Josẹf yọ ọmọ Jekọp evaọ usu emọ emaha riẹ. Inievo ekpako riẹ a riẹ nọ Josẹf ọsẹ rai ọ mai you. Kọ who roro nọ eva e jẹ were ae? Vievie! A jẹ re Josẹf ihri gaga yọ a mukpahe iẹe. Nọ Josẹf ọ wezẹ ewezẹ jọ, ọ tẹ vuẹ inievo riẹ kpahe ewezẹ na. A te roro nọ otọ ewezẹ na họ, ẹdẹ jọ aikpobi a ti guzou kpotọ kẹ Josẹf. Onana o tẹ lẹliẹ ai mukpahe Josẹf vrẹta!

Ẹdẹ jọ inievo Josẹf a tẹ jẹ rẹrote igodẹ ọsẹ rai evaọ oria jọ nọ ọ kẹle okpẹwho Shẹkẹm. Jekọp o te vi Josẹf nyabru inievo riẹ re ọ riẹ epanọ eware e rrọ kẹ ae. Nọ a jọ ugbo ruẹ Josẹf nọ ọ be nyaze, a tẹ ta kẹ ohwohwo nọ: ‘Ọwezẹ-ewezẹ na ọ be nyaze na. Ma kpei no.’ A te kru ei, a te gbolo iei fihọ ọgọdọ odidi jọ. Rekọ oniọvo riẹ jọ nọ a re se Juda ọ tẹ ta nọ: ‘Ma kpei hi, ma zẹe kpohọ igbo.’ Fikiere a tẹ zẹ Josẹf ewẹ isiliva udhe (20) rọkẹ ihreki ahwo Midian nọ a je kpobọ Ijipti.

Inievo Josẹf a te duwu ewu Josẹf họ azẹ ẹwe, a tẹ whae se ọsẹ rai, a tẹ nọe nọ: ‘Kọ ogbẹrọnọ nọ ewu ọmọzae ra?’ Fikiere Jekọp o te roro nọ arao ojihẹ jọ o kpe Josẹf no. Onana o lẹliẹ Jekọp viẹ gaga. Ohwo ọvo ọ sae jẹ sasa iẹe oma ha.

Nọ ahwo Midian a te obọ Ijipti, a tẹ zẹ Josẹf kẹ ohwo ologbo jọ nọ a re se Pọtifa. Rekọ Jihova ọ jọ kugbe Josẹf. Pọtifa o te muẹrohọ nọ Josẹf o re ruiruo ziezi, yọ a rẹ sai fievahọ iẹe. U kri hi, Pọtifa ọ tẹ rehọ Josẹf mu ọnọ o wuzou uwou riẹ soso.

Aye Pọtifa o te muẹrohọ nọ Josẹf o wo erru gaga yọ ọ goma ziezi. Fikiere kẹdẹ kẹdẹ ọ jẹ ta kẹ Josẹf nọ o lele ei wezẹ. Kọ eme Josẹf o ru? Ọ se thahethahe, jẹ ta kẹ aye Pọtifa nọ: ‘Ijo! Oware nọ whọ be ta nọ ma ru na u woma ha. Whẹ yọ aye olori mẹ, yọ olori mẹ o fievahọ omẹ. Me te lele owhẹ wezẹ, mẹ te thọ uzi Ọghẹnẹ!’

Ẹdẹ jọ, aye Pọtifa ọ tẹ jẹ gwọlọ gba Josẹf họ re o lele iei wezẹ. Ọ tẹ jabọ kru ewu riẹ, rekọ Josẹf ọ tẹ dhẹ se iẹe ba. Nọ Pọtifa o kpozi, aye riẹ o te gu nọ Josẹf ọ jẹ gwọlọ gbae họ lele iei wezẹ. Rekọ ọrue ọ ta na. Eva e tẹ dha Pọtifa gaga, o te gbolo Josẹf họ uwou-odi. Rekọ Jihova ọ nyasiọ Josẹf ba ha.

Okenọ Josẹf ọ jọ uwou-odi na, ovie Ijipti nọ a re se Fẹro ọ tẹ wezẹ ewezẹ jọ nọ ohwo ọvo ọ jẹ sae fotọ rai hi. Odibo Fẹro jọ ọ tẹ ta kẹe nọ Josẹf ọ sae fotọ ewezẹ na. Fẹro o te vi ohwo nyai se Josẹf vẹrẹ vẹrẹ.

