Akpọ o gbe eyae na unu nọ a ruẹ nọ uki Jesu o rrọ ofofe. Meri Magdalini ọ tẹ dhẹ ohrẹ bru “Saemọn Pita gbe olele ọdekọ nọ Jesu o you na,” ọye họ Jọn ukọ na. (Jọn 20:2) Rekọ, eyae edekọ na a ruẹ ukọ-odhiwu jọ evaọ otafe uki na. Yọ ukọ-odhiwu ọfa ọ rrọ obeva uki na, “nọ o ku iwu efuafo họ.”—Mak 16:5.

Ukọ-odhiwu jọ evaọ usu ivẹ na ọ tẹ ta kẹ ae nọ: “Ozọ u mu owhai hi, keme mẹ riẹ nọ Jesu nọ a kare fihọ ure kpe na wha be gwọlọ. Ọ rrọ etenẹ hẹ, keme a kpare riẹ no uwhu ze no, wọhọ epanọ ọ ta. Wha nyaze, wha rri oria nọ ọ jọ. Wha nya ovovẹrẹ nyae ta kẹ ilele riẹ inọ a kpare riẹ no, yọ o bi kpobọ Galili nyae hẹrẹ owhai.” (Matiu 28:5-7) Eyae na a te “bi nuhu avọ ọwhewhe nọ ọ da rai oma fia,” a tẹ dhẹ nyae ta eware nọ a rọ ẹro ruẹ na kẹ ilele na.—Mak 16:8.

Evaọ oke nana yọ Meri ọ ruẹ Pita avọ Jọn no. Avọ ẹwẹ nọ ọ be wẹ fuẹlu fuẹlu, ọ tẹ ta kẹ ae nọ: “A wọ Olori na no uki na no, yọ ma riẹ oria nọ a wọ riẹ fihọ họ.” (Jọn 20:2) Pita avọ Jọn a tẹ be dhẹ kpobọ uki na. Jọn ọ dhẹ vẹrẹ vi Pita, ọ tẹ kaki te obọ uki na. O te ruwẹ bi rri eva uki na, jẹ ruẹ ehọ nọ a rọ variẹ Jesu na, rekọ ọ ruọ eva ha.

Nọ Pita ọ dhẹ te etẹe, ọ tẹ tehe ruọ eva uki na. Ọ tẹ ruẹ ehọ na nọ e rrọ etẹe gbe onọ a rọ variẹ uzou Jesu na. Jọn ọ tẹ ruọ eva uki na re, ọ tẹ te rọwo ẹme nọ Meri ọ ta na. Dede nọ Jesu ọ ta kẹ ae no vẹre, aimava na a ri vuhumu nọ Jesu ọ kparoma no uwhu ze no ho. (Matiu 16:21) Akpọ o gbe rai unu, a te bi zihe kpo. Rekọ Meri nọ o zihe ze no na, ọ tẹ daji oria uki na.

Evaọ oke nana yọ eyae edekọ na a be nyae vuẹ ilele na inọ Jesu ọ kparoma no. Nọ a rrọ edhere na, Jesu o te zere ai, ọ tẹ ta kẹ ae nọ: “Wha do!” A te kru awọ riẹ be “rọ uzou kpotọ kẹe.” Jesu ọ tẹ ta kẹ ae nọ: “Ozọ u mu owhai hi! Wha nyae vuẹ inievo mẹ re a kpobọ Galili, a te jọ obei ruẹ omẹ.”—Matiu 28:9, 10.

Evaọ oke nọ otọ u nuhu nọ ikọ-odhiwu na e romavia evaọ obọ uki na, isoja nọ i bi rou uki na “a te je nuhu a tẹ wọhọ ahwo nọ a whu no.” Nọ a jaja aro vi no, a tẹ ruọ eva ẹwho na re a “ta eware kpobi nọ e via na kẹ ilori izerẹ na.” Izerẹ na a tẹ nyai lele ekpako ahwo Ju gbẹgwae kpahe onana. A tẹ gbaemu nọ a rẹ j’udi kẹ isoja na re a ko oware nọ o via na dhere jẹ ta nọ: “Ilele riẹ a nyaze evaọ aso a te thoi vrẹ nọ ma jọ owezẹ.”—Matiu 28:4, 11, 13.

