Ẹrria te Omaromudhe Mai

¹ Makọ whọ họ-ame obọ hayo ikpe buobu nọ i kpemu no, ẹsejọhọ whọ be kareghẹhọ oware oka yena evaọ uzuazọ ra. Ame-ọhọ mai ọ rrọ ekuhọ họ, ukpoye, emuhọ etoke uzuazọ iruo omarọkẹ ebẹdẹ bẹdẹ. (1 Jọn 2:17) Eme o gwọlọ re ma rria te omaromudhe mai?

² Nya Lele Oriruo Kristi: Nọ a họ e ame no, Jesu o te “muhọ ewuhrẹ,” bi whowho “usiuwoma uvie Ọghẹnẹ.” (Luk 3:23; 4:43) Epọvo na re, okenọ ma rọ ame-ọhọ dhesẹ omaromudhe mai kẹ Jihova via, ma te zihe ruọ egbodibo emamọ usi na nọ a ro mu. Dede nọ o rẹ sae gwọlọ oke gbe omodawọ gaga re a wo eware abọ-iwo nọ a rẹ rọ rria uzuazọ, akiruo ọsosuọ hayo iruo nọ e mae r’oja kẹ omai họ, odibọgba Oleleikristi na. (Mat. 6:33) Ukpenọ a rẹ họrọ oma le efe hayo odẹ-orro, enọ e rọ oma mudhe kẹ Ọghẹnẹ no a rẹ gwọlọ “dẹ oro họ odibo-ọgba” rai, wọhọ epanọ Pọl o ru. (Rom 11:13) Kọ who rri uvẹ nọ whọ be rọ gọ Jihova ghaghae jẹ be daoma ra kpobi do orro họ egagọ ra kẹe?

³ Wọhọ epanọ o jọ kẹ Jesu, ma re ‘mudhe kẹ ukumuomu na’ hrọ. (Jem. 4:7) Setan ọ dawo Jesu evaọ okenọ Ọ họ-ame no, yọ ere ọvona ọ rẹriẹ ovao dhe idibo Jihova nẹnẹ re. (Luk 4:1-13) Nọ akpọ Setan ọ wariẹ omai họ na, ma re dhesẹ omonyẹ hrọ, re ma whaha oware kpobi nọ o rẹ sai gbe iroro hayo udu mai ku. (Itẹ 4:23; Mat. 5:29, 30) A vẹvẹ Ileleikristi unu inọ a “rẹ sae jọ emẹjẹ Ọnowo na avọ emẹjẹ izi igbegbe re emu hu.” (1 Kọr. 10:21) Onana o gwọlọ nnọ ma rẹ sẹro oma mai wọso aroza-omawere ogbegbe, ekpehre usu, gbe enwoma Itanẹte. O tẹ jẹ gwọlọ nnọ ma rẹ whaha ebe ikọ-erue. Aro ọjaja vi kẹ enana gbe eghẹ Setan efa u re fi obọ họ kẹ omai rria te omarọkẹ mai.

⁴ Rehọ Eruẹrẹfihotọ Ọghẹnẹ Ru Iruo: Re u fi obọ họ kẹ omai rria te omaromudhe mai, Jihova ọ kẹ uketha no ẹkwoma Ẹme riẹ gbe ukoko Ileleikristi na. Ru Isase Ebaibol gbe olẹ se Jihova fihọ abọjọ iruo okpẹdẹ ra. (Jos. 1:8; 1 Tẹs. 5:17) Wo isiuru kẹ iwuhrẹ ukoko. (Ol. 122:1) Kuomagbe ahwo nọ a be dh’ozọ Jihova je koko ijaje riẹ.—Ol. 119:63.

⁵ Avọ obufihọ Ọghẹnẹ, whọ rẹ sae rria te omaromudhe ra kẹ Jihova, je wo oghọghọ orọ ẹgọ riẹ bẹdẹ bẹdẹ.—Ol. 22:26, 27; Fil. 4:13.