Fẹro ọ tẹ nọ Josẹf nọ: ‘Kọ whọ sae fotọ ewezẹ mẹ na?’ Josẹf ọ tẹ fotọ ewezẹ na kẹ Fẹro inọ: ‘Emu ọ te vọ Ijipti ikpe ihrẹ soso, rekọ ikpe ihrẹ nọ i ti lele ei, ohọo o vẹ te jọ Ijipti. Fikiere rehọ ohwo jọ nọ o wo areghẹ gaga mu, re o koko emu buobu họ nọ ahwo a te re evaọ ikpe ihrẹ nọ ohọo o te jọ na.’ Fẹro ọ tẹ ta kẹ Josẹf nọ: ‘Whẹ mẹ salọ! Whọ te jọ osu nọ ọ kẹle omẹ evaọ ẹkwotọ Ijipti soso!’ Ẹvẹ Josẹf ọ sae rọ riẹ oware nọ Fẹro ọ wezẹ ewezẹ kpahe? Jihova o fiobọhọ kẹ Josẹf.

Evaọ ikpe ihrẹ nọ emu ọ rọ vọ Ijipti na, Josẹf o te koko emu buobu họ. Ikpe ihrẹ nọ i lele i rie, emu ọ gbẹ jọ oria ovo ho evaọ akpọ na soso, nwanọ wọhọ epanọ Josẹf ọ ta na. Ahwo a je no eria avọ eria ze te dẹ emu mi Josẹf. Nọ Jekọp ọsẹ Josẹf o yo nọ emu ọ rrọ obọ Ijipti, o te vi emezae ikpe riẹ nyae dẹ emu evaọ obei.

Josẹf o vuhu inievo riẹ nọ ọ nwane ruẹ e rai. Rekọ inievo riẹ a vuhu i rie he. A te guzou kpotọ kẹe wọhọ epanọ ọ wezẹ ewezẹ riẹ evaọ okenọ ọ gbẹ jọ ọmaha. Josẹf ọ gwọlọ riẹ sọ inievo riẹ a gbẹ rọ eva gaga. Fikiere ọ tẹ ta kẹ ae nọ: ‘Whai yọ ekiotọ. Wha nyaze te kiẹ orẹwho mai riwi.’ Aikpobi a tẹ ta nọ: ‘Ijo! Mai yọ emọ ikpegbivẹ (12) nọ ọsẹ mai o yẹ, yọ obọ Kenan ma no ze. Oniọvo mai jọ o whu no, yọ ọrọ ọmaha kpobi ọ rrọ obọ uwou kugbe Ọsẹ mai.’ Josẹf ọ tẹ ta kẹ ae nọ: ‘Wha nyae rehọ ọrọ ọmaha na se omẹ re mẹ riẹ nọ uzẹme wha be ta.’ Fikiere a te zihe kpo bru ọsẹ rai.

Whaọ nọ emu rai ọ wariẹ re no, ọsẹ rai Jekọp ọ tẹ wariẹ vi ae zihe kpobọ Ijipti. Kẹsena a tẹ wha Bẹnjamin ọrọ ọmaha na lele oma. Re ọ riẹ sọ inievo riẹ a gine nwene no, Josẹf o te fi egho isiliva riẹ fihọ ẹkpa emu Bẹnjamin, kẹsena ọ tẹ ta nọ inievo riẹ a tho egho na. Nọ idibo Josẹf a gwọlọ ku egho na evaọ ẹkpa Bẹnjamin, akpọ o te gbe inievo Josẹf unu. A tẹ lẹ Josẹf nọ ọ kẹ ae uye ukpenọ ọ rẹ kẹ Bẹnjamin uye.

Onana u te ru Josẹf riẹ nọ inievo riẹ a nwene no. Josẹf ọ gbẹ sae gba oma riẹ hẹ. O te muhọ ẹviẹ jẹ ta nọ: ‘Mẹ yọ Josẹf, oniọvo rai. Kọ ọsẹ mẹ ọ gbẹ rrọ uzuazọ?’ Akpọ o te gbe inievo riẹ unu. Josẹf ọ tẹ ta kẹ ae nọ: ‘O kẹ owhai uye he inọ wha zẹ omẹ. Ọghẹnẹ o vi omẹ ziọ obonẹ ti siwi uzuazọ rai. Wha nyae rehọ ọsẹ mẹ ze ovovẹrẹ.’

A te kpo nyae vuẹ ọsẹ rai nọ Josẹf ọ gbẹ rrọ uzuazọ, yọ Josẹf ọ gwọlọ nọ a rehọ iẹe ziọ obọ Ijipti. Josẹf avọ ọsẹ riẹ a tẹ wariẹ ruẹ ohwohwo dede nọ ikpe buobu e vrẹ no.