Otẹrọnọ isoja Rom o kieruọ owezẹ nọ ọ tẹ rrọ irou, a re kpei no, fikiere izerẹ na a tẹ ya eyaa kẹ ae nọ: “Onana [koyehọ ọrue nọ a gu inọ a jọ owezẹ na] u te do te ọba na oma, ma ti lele iei ta ẹme, fikiere wha ruawa ha.” (Matiu 28:14) Isoja na a tẹ rehọ igho nọ a kẹ rai na, a te ru epanọ izerẹ na a ta na. Iku ọrue nana inọ a tho ugboma Jesu na o tẹ vaha ruọ udevie ahwo Ju kpobi.

Meri Magdalini ọ gbẹ rrọ obọ uki na be viẹ. Nọ o ruwẹ rri uki na, ọ tẹ ruẹ ikọ-odhiwu ivẹ nọ i ku iwu efuafo họ. Ọjọ ọ keria oria nọ uzou Jesu o jọ, ọdekọ kọ obọ awọ riẹ. A tẹ nọe nọ: “Aye, eme whọ jẹ be viẹ?” Meri ọ tẹ ta kẹ ae nọ: “A wọ Olori mẹ vrẹ no, yọ mẹ riẹ oria nọ a wọ riẹ fihọ họ.” Nọ Meri o kuomarẹriẹ ọ tẹ ruẹ omọfa. Ohwo yena ọ tẹ wariẹ nọ Meri onọ nọ ikọ-odhiwu na a nọ riẹ na, je fibae nọ: “Ono whọ be gwọlọ?” Fikinọ Meri o je roro nọ ohwo nana yọ ọruẹrẹ-ọgbọ na, ọ tẹ ta kẹe nọ: “Ọga, otẹrọnọ whẹ ọ wọ riẹ vrẹ, vuẹ omẹ oria nọ whọ wọ riẹ fihọ, re mẹ wọe vrẹ.”—Jọn 20:13-15.

Whaọ Jesu nọ ọ kparoma no na Meri ọ be ta ẹme kẹ na, rekọ evaọ oke nana Meri o vuhu i rie he. Nọ ohwo na o sei nọ, “Meri!” ọ tẹ nwani vuhu iei nọ Jesu keme ọ riẹ oghẹrẹ nọ Jesu o re sei. Meri o te bo avọ oghọghọ nọ: “Raboni!” (onọ otofa riẹ o rrọ “Owuhrẹ!”) Rekọ ozọ u je mu Meri inọ Jesu o bi ti kpobọ odhiwu se iẹe ba, fikiere ọ tẹ gbae. Jesu ọ tẹ ta kẹe nọ: “Siọ omẹ ba ẹtalamu, keme me ri muvrẹ bru Ọsẹ na no ho. Rekọ nya bru inievo mẹ re whọ ta kẹ ae nọ, ‘Me bi muvrẹ bru Ọsẹ mẹ gbe Ọsẹ rai, je bru Ọghẹnẹ mẹ gbe Ọghẹnẹ rai.’”—Jọn 20:16, 17.

Meri ọ tẹ dhẹ kpohọ obonọ ikọ na gbe ilele Jesu efa a kokohọ. Ọ tẹ vuẹ ae nọ: “Mẹ ruẹ Olori na no!” O te gbiku eware nọ ọ ruẹ, jẹ rọ ere fiba eme nọ eyae edekọ a ta no vẹre. (Jọn 20:18) Ghele na, iku rai na “e wọhọ eme igheghẹ rọkẹ ae.”—Luk 24:11.

Evaọ Ẹdoka, Nisan 16, ilele na a jọ uweri. A riẹ oware nọ uki na o rọ rrọ ofofe he. (Matiu 28:9, 10; Luk 24:11) Evaọ ẹdẹ ọvo yena, Kleopas avọ olele ọfa jọ a te no Jerusalẹm bi kpohọ Emeọs, onọ o rehọ oware wọhọ emaele ihrẹ thabọ no etẹe.

