Ọzae jọ ọ jariẹ nọ ọ jẹ gọ Jihova evaọ ẹwho nọ a re se Ọz. Odẹ riẹ Job. O fe gaga yọ o yẹ emọ buobu. Ọ jọ wowou, yọ o je fiobọhọ kẹ iyogbe, eyae nọ ezae rai i whu no, gbe emọ nọ esẹgbini rai i whu no. Fikinọ Job ọ jọ emamọ ohwo, kọ onana u dhesẹ nọ oware uyoma ovo o rẹ via kẹe he?

Setan ẹdhọ na o je muẹrohọ Job kiọkiọkiọ dede nọ Job ọ riẹ hẹ. Ẹdẹ jọ Jihova ọ tẹ nọ Setan nọ: ‘Kọ whọ be ruẹ Job odibo mẹ? Ohwo ọvo nọ ọ wọhọ e riẹ evaọ akpọ na ọ rrọ họ. O re yoẹme kẹ omẹ je ru oware nọ u kiehọ.’ Setan o te yo kẹ Jihova nọ: ‘Mẹ riẹ nọ Job o bi yoẹme kẹ owhẹ. Keme whọ be thọe jẹ be ghale iẹe. Whọ rehọ etọ gbe erao ghale iẹe. Who te mi ei eware nana kpobi, ọ te gbẹ gọ owhẹ hẹ.’ Jihova ọ tẹ ta kẹe nọ: ‘Mẹ kẹ owhẹ uvẹ nọ whọ dawo iẹe, rekọ who kpei hi.’ Fikieme Jihova ọ rọ kẹ Setan uvẹ re ọ dawo Job? Keme u mu rie ẹro nọ Job o ti kru ẹrọwọ riẹ te urere.

Setan ọ tẹ rehọ eware iyoma sa-sa dawo Job. Orọ ọsosuọ, o vi ahwo Sabian nyai tho iruẹ gbe eketekete Job. Kẹsena, o te vi erae no ehru ze ro kpe igodẹ riẹ kpobi. U no ere no, ahwo Kaldia a tẹ nyaze ti tho ekamẹle riẹ. A te kpe idibo Job nọ e jẹ rẹrote erao na. Kẹsena oware nọ o mai yoma kpobi o tẹ via. Uwou nọ emọ Job a kokohọ je ru ehaa, u te kie ruru ai, a te whu. Eware nọ e via kẹ Job na e da riẹ gaga, rekọ ọ gbẹ jẹ gọ Jihova ghele.

Setan ọ gbẹ gwọlọ nọ uye o bẹ Job, fikiere o te fi ela họ oma Job kpobi. Ela na e jẹ da Job gaga. Job ọ riẹ oware nọ eware iyoma nana e be rọ via kẹe he. Rekọ Job ọ gbẹ jẹ gọ Jihova ghele. Fikinọ Job o kru ẹrọwọ riẹ, eva riẹ e were Jihova gaga.

Kẹsena Setan o te vi ezae esa jọ ze te dawo Job. Ezae na a ta kẹ Job nọ: ‘Ẹsejọhọ whọ raha uzi Ọghẹnẹ yọ whọ be gwọlọ kuẹe dhere. Oyejabọ nọ Ọghẹnẹ ọ be rọ kẹ owhẹ uye na.’ Job ọ tẹ ta kẹ ae nọ: ‘Me ru oware ovo thọ họ.’ Rekọ Job o te je roro nọ Jihova ọ be wha ebẹbẹ riẹ ze, jẹ ta nọ Ọghẹnẹ o bi kienyẹ iẹe.

Nọ a be ta kpobi na yọ ọmọzae jọ nọ a re se Elaihu, o fibo be gaviezọ ọvo. Kẹsena ọ tẹ ta kẹ ae nọ: ‘Eware nọ wha ta na uzẹme he. Jihova o kpehru vi omai, yọ o wo areghẹ vi omai. O re ru oware uyoma vievie he. Ọ be ruẹ oware kpobi, yọ o re fiobọhọ kẹ ahwo nọ a wo ebẹbẹ.’

Kẹsena Jihova ọ tẹ ta ẹme kẹ Job. Jihova ọ nọ Job nọ: ‘Diẹse whọ jọ okenọ mẹ rọ ma odhiwu gbe otọakpọ na? Fikieme whọ rọ ta nọ me bi kienyẹ owhẹ? Whọ be ta ẹme, rekọ whọ riẹ oware nọ eware iyoma e be rọ via ha.’ Job ọ rọwo nọ ọ ta thọ inọ: ‘Me ruthọ. Me yo kpahe owhẹ no vẹre, rekọ enẹna mẹ ginẹ riẹ owhẹ no. Oware ovo o rẹ bẹ owhẹ eru hu. Ivie rọvrẹ omẹ mẹ ta thọ.’

