rẹ gbodibo kẹ omẹ, jọ o lele omẹ, oria nọ mẹ rrọ etẹe ọgbodibo mẹ ọ rẹ jọ re. Otẹrọnọ ohwo jọ ọ rẹ gbodibo kẹ omẹ, Ọsẹ na o ti bru ọghọ họ iẹe oma.” (Jọn 12:26) Oghale riẹ o rro kẹhẹ. Ahwo nọ Ọsẹ na o ti bru ọghọ họ oma na a ti lele Jesu su evaọ Uvie na.

Nọ Jesu o roro kpahe uye nọ o be te bẹe gbe uwhu oja nọ o bi ti whu, ọ tẹ ta nọ: “Whaọ, mẹ be rova, kọ eme mẹ rẹ ta? Ọsẹ, siwi omẹ no auwa nana.” Rekọ Jesu ọ gwọlọ siọ oreva Ọghẹnẹ ba erugba ha. O fibae nọ: “Ghele na, fiki onana me ro te auwa nana.” (Jọn 12:27) Jesu ọ whobọhọ ọruẹrẹfihotọ Ọghẹnẹ kpobi, makọ uwhu nọ o bi ti whu na..

Nọ Jesu ọ jọ etẹmpol na evaọ Nisan 10 nọ o rrọ Ẹdọvo-Oka, ọ jẹ ta kpahe uwhu riẹ nọ u t’otọ no na. Jesu ọ jẹ ruawa kpahe epanọ onana u ti ro kpomahọ odẹ Ọghẹnẹ, ọ ta nọ: “Ọsẹ, kẹ odẹ ra oruaro.” Kẹsena urru ulogbo jọ u te do no obọ odhiwu ze inọ: “Mẹ kẹ riẹ oruaro no yọ mẹ te wariẹ kẹe oruaro.”—Jọn 12:27, 28.

Akpọ o gbe ahwo nọ a jọ etẹe kpobi unu. Ejọ i je roro nọ edo egbrara a yo na. Amọfa a tẹ ta nọ: “Ukọ-odhiwu ọ ta ẹme kẹe.” (Jọn 12:29) Rekọ urru Jihova a yo na. Yọ onana họ orọ ọsosuọ nọ ahwo a bi ro yo urru Ọghẹnẹ hẹ nọ ọ be ta ẹme no obọ odhiwu ze fiki Jesu.

Ikpe esa gbe emerae ezeza nọ i kpemu nọ Jesu ọ jẹ họ-ame, Jọn Ọhọahwo-Ame na o yo urru Ọghẹnẹ nọ ọ ta kpahe Jesu nọ: “Ọnana họ Ọmọ mẹ, oyoyou mẹ na, ọnọ mẹ jẹrehọ.” Uwhremu na, nọ a ru ehaa Ọnyavrẹ ọrọ 32 C.E. no, Jesu ọ rẹriẹ evaọ iraro Jemis, Jọn, gbe Pita. Ẹdẹ nọ Jesu ọ rọ rẹriẹ na, ezae esa yena a yo urru Ọghẹnẹ nọ o ta nọ: “Ọnana họ Ọmọ mẹ, oyoyou mẹ na, ọnọ mẹ jẹrehọ. Wha gaviezọ kẹe.” (Matiu 3:17; 17:5) Rekọ, evaọ orọ avọ esa nọ Jihova ọ rọ ta ẹme ze na, ahwo buobu a yo urru riẹ.

Jesu ọ ta nọ: “Orọnikọ fiki mẹ urru nana u ro do na ha rekọ fiki rai.” (Jọn 12:30) U dhesẹ vevẹ nọ Jesu yọ Ọmọ Ọghẹnẹ, Mesaya nọ a ruẹaro riẹ na.

Uzuazọ ẹgbakiete nọ Jesu o yeri yọ emamọ oriruo nọ u fo nọ ahwo a rẹ rọ aro kele, u te je dhesẹ nọ u fo nọ a rẹ raha Setan Ẹdhọ na no, ọnọ ọ be kpọ iruẹru akpọ na. Jesu ọ ta nọ: “Whaọ a bi gu akpọ nana ẹdhọ enẹna; yọ a ti le osu akpọ nana no.” Orọnikọ uwhu nọ Jesu o bi ti whu na u dhesẹ ekie vievie he, rekọ obokparọ. Evaọ oghẹrẹ vẹ. Jesu o ru ẹme na vẹ nọ: “Nọ a tẹ kpare omẹ kpehru no otọakpọ na no, me ti si oghẹrẹ ahwo kpobi bru omamẹ.” (Jọn 12:31, 32) Ẹkwoma uwhu nọ Jesu o ti whu evaọ ure na, o ti si amọfa lele oma, onọ u ti rovie edhere uzuazọ ebẹdẹ bẹdẹ kẹ ae.

