Evaọ ẹwho jọ nọ a re se Ọr nọ ọ kẹle Bebẹl, ahwo buobu a jẹ gọ eghẹnẹ efa siọ Jihova ba. Rekọ u wo ọzae jọ evaọ ẹwho na nọ ọ jẹ gọ Jihova. Odẹ riẹ Abraham.

Jihova ọ tẹ ta kẹ Abraham nọ: ‘Nyasiọ uwou ra gbe imoni ra ba, re whọ nya kpohọ ẹkwotọ nọ me ti dhesẹ kẹ owhẹ.’ Kẹsena Ọghẹnẹ ọ tẹ ya eyaa kẹe nọ: ‘Who ti zihe ruọ orẹwho ulogbo, yọ me ti ru eware iwoma kẹ ahwo buobu evaọ otọakpọ na fiki ra.’

Abraham ọ riẹ obonọ Jihova ọ ta kẹe nọ ọ nya ha, rekọ o fievahọ Jihova. Fikiere Abraham avọ aye riẹ Sera, Tera ọsẹ riẹ, gbe ọmọ oniọvo riẹ nọ a re se Lọt, a tẹ kwa eware rai, a je muhọ ẹnya.

Ikpe udhosa gbe ikpegbisoi (75) Abraham ọ jọ okenọ ọyomariẹ avọ uviuwou riẹ a ro te obonọ Jihova ọ gwọlọ nọ a kwa nya na. A re se oria na Kenan. Ọghẹnẹ ọ tẹ jọ etẹe ta ẹme kẹ Abraham jẹ ya eyaa kẹe nọ: ‘Mẹ te rehọ ẹkwotọ nana kpobi nọ whọ be ruẹ na kẹ emọ ra.’ Evaọ oke yena, yọ Abraham avọ Sera a who no, rekọ a wo ọmọ ọvuọvo ho. Kọ ẹvẹ Jihova o ti ro ru eyaa riẹ na gba?

Abraham avọ Sera a rọo te ikpe buobu no. A nyasiọ emamọ uwou rai ba evaọ obọ ẹwho Ọr, a tẹ be rria uwou-udhu. Rekọ Sera o je muofu hu, keme o fievahọ Jihova.

Sera ọ gwọlọ nọ o re yẹ ọmọ, fikiere ọ tẹ ta kẹ Abraham nọ: ‘Hega odibo-ọmọtẹ mẹ o te yẹ ọmọ, ọ sae jọ wọhọ ọmọ obọmẹ.’ U kri hi, Hega o te yẹ ọmọzae. Odẹ riẹ Ishmẹl.

Nọ ikpe buobu e vrẹ no, okenọ Abraham ọ jọ ikpe udhone gbe ikpegbizii (99), yọ Sera ọ rrọ ikpe udhone-gbizii (89), erara esa jọ i te weze bru ai ze. Abraham o te zizie ai nọ a wẹriẹ re a serihọ evaọ otọ ure jọ, jẹ re ememu. Kọ whọ riẹ ahwo nọ erara na a jọ? Erara na yọ ikọ-odhiwu! A ta kẹ Abraham nọ: ‘Oke utiona evaọ ukpe notha, whẹ avọ aye ra wha ti wo ọmọzae.’ Sera ọ jẹ jọ eva uwou-udhu na yo ẹme nọ a be ta na. Sera ọ tẹ hwẹ, ọ tẹ ta kẹ omariẹ nọ: ‘Kọ mẹ sai gbe yẹ ọmọ nọ mẹ who no na?’

Ukpe nọ u lele i rie, Sera o te gine yẹ ọmọzae wọhọ epanọ ukọ-odhiwu Jihova ọ ta na. Abraham o te se ọmọ na Aiziki, yọ otofa odẹ na họ “Ehwẹ.”

Okenọ Aiziki ọ jọ oware wọhọ ikpe isoi, Sera ọ tẹ ruẹ nọ Ishmẹl ọ be rọ Aiziki zaharo. Fikinọ Sera ọ gwọlọ thọ ọmọzae riẹ, ọ tẹ ta kẹ Abraham nọ o le Hega avọ Ishmẹl no uwou na. Evaọ oke ọsosuọ, o were Abraham ho. Rekọ Jihova ọ tẹ ta kẹ Abraham nọ: ‘Gaviezọ kẹ Sera. Mẹ te rẹrote Ishmẹl. Rekọ ẹkwoma Aiziki me ti ro ru eyaa nọ mẹ ya kẹ owhẹ na gba.’