Nọ edawọ na i kuhọ no, Jihova ọ tẹ wariẹ ru oma Job woma zihe, jẹ ghale iẹe vi epaọ ọsosuọ. Job ọ rria kri gaga yọ eva e jẹ were iẹe. Jihova ọ ghale Job fikinọ o yoẹme kẹe makọ okenọ eware iyoma e jẹ via kẹe. Kọ whọ te rọ aro kele Job gọ Jihova makọ oware kpobi nọ o via kẹhẹ?

Evaọ obọ Ijipti, a je se uviuwou Jekọp ahwo Izrẹl. Nọ Jekọp avọ Josẹf a whu no, Fẹro ọfa o te muhọ esu. Ozọ u je mu ei inọ ahwo Izrẹl a te ga vi ahwo Ijipti. Fikiere Fẹro nana o te zihe ahwo Izrẹl ruọ erigbo. Ọ gba rai họ nọ a ma ibriki je ru iruo egaga evaọ idhu ahwo Ijipti. Rekọ epanọ ahwo Ijipti a gba ahwo Izrẹl họ ru iruo te, ere ahwo Izrẹl a bu ga te. Fikinọ o were Fẹro ho, o te jie uzi nọ ohwo Izrẹl o te yẹ ọmọzae, jọ a kpei no. Dai roro kpahe epanọ ozọ u mu ahwo Izrẹl te fiki uzi nana!

Aye Izrẹl jọ nọ a re se Jokebẹd o te yẹ ọmọzae, yọ ọmọ na o wo erru gaga. Re a siọ ọmọ na ba ekpe, ọ tẹ wọ ọmọ na họ ekete, kẹsena o te si ei no họ udevie ikpoko evaọ akotọ Ethẹ Naele. Oniọvo ọmọ na nọ a re se Miriam o te dhere akotọ re ọ ruẹ oware nọ o te via.

Nọ ọmọtẹ Fẹro ọ nyaze te họ evaọ ethẹ na, ọ tẹ ruẹ ekete na. Nọ ọ ruẹ ọmọ nọ ọ rrọ ekete na be viẹ, ohrọ ọmọ na o tẹ riẹe gaga. Miriam ọ tẹ nọ ọmọtẹ Fẹro nọ: ‘Kọ mẹ nyai se aye jọ ze re ọ yọrọ ọmọ na kẹ owhẹ?’ Nọ ọmọtẹ Fẹro ọ ta nọ ee, Miriam ọ tẹ nyai se Jokebẹd oni riẹ ze. Ọmọtẹ Fẹro ọ tẹ ta kẹ Jokebẹd nọ: ‘Wọ ọmọ na kpo re whọ yọrọ iẹe kẹ omẹ, mẹ te hwosa kẹ owhe.’

Nọ ọmọ na ọ rro no omojọ, Jokebẹd ọ tẹ rehọ iẹe se ọmọtẹ Fẹro. Ọmọtẹ Fẹro o te se odẹ ọmọ na Mosis jẹ yọrọ iẹe wọhọ ọmọ obọriẹ. Mosis o te zihe ruọ ọmọ-ovie, yọ oware kpobi nọ ọ gwọlọ u re tei obọ. Rekọ Jihova ọ thọrọ Mosis ẹro ho. Ọ riẹ nọ ọyomariẹ yọ ohwo Izrẹl orọnikọ ohwo Ijipti hi. Ọ tẹ salọ nọ ọ rẹ gọ Jihova.

Nọ Mosis o te ikpe udhuvẹ (40) no, ọ tẹ gwọlọ nọ o re fiobọhọ kẹ ahwo riẹ. Ẹdẹ jọ nọ ọ ruẹ ohwo Ijipti nọ ọ be họre ohwo Izrẹl, Mosis o te kpe ohwo Ijipti na no. Kẹsena ọ tẹ whẹ ẹkpẹ ruru ori ohwo Ijipti na. Nọ Fẹro o yo kpahe oware nana, ọ tẹ gwọlọ nọ o re kpe Mosis no. Rekọ Mosis ọ tẹ dhẹ kpobọ ẹkwotọ Midian. Jihova ọ rẹrotei evaọ obei.