Nọ a be nya na, yọ a bi gbiku oware nọ o via na. Kẹsena ohwo jọ o te kuomagbe ae. Ọ tẹ nọ ae nọ: “Didi eme whai imava wha be ta kpahe ga tere evaọ edhere?” Kleopas ọ tẹ kpahe kẹe nọ: “Kọ whẹ yọ ọrara nọ ọye ọvo ọ be rria oria evaọ Jerusalẹm nọ whọ gbẹ rọ riẹ eware nọ e jariẹ via evaọ edẹ enana ha?” Ohwo na ọ tẹ nọ ae nọ: “Didi eware?”—Luk 24:17-19.

A tẹ ta nọ: “Eware kpahe Jesu ohwo Nazarẹt na.” A te fibae nọ: “Ma je rẹro nọ ọzae nana họ ọnọ o bi ti siwi Izrẹl.”—Luk 24:19-21.

Kleopas avọ ohwo nọ a gbẹ jọ usu na a te gbiku eware nọ e via ẹdẹ yena kẹe. A ta nọ eyae jọ nọ i kpobọ uki Jesu na a di uki na họ ofofe, yọ eyae na a rọ ẹro ruẹ oware igbunu jọ, ikọ-odhiwu nọ e ta nọ Jesu ọ kparoma no. Ilele ivẹ na a tẹ jẹ ta nọ amọfa a kpobọ uki na re, a tẹ “ruẹ nọ ere o ginẹ rrọ, wọhọ epanọ eyae na a ta na.”—Luk 24:24.

Ilele ivẹ na a reghe no, a be sai wo otoriẹ oware nọ o via na ha. Ohwo nọ o kuomagbe ai na ọ tẹ be ta ẹme ududu re ọ kpọ iroro ethọthọ rai na vi, nọ o be lẹliẹ udu whrehe ai na, ọ ta nọ: “O whai igheghẹ nọ udu rai o be kake rọwo eware kpobi nọ eruẹaro na e ta ha! Kọ u gbe fo re Kristi na ọ ruẹ uye eware nana re ọ sai wo oruaro riẹ?” (Luk 24:25, 26) Kẹsena ọ tẹ fa otọ eria Ikereakere buobu nọ i kiekpahe Kristi na kẹ ae.

Aimasa na a tẹ te kẹle Emeọs no. Ilele ivẹ na a gwọlọ gbe yo eme riẹ na, fikiere a tẹ lẹe nọ: “Jọ kugbe omai keme owọwọ o joma te no, yọ oke u bi kpo no.” Ọ tẹ rọwo nọ ọ rẹ jọ kugbe ae, a tẹ re emu kugbe. Nọ ohwo na ọ lẹ no, o te wiri ebrẹdi, ọ tẹ rehọ iẹe kẹ ae, a tẹ nwani vuhu iei, rekọ ẹsiẹvo na a gbẹ ruẹ e riẹ hẹ. (Luk 24:29-31) Obọnana u mu rai ẹro no inọ Jesu ọ kparoma no!

Ilele ivẹ na a tẹ be rọ evawere ta kpahe oware nọ o via kẹ ae na, inọ: “Agbẹta nọ eme riẹ i ro duobọte omai udu gaga na nọ ọ jẹ ta ẹme kẹ omai evaọ edhere na, nọ ọ jẹ fa otọ Ikereakere na vevẹ kẹ omai!” (Luk 24:32) A te zihe kpobọ Jerusalẹm ovovẹrẹ, a tẹ ruẹ ikọ na gbe amọfa nọ a rrọ kugbe ae. Taure Kleopas avọ olele ọdekọ na a te ti rovie unu gbiku oware nọ a ruẹ, a te bi yo nọ amọfa a be ta nọ: “Ababọ avro, a kpare Olori na ze no, yọ ọ romavia kẹ Saemọn!” (Luk 24:34) Kẹsena aimava a tẹ ta epanọ Jesu ọ rọ romavia kẹ ae. Ẹhẹ, ae omarai a rọ ẹro ruẹ Jesu re.

Ẹsiẹvo na, idudu e tẹ ruọ ae oma nọ Jesu ọ romavia evaọ ubruwou na. Onana u gbe rai unu keme a kare ethẹ na kpobi fiki ozọ ahwo Ju. Whaọ, Jesu ọ ruọ uwou no. Ọ tẹ rọ unu uwowolẹ ta nọ: “Jọ udhedhẹ u te owhai.” Rekọ ozọ u bi mu ai. Wọhọ epanọ o jarae oma oke jọ nọ o vrẹ, a je “roro nọ ẹzi a jẹ ruẹ na.”—Luk 24:36, 37; Matiu 14:25-27.

