Mosis avọ Erọn a tẹ nyae ta kẹ Fẹro nọ Ọghẹnẹ ọ ta nọ: ‘Who gbe siobọno ahwo mẹ kpo ho, me ti vi ere-eni ziọ ẹkwotọ na.’ Ere-eni buobu e tẹ vọ iwou ahwo Ijipti, te iwou edafe te iwou iyogbe. Ere-eni e tẹ vọ oria kpobi evaọ Ijipti. Rekọ ere-eni na e jọ obọ Goshẹn nọ ahwo Izrẹl a jẹ rria ha. No umuo uye avọ ene na vrẹ, ahwo Ijipti ọvo iye na i je te. Fẹro ọ tẹ lẹ Mosis nọ: ‘Lẹ Jihova re o si inyẹ na no. Ahwo ra a sai kpo.’ Rekọ nọ Jihova o si ere-eni na no, Fẹro ọ rọwo siobọno ahwo Izrẹl kpo ghele he. Kọ Fẹro o ti siobọno ahwo Izrẹl kpo ẹdẹ jọ?

Jihova ọ tẹ ta nọ: ‘Fẹro ọ gbẹ rọwo siobọno ahwo mẹ kpo ho, erao ahwo Ijipti i ti kie ẹyao i ve whu.’ Nọ oke o ke, erao ahwo Ijipti i te gine muhọ ewhu. Rekọ erao ahwo Izrẹl i whu hu. Ghele na, Fẹro o ru udu gaga, ọ rọwo siobọno ahwo Izrẹl kpo ho.

Jihova ọ tẹ ta kẹ Mosis nọ ọ nyabru Fẹro, re ọ jọ iraro riẹ frẹ enwo fihọ ofou na. Enwo na o te zihe ruọ ovu nọ ọ vọ oria kpobi evaọ Ijipti. Enwo na o te bru ela nọ e jẹ da gaga fihọ ahwo Ijipti kpobi oma gbe erao rai. Rekọ Fẹro ọ rọwo siobọno ahwo Izrẹl kpo ghele he.

Jihova ọ tẹ wariẹ vi Mosis bru Fẹro re ọ nyae ta kẹe nọ: ‘Whọ gbẹ be se nọ who re siobọno ahwo mẹ kpo? Odẹnotha oso-itho ọ te rrọ ku ẹkwotọ na.’ No oke o ke, Jihova o te vi oso-itho, egbrara, gbe erae ze. Oghẹrẹ oso otiọna ọ re rrọ evaọ Ijipti ẹdẹvo ho. Oso na o te kpe ire gbe ekakọ nọ e jọ Ijipti kpobi no, rekọ o te obọ Goshẹn nọ ahwo Izrẹl a jẹ rria ha. Fẹro ọ tẹ ta nọ: ‘Lẹ Jihova re oso na ọ ka! Kẹsena wha ve kpo.’ Rekọ nọ oso-itho na ọ nwane ka no, Fẹro ọ se ghele nọ o re siobọno ahwo Izrẹl kpo.

Mosis ọ tẹ ta kẹe nọ: ‘Ebaka-ẹkpẹ e te re ekakọ kpobi nọ oso-itho na ọ raha kiọkọ.’ Ebaka-ẹkpẹ buobu gbidigbidi e tẹ re eware kpobi nọ i kiọkọ idhu gbe ire na no. Fẹro ọ tẹ lẹ Mosis nọ: ‘Lẹ Jihova re o si ebaka-ẹkpẹ nana no.’ Rekọ nọ Jihova ọ maki si ebaka-ẹkpọ na no, Fẹro o gbe ru udu riẹ gaga ghele, ọ rọwo siobọno ahwo Izrẹl kpo ho.

