Iwhowhovia

◼ Ebe nọ a ti fihọ ada evaọ August: A sai fi ibroshọ ewẹ-obe 32 nana jọ họ ada: Edhere nọ O Re Su Kpohọ Uzuazọ Ebẹdẹ Bẹdẹ—Kọ Who Duku Ei No?, Egọmeti Nọ Ọ te Rehọ Aparadase Tha, Eme Họ Ẹjiroro Uzuazọ? Ẹvẹ Whọ Sai Ro Duku Ei?, Eme Ọ rẹ Via k’Omai Okenọ Ma te Whu?, Izi Ahwo nọ Awhuno—Kọ E Rẹ Sai Fiobọhọ K’owhẹ Manikọ E Rẹ Nwa Owhẹ Oma? Kọ Eghinẹ Rọ?, Kọ Ọghẹnẹ Ọ Be Ghinẹ Daezọ Mai?, Okenọ Ohwo nọ Who You O te Whu, Reawere Uzuazọ Otọakpọ Bẹdẹ Bẹdẹ!, “Ri! Me Bi Ru Eware Kpobi Fihọ Ekpokpọ,” Should You Believe in the Trinity?, gbe The Divine Name That Will Endure Forever. September: Si Kẹle Jihova. O gbẹ riẹ hẹ, whọ rẹ sai fi Kezọ kẹ Eruẹaruẹ Daniẹl! hayo Whọ Sae Ria Bẹdẹ Bẹdẹ eva Aparadase ọ Otọakpọ họ ada wọhọ enọ a re ro nwene iei. October: Uwou-Eroro Na gbe Awake! Oria nọ a jọ dhesẹ isiuru, fi ibroshọ Gwọlọ na họ ada, jẹ dao oma gaga re who mu ọ ebe-iwuhrẹ Ebaibol họ. November: Edhere nọ O Re Su Kpohọ Uzuazọ Ebẹdẹ Bẹdẹ—Kọ Who Duku Ei No? Otẹrọnọ ohwo na o wo obe nana no vẹre, fi obe ọ Eriariẹ na, obe ọ Gọ Ọghẹnẹ na, hayo ibroshọ Gwọlọ na họ ada.

◼ Muhọ evaọ oka October 20, 2003, ma ti wuhrẹ Gọ Ọghẹnẹ Uzẹme Ọvo Na evaọ Uwuhrẹ Obe Ukoko.

◼ Ọsẹro ukoko na hayo omọfa nọ o vi ọ rẹ kiẹ igho ukoko na riwi evaọ September 1 hayo oke ofa nọ o kẹle riẹ. A te ru onana no, whowho iei kẹ ukoko na nọ a te se iyẹrẹ epanọ igho e nya n’otha na no.

◼ A re ru ekele ẹsiẹvo-ẹgbukpe ọrọ ebe gbe emagazini nọ e rrọ ukoko na eva August 31, 2003, hayo oke ofa nọ o kẹle riẹ. Ikelakele nana o wọhọ onọ ọsẹro ebe na o re ru k’amara k’amara na, a ve kere unu rai fihọ efọmo ọ Literature Inventory (S-18) na. A rẹ sae riẹ unu emagazini kpobi nọ a wo mi esẹro emagazini nọ e rrọ ukoko ovuovo evaọ utu ebe Ọgwa Uvie na. Okere-obe ukoko ẹruọsa na ọ rẹ rọ ẹro te ekele na. Ọye omariẹ avọ ọsẹro ukoko ọrọ ukoko ẹruọsa na a rẹ whobọhọ efọmo na. Efọmo ọ Literature Inventory (S-18) esa i ti te ukoko ẹruọsa kpobi nọ o be sẹro ebe kẹ utu ebe Ọgwa Uvie obọ. Iviena vi ọrọ ọsosuọ na se Society, u re lehie vrẹ September 6 hi. Fi orọ avivẹ họ efale rai. A rẹ sae rehọ ọrọ avesa na ruiruo wọhọ obe iruo.