Nọ Jesu ọ ta nọ a te ‘kpare iẹe kpehru,’ ogbotu na ọ tẹ ta nọ: “Ma jọ Uzi na yo inọ Kristi na ọ rẹ jọ bẹdẹ bẹdẹ. Kọ ẹvẹ whọ be rọ ta nọ a te kpare Ọmọ ohwo kpehru? Ono họ Ọmọ ohwo nana?” (Jọn 12:34) Dede nọ a ruẹ eware igbunu buobu, je yo urru Ọghẹnẹ nọ o ta ẹme no obọ odhiwu ze, ibuobu rai a rọwo nọ Jesu họ uvi Ọmọ ohwo ho, Mesayanọ a ya eyaa riẹ na.

Jesu ọ tẹ wariẹ ta ẹme jọ nọ ọ ta no vẹre inọ ọye họ “elo” na. (Jọn 8:12; 9:5) Ọ ta kẹ ogbotu na nọ: “Elo na ọ te gbẹ jọ kugbe owhai evaọ omoke. Wha nya nọ wha wo elo na, re ebi ọ siọ owhai ba eruru . . . Nọ wha wo elo na, wha fi ẹrọwọ họ elo na, re wha sae jọ emọ elo.” (Jọn 12:35, 36) Nọ Jesu ọ ta eme nana no, o te siomano keme Nisan 10 họ ẹdẹ nọ o ti ro whu hu. Ehaa Ọnyavrẹ nọ o te jọ Nisan 14 a te rọ “kpare” Jesu kpehru, nọ a te rọ tehe iẹe fihọ ure.—Ahwo Galesha 3:13.

Nọ ma te roro kpahe iruo odibọgba Jesu, ma rẹ ruẹ vevẹ nọ ẹrọwọ nọ ahwo Ju a fihọ Jesu hu na yọ orugba eruẹaruẹ. Aizaya ọ ruẹaro nọ ahwo a te rọ ibiaro rai ruẹ ude he, a ti ru udu rai gaga, yọ a ti kurẹriẹ gbe he re a sai siwi ai. (Aizaya 6:10; Jọn 12:40) Ẹhẹ, ahwo Ju buobu a siọ imuẹro nọ i dhesẹ nọ Jesu họ Osiwi nọ a ya eyaa riẹ na, ọnọ a te rọ ẹkwoma riẹ wo uzuazọ na.

Nikodimọs, Josẹf ohwo Arimatia, gbe isu efa buobu a “fi ẹrọwọ họ” Jesu. Kọ a ti dhesẹ ẹrọwọ rai via manikọ a ti si uke kpemu fiki ozọ inọ a ti le ai no uwou-egagọ na hayo fikinọ a “you oruaro nọ u re no obọ ahwo-akpọ ze”?—Jọn 12:42, 43.

Jesu ọ fodẹ oware nọ ohwo nọ o fi ẹrọwọ họ iẹe o re ru nọ ọ ta nọ: “Ohwo kpobi nọ o fi ẹrọwọ họ omẹ, orọnikọ mẹ ọvo o fi ẹrọwọ họ họ, rekọ te ọnọ o vi omẹ ze; yọ ohwo kpobi nọ ọ ruẹ omẹ ọ ruẹ Ọnọ o vi omẹ ze re.” Eme nọ Ọghẹnẹ ọ ta kẹ Jesu nọ o ro wuhrẹ ahwo nọ Jesu o bi whowho na i wuzou gaga, oyejabọ nọ Jesu ọ rọ ta nọ: “Ohwo kpobi nọ o rri omẹ vo nọ ọ jẹ eme mẹ rehọ họ, ọjọ ọ rrọ nọ o ti brukpei. Eme nọ mẹ ta eye i ti brukpei evaọ ẹdẹ urere na.”—Jọn 12:44, 45, 48.

Kẹsena Jesu o te ku ẹme na họ nọ: “Keme orọnikọ eme obọmẹ mẹ be ta ha, rekọ Ọsẹ na ọnọ o vi omẹ ze ọ kẹ omẹ ujaje kpahe ẹme nọ mẹ rẹ ta gbe onọ me re wuhrẹ. Yọ mẹ riẹ nọ ujaje riẹ o rẹ kẹ uzuazọ ebẹdẹ bẹdẹ.” (Jọn 12:49, 50) Jesu ọ riẹ nọ uviemenẹ ọ te rọ uzuazọ riẹ dhe idhe ro siwi ahwo kpobi nọ i fi ẹrọwọ họ iẹe.—Ahwo Rom 5:8, 9.