Nọ Adamu avọ Ivi a no ogba Idẹn no, a te yẹ emọ buobu. Ọmọ ọsosuọ rai nọ a re se Keni ọ jọ ọwhẹrẹ, yọ ọmọ avivẹ rai nọ a re se Ebẹle ọ jọ othuru-igodẹ.

Ẹdẹ jọ, Keni avọ Ebẹle a te dhe idhe kẹ Jihova. Kọ whọ riẹ oware nọ a re se idhe? Idhe yọ okẹ nọ o rrọ ghaghae. Idhe Ebẹle e were Jihova, rekọ erọ Keni e were Jihova ha. Onana o lẹliẹ eva dha Keni gaga. Jihova ọ tẹ ta kẹ Keni nọ ofu riẹ na ọ rẹ sae lẹliẹe ru oware uyoma. Rekọ Keni o yo ghele he.

Ukpoye, Keni ọ tẹ ta kẹ Ebẹle nọ: ‘Nyaze ma gbe kpobọ ẹwọ.’ Okenọ aimava ọvo a jọ obọ ẹwọ na, Keni ọ tẹ họrọ mu oniọvo riẹ je kpei no. Kọ eme Jihova o ti ru kpahe onana? Jihova ọ kẹ Keni uye, o te lei siọ ahwo uviuwou riẹ ba. Ọghẹnẹ ọ kẹ riẹ uvẹ zihe ze vievie he.

Kọ eme ma wuhrẹ no onana ze? Eva e rẹ sae dha omai nọ eware e gbẹ be nya epanọ ma gwọlọ họ. Otẹrọnọ ma bi muofu, hayo amọfa a tẹ ta kẹ omai nọ ma gbe muofu hu, o gwọlọ nọ ma gaviezọ re ma siọ oware uyoma ba eru.

Fikinọ Ebẹle o you Jihova yọ o ru oware uwoma, Jihova ọ te kareghẹhọ iẹe. Ọghẹnẹ ọ te kpare Ebẹle ziọ uzuazọ evaọ okenọ o te zihe otọakpọ na ruọ Aparadase no.

Nọ oke o be nyaharo na, ahwo a tẹ te vọ akpọ na. Yọ ahwo buobu a je ru eware iyoma. Makọ ikọ-odhiwu jọ dede a je ru eware iyoma re. A no obọ odhiwu ziọ obọ otọakpọ obonẹ te rria. Kọ whọ riẹ oware nọ a ro ru ere? A zihe ruọ ahwo-akpọ re a sae wo eyae kẹ omarai.

Eyae na i te yẹ emọ kẹ ikọ-odhiwu na. Emọ nọ a yẹ na e jọ ruaro yọ a wo ogaga. Fikiere a jẹ rọ ogaga rai gwọlọ ẹme. A je ru ozighi. Jihova ọ sae kẹ eware iyoma itieye na uvẹ vievie he. Fikiere ọ tẹ jiroro nọ ọ rẹ rọ ame raha ahwo oyoma na no.

Rekọ ọzae jọ ọ jariẹ nọ o wo ohẹriẹ no ahwo nọ a kiọkọ. O you Jihova gaga. Odẹ riẹ Noa. O wo aye gbe emezae esa, odẹ rai Shẹm, Ham, gbe Jafẹt. Emezae esa na a wo ọvuọ aye riẹ. Jihova ọ tẹ ta kẹ Noa nọ o ku okọ ulogbo jọ, re ọyomariẹ avọ ahwo uviuwou riẹ a sae zọ evaọ okenọ Owhe na o te ku ze. Okọ na o wọhọ etehe ologbo nọ ọ rẹ sai vori evaọ ehru ame. Jihova ọ tẹ jẹ ta kẹ Noa nọ o su erao buobu ruọ okọ na re e zọ re.

Noa ọ tẹ nwani mu okọ na họ eku. O rehọ Noa avọ uviuwou riẹ oware wọhọ ikpe udhuvẹ-gbikpe (50) soso re a te ku okọ na re. Nwanọ epanọ Jihova ọ ta nọ a ku okọ na, ere a ku rie. Evaọ oke yena, Noa ọ jẹ vẹvẹ ahwo na unu kpahe Owhe na. Rekọ ohwo ọvo ọ gaviezọ họ.

Oke nọ a rẹ rọ ruọ evaọ okọ na u te te. Joma ruẹ oware nọ o via.