Iruo nọ E Gwọlọ Omarokpotọ

¹ Ẹme Ọghẹnẹ ọ tudu họ omai awọ nnọ ma wo “udu udhedhẹ. [Ma] rọ uyoma fi-ifo uyoma ha, rekọ ikpoye kọ ọvunu-oguo.” (1 Pita 3:8, 9) Uthubro yena o nwani kie kpahe iruo usiuwoma ota na. Uzẹme, odibọgba Oleleikristi na o rẹ sae jọ odawọ omarokpotọ mai.

² Omarokpotọ yọ okwakwa nọ u re fi obọ họ kẹ omai thihakọ iyero nọ e kare evawere. Okenọ ma tẹ rrọ usiuwoma, ma rẹ nya bru erara nọ i zizie omai hi, yọ ma riẹ nnọ ejọ i ti dhesẹ uruemu ababọ-ẹwo. Re ma gbẹ ta usiuwoma ghelọ uruemu utioye na o gwọlọ omarokpotọ. Evaọ ẹkwotọ jọ nọ ọ rẹ bẹbẹ gaga, inievo-emetẹ ekobaro ivẹ jọ i je no ẹthẹ ruọ ẹthẹ kẹdẹ kẹdẹ evaọ ikpe ivẹ ababọ ohwo nọ ọ jẹ k’ezọ kẹ ae! Ghele na, a thihakọ, yọ nẹnẹ na ikoko ivẹ e rrọ oria oyena.

³ Epanọ A re Ru Kpahe Evega: Omarokpotọ u re fi obọ họ kẹ omai rọ aro kele Jesu evaọ okenọ amọfa a te dhesẹ eva egaga kẹ omai. (1 Pit. 2:21-23) A ta eme-ẹsọ kẹ oniọvo-ọmọtẹ jọ evaọ uwou jọ, aye uwou na ọ kaki mu ei họ kẹsena ọzae na o te kuomagbe aye riẹ, ọ tẹ ta kẹ oniọvo-ọmọtẹ na nnọ o no ighẹ na no. Oniọvo-ọmọtẹ na ọ tẹ hwẹ ọvo, ta inọ o r’ẹro nnọ o ti lele ai ta ẹme evaọ oke ofa. Onana u gbe ọzae avọ aye na unu gaga te epanọ a rọ gaviezọ kẹ Osẹri ọfa nọ o weze bru ai, a tẹ jẹ uzizie re a kpohọ ewuhrẹ evaọ obọ Ọgwa Uvie rehọ. Oniọvo-ọmọtẹ nọ a kake ta ikpehre-eme kẹ na ọ nya ze ti yere ae jẹ wariẹ se isẹri kẹ ai. Ma rẹ sai ru eva ahwo nọ a be kezọ họ lọhọ re ẹkwoma “udhedhẹ avọ oma-urokpotọ” nọ ma re dhesẹ.—1 Pita 3:15; Itẹ 25:15.

⁴ Whaha Uke-Ufuo: Eriariẹ Ebaibol nọ ma wo e kẹ omai uvumọ ẹjiroro nọ ma re ro rri ahwo kpokpotọ hayo rehọ edẹ nọ i re si adhẹẹ no oma dhesẹ ae he. (Jọn 7:49) Ukpoye, Ẹme Ọghẹnẹ ọ hrẹ omai nọ ma “ta ẹme oyoma [ohwo ọvo]” ho. (Tait. 3:2) Nọ ma te wo udu uwowolẹ, wọhọ epanọ Jesu ọ jọ, ma re ru amọfa oma sasa. (Mat. 11:28, 29) Omarokpotọ nọ a rẹ rọ t’ẹme kẹ ohwo o rẹ lẹliẹ ovuẹ mai ruọ ahwo oma viere.

⁵ Ẹhẹ, omarokpotọ u re fi obọ họ kẹ omai thihakọ evaọ ẹkwotọ ọbẹbẹ. O rẹ sai ru eva ahwo nọ a rẹ rọwo yo ho lọhọ, yọ u re ru ovuẹ Uvie na si amọfa urru. Maero, u re ru eva were Jihova, ọnọ ọ rẹ “rọ aruoriwo kẹ enọ e roma-kpotọ.”—1 Pita 5:5.