Jihova ọ tẹ ta kẹ Mosis nọ: ‘Riẹ obọ ra rri ehru.’ Ẹsiẹvo na, oria kpobi u te muebi. Edẹ esa soso, a jẹ ruẹ ohwohwo ho, yọ a jẹ ruẹ oware ovo gbe he. Rekọ elo ọ jọ obonọ ahwo Izrẹl a jẹ rria.

Fẹro ọ tẹ ta kẹ Mosis nọ: ‘Whẹ avọ ahwo ra wha sai kpo. Rekọ wha nyasiọ erao rai ba.’ Mosis ọ tẹ ta kẹe nọ: ‘Ma rẹ wha erao mai lele oma re ma sae rehọ ae dhe idhe kẹ Ọghẹnẹ mai.’ Eva e tẹ dha Fẹro gaga. O te doku Mosis inọ: ‘No etenẹ no ovẹrẹ! Mẹ tẹ wariẹ ruẹ owhẹ ofa, me ti kpe owhẹ no.’

Mosis ọ ta kẹ Fẹro nọ ọ te gbẹ wariẹ nyabru ei ze he. Rekọ taure o te no ọgwa Fẹro, ọ tẹ ta kẹ Fẹro nọ: ‘Evaọ obọ udevie aso, ọmọ ọsosuọ kpobi evaọ Ijipti o ti whu, no ọmọzae Fẹro rite emezae erigbo na.’

Jihova ọ tẹ ta kẹ ahwo Izrẹl nọ a re emu obọdẹ jọ. Ọ ta kẹ ae inọ: ‘Wha kpe ogodẹ ọzae hayo ẹwẹ ọzae nọ o te ukpe ovo no, re wha rehọ azẹ riẹ jọ wholo unuẹthẹ rai. Wha rẹ tọe, wha vẹ re iẹe avọ ebrẹdi nọ e kare ẹvi. Wha ku iwu rai họ je ku eviẹ rai họ, re wha ruẹrẹ oma kpahe kẹ ekpo. Aso ọnana me ti si owhai no igbo.’ Kọ eva e gbẹ te were ahwo Izrẹl na gaga?

Evaọ udevie aso, ukọ-odhiwu ukọ-odhiwuJihova ọ tẹ nya iwou ahwo Ijipti kpobi wariẹ. Uwou kpobi nọ a rọ azẹ wholo unuẹthẹ riẹ hẹ, ukọ-odhiwu na o kpe ọmọ ọsosuọ nọ ọ rrọ uwou yena. Rekọ ukọ-odhiwu na ọ nyavrẹ uwou kpobi nọ a rọ azẹ wholo unuẹthẹ riẹ. Evaọ iwou ahwo Ijipti kpobi, te edafe te iyogbe, ọmọ ọsosọ rai o whu. Rekọ emọ ahwo Izrẹl i whu hu.

Makọ ọmọzae Fẹro dede o whu re. O da Fẹro gaga nọ ọmọ riẹ o whu. O te se Mosis avọ Erọn, ọ tẹ ta kẹ ae inọ: ‘Wha kwa ewha rai wha kpo. Wha nyae gọ Ọghẹnẹ rai. Wha tọlọ erao rai re wha nyavrẹ!’

Evaọ aso yena nọ ọvẹre o bi lo na, ahwo Izrẹl a tẹ nya no Ijipti, yọ a ruẹrẹ rai họ unuwou avọ unuwou gbe orua avọ orua. Ezae Izrẹl nọ i no Ijipti a bu te idu egba ezeza (600,000), avọ eyae gbe emaha buobu. Ahwo Ijipti buobu dede a lele ahwo Izrẹl re a gọ Jihova re. Whaọ enẹna ahwo Izrẹl a no igbo no!

Kukpe kukpe ahwo Izrẹl a rẹ re oghẹrẹ emu nọ a re nọ a je no Ijipti. A jẹ hae rọ emu nana kareghẹhọ oghẹrẹ nọ Jihova o ro siwi ai no igbo Ijipti. A je sei Ehaa Ọnyavrẹ.