Rẹroso Jihova inọ O ti Siwi Owhẹ Okenọ Uyero-Akpọ Nana U ti Kuhọ

Kẹle na, odiri nọ Jihova o wo kẹ uyero-akpọ nana u ti te oba. A te raha egagọ erue kpobi muotọ, erẹwho sa-sa a ti kuomagbe wọso idibo Ọghẹnẹ, yọ Jihova ọ te raha ahwo omuomu no evaọ ẹmo Amagidọn. Ileleikristi a bi rẹro oke nọ eware urirẹ nana e te rọ via.

Uzẹme rie họ, ma nwane riẹ oware kpobi nọ o te via evaọ etoke uye ulogbo na ha. Wọhọ oriruo, ma riẹ oke nọ u ti ro muhọ dẹẹ hẹ. Ma riẹ oware nọ o te lẹliẹ isu akpọ na kpareso egagọ họ. Ma riẹ epanọ egọmeti akpọ na a te wọso idibo Ọghẹnẹ kri te he, gbe oghẹrẹ nọ ọwọsuọ na ọ te jọ. Yọ ma riẹ oghẹrẹ nọ Jihova ọ te rọ raha ahwo omuomu dẹẹ hẹ evaọ ẹmo Amagidọn.

O make rrọ ere na, Ebaibol na ọ vuẹ omai oware kpobi nọ o rẹ sai fiobọhọ kẹ omai kru udu ga jẹ rẹroso Jihova. Wọhọ oriruo, ma riẹ nọ “edẹ urere na” ma rrọ na. (2Ti 3:1) Ma riẹ nọ egọmeti a te mu egagọ họ ẹwọso no, “a ti bru edẹ yena kpẹre,” re a gbẹ raha egagọ uzẹme kugbe he. (Mt 24:22) Ma riẹ nọ Jihova o ti siwi idibo riẹ. (2Pi 2:9) Ma tẹ jẹ riẹ nọ, Ọnọ Jihova ọ salọ re o kpe ahwo omuomu je siwi ogbotu obuobu na evaọ Amagidọn, o kiẹrẹe je wo ẹgba gaga.—Ev 19:11, 15, 16.

Avro ọ riẹ hẹ, eware nọ e te via evaọ obaro e te lẹliẹ ahwo “kie ewawa fiki ozọ.” Dede na, nọ ma te se je roro didi kpahe oghẹrẹ nọ Jihova o ro siwi ahwo riẹ evaọ oke nọ u kpemu, gbe eware nọ ọ ta nọ o ti ru evaọ obaro, ma sai “dikihẹ kpomavi jẹ kpare uzou [mai] rri ehru,” keme ma riẹ nọ esiwo mai ọ kẹle no.—Luk 21:26, 28.