Oghẹrẹvẹ Jihova Ọ Te Kareghẹhọ Owhẹ?

“O ỌGHẸNẸ mẹ, kareghẹhọ [omẹ].” Unuẹse buobu Nehemaya ọ rọ eme nana lẹ Ọghẹnẹ. (Nehemaya 5:19; 13:14, 31) O rọ ẹkoma ahwo re a rọ eme olẹ itieye na bo se Ọghẹne okenọ a tẹ rọ uye.

Rekọ eme ahwo na a wo họ iroro okenọ a tẹ be yare Ọghẹnẹ re ọ kareghẹhọ ae? U re vevẹ, a fievahọ nnọ Ọghẹnẹ o ti ru vi edẹ rai nọ ọ te kareghẹhọ gheghe. Ababọ avro a wo ọkpọ ẹruore nọ ogbulegbu nọ a kare kẹle Jesu na o wo. Ọnana, wo ohẹriẹ no ọdekọ, ọ lẹ Jesu nọ: “Roro omẹ, okenọ whọ ze ogaga uvie ra.” Orọnikọ ọ be ta kẹ Jesu nọ ọ kareghẹhọ ohwo nọ ọ rọ ọvo ho rekọ re o ru oware jọ kẹe—re ọ kpare iẹe.—Luk 23:42.

Evaọ eria buobu, Ebaibol na o dhesẹ nnọ evaọ obọ Ọghẹnẹ, ‘ẹkareghẹhọ’ u dhesẹ ẹjẹ emamọ owọ. Wọhọ oriruo, nọ ame ẹvo o ruru otọakpọ na te edẹ 150 no, “Ọghẹnẹ ọ tẹ kareghẹhọ Noa. . . . Ọghẹnẹ ọ tẹ rehọ ofou ze akpọ na, ame o te muhọ ẹkpọ.” (Emuhọ 8:1) Ikpe buobu evaọ obaro, Samsin, ọnọ ahwo Filistia a tuaro jẹ gbabọ, ọ lẹ nọ: “O Ọnowo ỌGHẸNẸ, [kareghẹhọ] omẹ, mẹ lẹ owhẹ, kẹ omẹ ogaga, ivie mẹ lẹ owhẹ re who ru ona ovo kẹ omẹ.” Jihova ọ kareghẹhọ Samsin ẹkwoma ogaga ulogbo nọ ọ kẹ riẹ re ọ sae kiẹ oja oma riẹ evaọ obọ ewegrẹ Ọghẹnẹ. (Ibruoziẹ 16:28-30) Rọkẹ Nehemaya, Jihova ọ ghale omodawọ riẹ, a te zihe egagọ uzẹme ziọ Jerusalẹm.

“Eware kpobi nọ a kere oke anwae, a kere ai rọ kẹ omai ohrẹ, re ma rehọ fiki odiri gbe eri ikereakere na, wo ẹruore,” ere Pọl ukọ na o kere. (Ahwo Rom 15:4) Ma tẹ kareghẹhọ Jihova ẹkwoma oreva riẹ o gwọlọ ruo, wọhọ epanọ idibo ẹrọwọ riẹ a ru evaọ oke anwae, ma rẹ sai wo evaifihọ inọ Jihova ọ te kareghẹhọ omai ẹkwoma obọ nọ o ti fihọ k’omai evaọ ewo ẹgwọlọ okpẹdẹ mai, ẹkwoma ẹgba nọ ọ te k’omai evaọ edawọ mai, gbe ẹkwoma ẹthọ nọ ọ te thọ omai okenọ ọ te wha ẹdhoguo riẹ bru enọ e riẹ Ọghẹnẹ hẹ ze.—Matiu 6:33; 2 Peter 2:9.

Kọ Whọ Gwọlọ Dede Evuẹ Efa Rehọ?

Makọ evaọ akpọ ukpokpoma ọnana dede, whọ rẹ sai wo evawere no eriariẹ egbagba Ebaibol kpahe Ọghẹnẹ ze, Uvie riẹ, gbe ẹjiroro igbunu riẹ kẹ ohwo-akpọ. Whọ tẹ gwọlọ dede evuẹ efa rehọ hayo whọ tẹ gwọlọ re ohwo jọ ọ nyaze ti ru uwuhrẹ Ebaibol ọvọvẹ kugbe owhẹ, ivie na kere se Watch Tower, P.M.B. 1090, Benin City, Edo State, Nigeria, hayo oria adrẹse nọ u fo evaọ ẹwẹ-obe avọ 30 na.