Enọ Ahwo nọ A s’Ebe

Eme Itẹ 24:27 u wuhrẹ omai?

Okenọ ọnọ o kere obe Itẹ ọ jẹ hrẹ ọmoha jọ, ọ ta nọ: “Jọ eva otafe ruẹrẹ iruo rahọ, jọ obọ ẹwọ ruẹrẹ eware kpobi họ; taure whọ tẹ bọ uwou ra.” Eme Itẹ nana o bi wuhrẹ omai? Inọ ọzae ọ rẹ ruẹrẹ oma kpahe ziezi taure o te ti wo aye je mu emọ họ eyẹ, keme ọ riẹ nnọ ọ rẹ rẹrote ai.

Evaọ okenọ u kpemu, ma jẹ hae f’otọ owọ Ebaibol nana ẹsejọ inọ u dhesẹ epanọ ọzae nọ o wo emọ ọ rẹ rọ daoma ru iruo rọ kuọ uviuwou riẹ ọ vẹ jẹ bọ uviuwou riẹ ga ẹkwoma ẹme Ọghẹnẹ nọ o re ro wuhrẹ ai. Dede nọ ere u gine fo nọ ọzae o re ru, o wọhọ nọ oye họ otofa owọ Ebaibol nana ha. Fikieme ma rọ ta ere? Joma ta kpahe ẹjiroro ivẹ.

Orọ ọsosuọ, orọnikọ owọ Ebaibol yena o be ta kpahe ẹbọga uviuwou nọ ohwo o wo no ho. Rekọ o wọhọ nọ o be ta kpahe epanọ a rẹ bọ uwou. Ẹme nọ a fa nnọ “bọ” na o sai je dhesẹ epanọ ọzae o re ro wo uviuwou, koyehọ ẹkwoma aye nọ o re wo o ve je yẹ emọ.

Orọ avivẹ, owọ Ebaibol na o be ta inọ u fo re a ru eware othotha, epaọ ẹsenọ o be ta nọ, “Kaki ru onana; kẹsena who ve ru oyena.” Kọ o sae jọ nọ itẹ nana o be ta nnọ iruo abọ mai e rẹ karo kẹ eware abọ-ẹzi? Vievie!

Evaọ oke emọ Izrẹl, ọzae ọ tẹ gwọlọ “bọ uwou” riẹ, koyehọ ọ tẹ gwọlọ wo ẹkẹ uviuwou riẹ, u re woma re ọ nọ oma riẹ nọ, ‘Kọ mẹ sae te ko aye gbe emọ nọ ma bi ti yẹ?’ Re o te ti wo aye, ọ rẹ rẹrote idhu riẹ. Oye jabọ nọ Ebaibol ọ Today’s English Version o rọ fa itẹ na gbiae nọ: “Re who te ti wo aye je yẹ emọ, ruẹ nnọ ekakọ ra e who no gbe nnọ whọ sae te ko uviuwou ra.” Kọ ẹme nana o gbe w’iruo nẹnẹ?

Ee. Ọzae nọ ọ gwọlọ wo aye ọ rẹ ruẹrẹ oma kpahe ziezi kẹ owha-iruo nana. Oma riẹ ọ tẹ rrọ kọkọ, o re ru iruo. Dede na, orọnikọ thakpinọ ọ rehọ emuore ko uviuwou riẹ ọvo ho. Ebaibol e ta inọ ọzae nọ ọ be sae rẹrote uviuwou riẹ hẹ evaọ abọ-iwo, abọ-ẹzi gbe eware omosasọ o yoma vi ohwo nọ o wo ẹrọwọ họ! (1 Tim. 5:8) Fikiere nọ ọmoha ọ tẹ be ruẹrẹ oma kpahe kẹ orọo, ọ rẹ nọ oma riẹ nọ: ‘Kọ mẹ sae te ginẹ rẹrote uviuwou? Kọ mẹ ruẹrẹ oma kpahe no re me fi obọ họ kẹ uviuwou gọ Ọghẹnẹ? Kọ mẹ sai ti ru uwuhrẹ Ebaibol kugbe aye gbe emọ mẹ?’ Ebaibol i dhesẹ inọ enana yọ ewha-iruo nọ ọzae uwou-orọo ọ rẹ rẹriẹ ovao ku hrọ.—Izie. 6:6-8; Ẹf. 6:4.

Fikiere ọmoha nọ o bi wo iroro aye ọ rẹ roma totọ roro kpahe ehri-uzi nọ o rrọ Itẹ 24:27 na. Epọvo na re, u re woma re ọmọtẹ ọ nọ oma riẹ sọ ọ ruẹrẹ oma kpahe no re ọ jọ aye uwou-orọo gbe oni. Ọzae avọ aye nọ e rọo obọ a rẹ nọ oma rai enọ evona nọ a tẹ be jiroro emọ. (Luk 14:28) Idibo Ọghẹnẹ a te bi roro kpahe ekpọvio nana o rẹ sai fi obọ họ kẹ ae whaha idhọvẹ a vẹ jẹ reawere emamọ uzuazọ uviuwou.

[Ẹme nọ a fi ẹgba họ nọ ọ rrọ ẹwẹ-obe avọ 12]

Didi enọ kpahe orọo ọmoha ọ rẹ nọ oma riẹ?