Ikpe udhuvẹ (40) Aiziki ọ jọ nọ ọ rọ rehọ Rebeka aye riẹ. O you rie gaga. Nọ oke jọ o vrẹ no, a te yẹ emezae ivẹ. Aimava na ejime.

Odẹ ọrọ ọkpako Esọ, odẹ ọrọ ọmaha kọ Jekọp. Whọ rẹ kake ruẹ Esọ evaọ uwou hu, keme o re kpobọ ẹwọ nyai kpe erao. Rekọ Jekọp o re no uwou hu.

Evaọ oke yena, nọ ọsẹ o te whu, ọmọzae ọkpako họ ọnọ a rẹ ghale etọ gbe igho nọ e mai bu kẹ. Oye a re se ukuoriọ. Evaọ uviuwou Aiziki, nọ orọnọ Esọ họ ọmọzae ọkpako na, ọye ọ hae reuku eyaa nọ Jihova ọ ya kẹ Abraham na. Ghele na, Esọ o rri eyaa yena te oware ovo ho, rekọ Jekọp o rri eyaa na ghaghae.

Ẹdẹ jọ nọ Esọ o no obọ ẹwọ ze, yọ oma o lọhọ e riẹ no. O te yo ore emamọ emu nọ Jekọp o je there, ọ tẹ ta kẹe nọ: ‘Ohọo u kpe omẹ whu no! Kẹ omẹ izuwo ewawae jọ mẹ re!’ Jekọp ọ tẹ ta kẹe nọ: ‘Mẹ te kẹ owhẹ, rekọ kake ya eyaa kẹ omẹ nọ me ti wo ukuoriọ ra.’ Esọ ọ tẹ ta nọ: ‘Ukuoriọ yọ oware ovo kẹ omẹ hẹ! Whọ be rehọ whọ rehọ. Thakpe kẹ omẹ emu mẹ re.’ Kọ who roro nọ oware areghẹ Esọ o ru na? Ijo, oware areghẹ vievie he. Esọ ọ rọ fiki omodhe emu gheghe ku oware nọ o rrọ ghaghae kufiẹ.

Okenọ Aiziki ọ who gaga no, ọ tẹ gwọlọ nọ ọ rẹ ghale ọmọzae ọkpako riẹ. Rekọ Rebeka o te ru nọ Aiziki ọ rọ ghale Jekọp nọ ọ rrọ ọmọzae ọmaha, ukpenọ ọ rẹ ghale Esọ. Nọ Esọ ọ te riẹ nọ ọsẹ riẹ ọ rọ eghale riẹ kẹ Jekọp no, eva e tẹ dhae gaga, ọ tẹ gwọlọ nọ o re kpe Jekọp no. Fikinọ Aiziki avọ Rebeka a gwọlọ thọ Jekọp, a tẹ ta kẹe nọ: ‘Dhẹ kpobọ Leban oniọvo-oni ra, re who lele iei rria bẹsenọ ofu Esọ o re kpotọ.’ Jekọp ọ gaviezọ kẹ ọsẹgboni riẹ, ọ tẹ dhẹ re ọ sae zọ.

Jihova ọ ya eyaa kẹ Jekọp nọ ọ te jọ kugbei wọhọ epanọ ọ jọ kugbe Abraham avọ Aiziki na. Jekọp ọ tẹ jẹ rria ẹwho nọ a re se Heran, ọ tẹ jọ etẹe wo aye, yẹ emọ, je fe gaga.

Nọ oke jọ o vrẹ no, Jihova ọ tẹ ta kẹ Jekọp nọ: ‘Zihe kpobọ ẹwho ra.’ Fikiere, Jekọp avọ uviuwou riẹ a tẹ ruọ edhere muhọ ezihe kpo. Nọ a nya te oria jọ no, ahwo jọ a tẹ nyaze te vuẹ Jekọp nọ: ‘Esọ oniọvo ra ọ be nyaze, yọ ezae egba ene (400) e rrọ kugbei.’ Ozọ u te mu Jekọp gaga inọ Esọ ọ be nyaze ti kpei avọ uviuwou riẹ no. Ọ tẹ lẹ se Jihova nọ: ‘Ivie siwi omẹ no obọ oniọvo mẹ.’ Ẹdẹ nọ o lele i rie, Jekọp o te vi igodẹ, ewe, imẹlu, ekamẹle, gbe eketekete buobu se Esọ.

Okenọ Jekọp ọvo ọ jọ oria evaọ aso ẹdẹ yena, ọ tẹ ruẹ ukọ-odhiwu jọ. Ukọ-odhiwu na avọ Jekọp a te mu abọ họ emu. A muabọ bẹsenọ oke o rọ ke. Dede nọ Jekọp ọ nwoma, ọ kẹ ukọ-odhiwu na uvẹ hẹ. Ukọ-odhiwu na ọ tẹ ta kẹe nọ: ‘Siobọno omẹ mẹ nyavre.’ Rekọ Jekọp ọ tẹ ta kẹe nọ: ‘Ijo, whọ rẹ ghale omẹ taure me te siobọno owhẹ.’

Ukuhọ riẹ, ukọ-odhiwu na ọ tẹ ghale Jekọp. Onana u ru Jekọp riẹ nọ Jihova ọ te kuvẹ re Esọ o kpei hi.

Ohiohiẹ ẹdẹ yena, Jekọp ọ tẹ jọ ugbothabọ ruẹ Esọ avọ ezae egba ene (400) nọ e rrọ kugbei. Jekọp ọ tẹ kake nyabru Esọ yọ ahwo uviuwou riẹ a rrọ obemu, o te guzou kpotọ kẹe isiahrẹ. Esọ ọ tẹ dhẹ bru Jekọp jẹ nabe gbalọ iẹe. Aimava a tẹ va ruọ oviẹ, a tẹ ruẹrẹhọ kugbe ohwohwo. Ẹvẹ who roro nọ Jihova o rri oghẹrẹ nọ Jekọp ọ rọ ruẹrẹhọ kugbe oniọvo riẹ na?

Ukuhọ riẹ, Esọ o te zihe kpobọ uwou riẹ, Jekọp o te zihe kpohọ uwou riẹ re. Jekọp o yẹ emezae ikpegbivẹ (12). Edẹ rai họ Rubẹn, Simiọn, Livae, Juda, Dan, Naftalae, Gad, Asha, Isaka, Zẹbulọn, Josẹf, gbe Bẹnjamin. Ọnọ a re se Josẹf evaọ usu rai na, Jihova o ro siwi ahwo riẹ. Kọ whọ riẹ oghẹrẹ nọ o ro ru ei? Ma ti se kpahe onana evaọ obaro.