◼ Eva August 28 rite September 3, 2003, Society o ti kele ebe kpobi nọ a wo eva Ebẹtẹle ọ Igieduma. Evaọ etoke edẹ yena, a ti rovie oria nọ a rẹ jọ rehọ ebe evaọ uwou-ebe ikporo na ha.

◼ Ekasẹte Ividio Ekpokpọ Nọ E Rie: Rọ Adhẹẹ Kẹ Udu-Esuo Jihova—Oyibo

Iruo Nọ I re Ru Oma Sasa

¹ Ovuẹ Ebaibol na u re ru oma sasa ahwo kpobi nọ a jẹ riẹ rehọ je fi ei họ iruo evaọ izuazọ rai. (Ol. 19:7, 8) U re fi obọ kẹ ae siomano iwuhrẹ erue gbe iruemu enwoma jẹ kẹ ae uvi ẹruore kẹ obaro. Dede na, orọnikọ ahwo nọ a dede emamọ usi na rehọ ọvo a re wo erere noi ze he. Iruo nana i re je ru oma sasa enọ e be wha uzẹme Ebaibol nọ o rẹ sasa oma se amọfa na.—Itẹ 11:25.

² Odibọgba na Ọ kẹ Rae Ẹgba: Jesu ọ ta nnọ enọ e jẹ owhowha ọkwa ọ olele i Kristi rehọ, onọ o kẹre te iruo usiuwoma ota gbe ilele-iruo na, a rẹ “ruẹ udhedhẹ kẹ izi rai.” (Mat. 11:29) Ọye omariẹ ọ ruẹ nnọ isẹri-isẹ kẹ amọfa o rẹ kẹ ẹgba. O jọ wọhọ emu rọ kẹe. (Jọn 4:34) Okenọ o vi ilele 70 re a nyae ta usiuwoma, a ghọghọ fiki epanọ a ruẹ nnọ Jihova ọ be tha omodawọ rai uke.—Luk 10:17.

³ Obọ nọ Ileleikristi buobu i bi wo evaọ iruo usiuwoma ota na nẹnẹ o kẹ rae ẹgba no re. Oniọvo-ọmọtẹ jọ ọ ta nnọ: “Odibọgba na ọ rẹ k’omẹ ẹgba keme o rẹ lẹliẹ iroro mẹ t’ọvi ẹjiroro ọvo evaọ uzuazọ. Ebẹbẹ omobọ-ohwo gbe otunyẹ uzuazọ ikẹdẹ kẹdẹ i re zihe ruọ eware esese k’omẹ nọ me te bi w’obọ evaọ odibọgba na.” Ọgbodibo ajọwha ọfa ọ ta nnọ: “Odibọgba na . . . ọ rẹ kareghẹhọ omẹ kẹdẹ kẹdẹ inọ Jihova ọ rrọ uzuazọ, o vẹ jẹ kẹ omẹ udhedhẹ gbe oghọghọ evaọ udu mẹ, onọ a rẹ sai wo evaọ edhere ọfa ha.” Ẹvẹ uvẹ-ọghọ nọ ma rọ rrọ ‘ibe iruiruo Ọghẹnẹ’ o rro te!—1 Kọr. 3:9.

⁴ Owhowha Kristi U re Vovori: Dede nọ a ta udu họ Ileleikristi awọ nọ ‘a ya gaga,’ orọnikọ oware nọ ẹgba mai o te he Jesu ọ gwọlọ mi omai hi. (Luk 13:24) Evaọ uzẹme, ọ rọ edhere oyoyou zizie omai ‘re ma ruọ otọ owhowha riẹ kugbe ei.’ (Mat. 11:29, oruvẹ-obotọ evaọ NW ) Enọ i bi lele iyero ebẹbẹ muabọ a rẹ sai wo imuẹro inọ egagọ ẹwẹ-kpobi rai, e tẹ make kao, e da Ọghẹnẹ ẹro fia.—Mak 14:6-8; Kọl. 3:23.

⁵ Ẹvẹ o rẹ sasa oma te re a gọ Ọghẹnẹ nọ o wo ovuhumuo kẹ oware kpobi nọ ma bi ru fiki odẹ riẹ! (Hib. 6:10) J’oma daoma re ma hae kẹe onọ o mai woma kpobi.