Re o dhesẹ kẹ ae nọ ọyomariẹ yọ ẹwoho ho gbe nọ orọnikọ ibiaro rai e be viẹ ae họ họ, rekọ ohwo dẹẹ a be ruẹ na, Jesu o te dhesẹ abọ gbe awọ riẹ kẹ ae jẹ ta nọ: “Fikieme wha be rọ rova, kọ emejabọ avro ọ rọ rrọ udu rai? Wha rri abọ gbe awọ mẹ, re wha riẹ nọ mẹ wha be ruẹ na; wha rọ obọ te omẹ re wha ruẹ, keme ẹzi o re wo uwo gbe igbenwa ha wọhọ epanọ wha be ruẹ nọ me wo na.” (Luk 24:36-39) Eva e were rai gaga, yọ u bi gbe ai unu, rekọ a re rọwo ghele he.

Re Jesu o gbe dhesẹ kẹ ae nọ ohwo dẹẹ a be ruẹ na, ọ tẹ nọ ae nọ: “Kọ wha jọ etẹe wo oware jọ nọ a rẹ re?” A tẹ kẹe emeri nọ a tọ, ọ tẹ re. Kẹsena ọ tẹ ta nọ: “Enana họ eme mẹ nọ mẹ ta kẹ owhai nọ mẹ gbẹ jọ kugbe owhai [taure me te ti whu], inọ eware kpobi nọ a kere kpahe omẹ evaọ Uzi Mosis gbe evaọ eme Eruẹaro na gbe evaọ Ilezi na i re rugba hrọ.”—Luk 24:41-44.

Jesu o fiobọhọ kẹ Kleopas avọ olele ọdekọ na wo otoriẹ Ikereakere na no, obọnana o bi fi obọ ovona họ kẹ ahwo kpobi nọ a kokohọ etenẹ na, ọ ta nọ: “Enẹ a kere: inọ Kristi na ọ te ruẹ uye, ọ vẹ te kparoma no uwhu ze evaọ ẹdẹ avọ esa, yọ fiki odẹ riẹ, a ti whowho ovuẹ orọ ekurẹriẹ nọ o rẹ wha erọvrẹ izieraha ze evaọ erẹwho na kpobi—muhọ no Jerusalẹm vrẹ. Wha re se isẹri eware nana.”—Luk 24:46-48.

Evaọ oke nana, Tọmọs ukọ na ọ jariẹ hẹ. Evaọ edẹ nọ i lele i rie, ilele na a tẹ jẹ rọ evawere vuẹe nọ: “Ma ruẹ Olori na no!” Tọmọs ọ tẹ ta nọ: “Ajokpanọ mẹ rẹ jọ abọ riẹ ruẹ oka itu na jẹ rọ uziobọ mẹ te eka itu na je dhe obọ mẹ te abefẹ riẹ, o gbẹ rrọ ere he, mẹ te rọwo vievie he.”—Jọn 20:25.

Nọ edẹ eree e vrẹ no, ilele na a tẹ wariẹ kokohọ oria jọ nọ a jọ kare ethẹ na kpobi dhe oma, yọ Tọmọs ọ jariẹ. Jesu ọ tẹ ruọ udevie rai, o te yere ai nọ: “Jọ udhedhẹ u te owhai.” Jesu ọ tẹ rẹriẹ ovao ku Tọmọs, ọ tẹ ta nọ: “Fi uziobọ ra họ etenẹ re whọ ruẹ abọ mẹ, je dhe obọ ra te abefẹ mẹ, re whọ seba ẹvro, rekọ rọwo.” Tọmọs o te bo nọ: “Olori mẹ gbe Ọghẹnẹ mẹ!” (Jọn 20:26-28) Ẹhẹ, o gbe wo avro ọvo ho inọ Jesu ọ kparoma no, yọ o zihe ruọ omama ẹzi no ọnọ Jihova Ọghẹnẹ o bi ro ru iruo.

Jesu ọ tẹ ta nọ: “Fikinọ whọ ruẹ omẹ no whọ be rọ rọwo? Eva e were ahwo nọ a ruẹ hẹ rekọ a rọwo.”—Jọn 20:29.