Oma Rọkẹ Oka ọ November 12

OKA NỌ O RỌ NOVEMBER 12 MUHỌ

Ole avọ 66 gbe Olẹ

□ Uwuhrẹ Ebaibol Ukoko:

cl uzou 7 edhe. 18-22 gbe ẹkpẹti nọ o rrọ ẹwẹ. 75 (30 min.)

□ Isukulu Odibọgba Esuo-Ọghẹnẹ:

Isase Ebaibol: Emọs 1-9 (10 min.)

No. 1: Emọs 3:1-15 (4 min. hayo kpẹre viere)

No. 2: Oke nọ Ọghẹnẹ Ọ Gwọlọ nọ Ohwo O re ro Nwene Egagọ Riẹ—td-IS 6C (5 min.)

No. 3: Eme Ma Sai Wuhrẹ no Olezi 51:17 Ze? (5 min.)

□ Ewuhrẹ Odibọgba:

Ole avọ 68

10 min: Nọ Ohwo Ọ tẹ Ta kẹ Owhẹ Nọ, ‘Wha Rọwo Jesu hu.’ Ẹme nọ a rẹ kpahe fihọ. Fikieme ahwo ẹkwotọ mai a be hae rọ t’ẹme yena? Didi enọ ma sae nọ ae re a ta iroro rai via? Iwuhrẹ Jesu vẹ e sae were ae oma? Eme vẹ evaọ uzou avọ 4 ọrọ obe Ebaibol Wuhrẹ na ma sai ro lele ai t’ẹme? Tuduhọ iwhowho-uvie awọ re a hai se ẹjiroro Uwou-Eroro Na nọ o rrọ ẹwẹ-obe avọ 2 na kẹ ahwo otiọye. Ru odhesẹvia ọkpẹkpẹe ọvo.

10 min: Eme Ma Wuhrẹ Noi Ze? Ẹme nọ a rẹ kpahe fihọ. Jọ a se Mak 1:16-20. Ta eware nọ ma re wuhrẹ no oria Ebaibol nana ze kpahe iruo usiuwoma ota mai.

10 min: “Ruẹ Erere Iruo Ra.” Enọ gbe iyo.

Ole avọ 98 gbe Olẹ

Ruẹ Erere Iruo Ra

1. Eme o rẹ sae lẹliẹ usiuwoma bẹ omai no?

¹ Ọghẹnẹ ọ ma ohwo-akpọ re ọ ‘re erere iruo riẹ.’ (Ọtausi. 2:24) Rekọ ma gbẹ be ruẹ erere nọ o bi no usiuwoma ota mai ze he, o rẹ lẹliẹ usiuwoma na bẹ omai no. Ma te ta ẹme kpahe oware nọ u je fo re ma gbẹ hae rọ evawere ta usiuwoma na.

2. Fikieme ma gbe roro nọ ohwo kpobi o ti kurẹriẹ hẹ?

² Who Roro nọ Ohwo Kpobi O ti Kurẹriẹ Hẹ: Dede nọ umutho ahwo jọ ọvo a kurẹriẹ evaọ igbidigbi ahwo nọ Jesu ọ ta usiuwoma kẹ na, mai kpobi riẹ nọ Jesu o ru iruo riẹ gba. (Jọn 17:4) Evaọ ohare ọkibi na, Jesu ọ ruẹaro nọ ahwo buobu nọ a ti yo usiuwoma na a te sae gọ Ọghẹnẹ hẹ. (Mat. 13:3-8, 18-22) Ghele na, irere buobu e gbẹ rrọ usiuwoma nọ ma be ta na.

3. Ẹvẹ ma rẹ rọ “mọ ibi” dede nọ ahwo nọ ma be ta usiuwoma kẹ a bi kurẹriẹ hẹ?

³ Oghẹrẹ nọ Ma rẹ rọ Mọ Ibi: Ohare Jesu na u dhesẹ nọ ahwo nọ i kurẹriẹ a te “mọ ibi.” (Mat. 13:23) Nọ ọka ọ tẹ dhẹ ze jẹ who no, orọnikọ ọka nọ ọ rro ze na a rẹ kọrọ họ rekọ eruọka. Fikiere, orọnikọ ahwo nọ ma ta usiuwoma kẹ nọ a kurẹriẹ họ uzedhe ibi nọ ma be mọ họ, rekọ emamọ usi nọ ma be vuẹ kẹse kẹse na. Onana o be wha irere buobu ze, makinọ ahwo a kurẹriẹ hẹ. U bi ru odẹ Jihova fo. (Aiz. 43:10-12; Mat. 6:9) Usiuwoma na yọ iruo nọ ma bi lele Ọghẹnẹ ru, onana yọ ọghọ ologbo. (1 Kọr. 3:9) Eva e tẹ be jẹ were Jihova inọ ma be rọ edhere otiọna ‘jiri iei.’—Hib. 13:15, 16.

4. Eme o rẹ sai no usiuwoma ota mai ze nọ ma rẹ riẹ hẹ?

⁴ Usiuwoma nọ ma be ta na o sai je wo irere nọ ma rẹ ruẹ hẹ. Ẹsejọhọ, Jesu o zihe kpobọ odhiwu no taure ahwo jọ nọ ọ ta usiuwoma kẹ a te ti kurẹriẹ. Ere ọvo na, ohwo nọ ma ta usiuwoma kẹ ọ gbẹ maki kurẹriẹ obọnana ha, ọ sae jọ emu mai kurẹriẹ ẹdẹfa. Enana kpobi i dhesẹ nọ irere buobu i bi no usiuwoma nọ ma be ta ze. Fikiere, jọ ma gbẹ hae “mọ ibi buobu” re ma dhesẹ nọ mai yọ ilele Jesu.”—Jọn 15:8.