Jihova ọ tẹ ta kẹ Mosis nọ: ‘Nyabru omẹ ziọ obọ ugbehru na. Me ti kere izi mẹ họ ekpala itho, mẹ vẹ rehọ ai kẹ owhẹ.’ Mosis ọ tẹ gadiẹ kpobọ ugbehru na jẹ rria obei edẹ udhuvẹ (40) gbe aso udhuvẹ (40). Evaọ okenọ ọ rọ jọ obei na, Jihova o te kere Izi Ikpe na fihọ ekpala itho ivẹ, ọ tẹ rehọ ai kẹ Mosis.

Nọ omoke jọ o vrẹ no, ahwo Izrẹl a te roro nọ Mosis ọ dhẹ siọ ai ba no. A tẹ ta kẹ Erọn nọ: ‘Ma gwọlọ ohwo nọ o re su omai. Ru ọghẹnẹ kẹ omai!’ Erọn ọ tẹ ta nọ: ‘Wha kẹ omẹ igoru rai.’ Erọn ọ tẹ ghra igoru na, jẹ rehọ iẹe ma ọmọ-eruẹ. Ahwo na a tẹ ta nọ: ‘Ọmọ-eruẹ nana họ Ọghẹnẹ mai nọ o su omai no Ijipti ze!’ A te mu ọmọ-eruẹ igoru na họ ẹgọ, yọ a bi ru ehaa. Kọ oware nọ a ru na u woma? Ijo, keme a ya eyaa kẹ Jihova nọ ọye ọvo a te gọ. Rekọ obọnana a bi ru eyaa rai gba ha.

Jihova ọ ruẹ oware nọ a je ru na, fikiere ọ tẹ ta kẹ Mosis nọ: ‘Nwrotọ bru ahwo na. A bi yoẹme kẹ omẹ hẹ, a mu ọghẹnẹ ọrue họ ẹgọ no.’ Mosis o te nwrotọ no obọ ugbehru na ze, yọ ọ wọ ekpala itho ivẹ na họ abọ.

Nọ ọ kẹle oria nọ ahwo na a rrọ no, o te yo edo ahwo nọ a be so ile. Kẹsena ọ tẹ ruẹ ahwo na nọ a bi gbile yọ a bi guzou kpotọ kẹ ọmọ-eruẹ igoru na. Eva e tẹ dha Mosis gaga. Ọ tẹ rọ ekpala itho ivẹ na fi otọ, e tẹ bẹre ehehẹhẹ. Ọ tẹ rehọ erae mahe ọmọ-eruẹ igoru na. Mosis ọ tẹ nọ Erọn nọ: ‘Eme ahwo nana a ta kẹ owhẹ nọ who ro ru oware uyoma utionana?’ Erọn ọ tẹ ta nọ: ‘Eva e dha owhẹ hẹ. Whọ riẹ oghẹrẹ nọ ahwo nana a rrọ. A gwọlọ ọghẹnẹ nọ o re su ai, fikiere me te gbolo igoru nọ a kẹ omẹ fihọ erae, ọmọ-eruẹ nana o te noi ze!’ Oware nọ Erọn o ru na u woma ha. Mosis o te zihe kpobọ ugbehru na nyae lẹ Jihova re ọ rọvrẹ ahwo na.

Jihova ọ rọvrẹ ahwo nọ u no eva ze nọ a re yoẹme kẹe. Kọ whọ gbẹ ruẹ epanọ u wuzou te re ahwo Izrẹl a ru lele ẹme Mosis?

Okenọ Mosis ọ jọ obọ Ugbehru Saena, Jihova ọ tẹ ta kẹe inọ ọ bọ oghẹrẹ uwou jọ nọ a re se uwou-udhu, oria nọ ahwo Izrẹl a sae jọ gọe. A rẹ sae wọ uwou-udhu na lele oma evaọ okenọ a tẹ be nya no oria ruọ oria.

Jihova ọ tẹ ta kẹ Mosis nọ: ‘Ta kẹ ahwo na re a zọhọ eware nọ a sae rọ bọ uwou-udhu na ze.’ Ahwo Izrẹl a tẹ zọhọ igoru, isiliva, ẹroo, itho eghaghae, gbe emero buobu ze. A tẹ jẹ zọhọ ilulu, ehọ elọlọhọ, oviẹ-erao, gbe eware efa buobu ze. Eware nọ a zọhọ ze i bu te epanọ Mosis ọ rọ ta kẹ ai inọ: ‘Eware na i te no! Wha gbẹ rọ ze he.’

Ezae gbe eyae buobu nọ i wo onaa sa-sa, ae a fiobọhọ bọ uwou-udhu na. Jihova ọ kẹ rai areghẹ nọ a sae rọ bọ uwou-udhu na. Ejọ i je zuo ilulu, gbe ehọ elọlọhọ. Efa e jẹ bẹre itho, ghra igoru, yọ ejọ e jẹ kare ire.

Ahwo na a bọ uwou-udhu na wọhọ epanọ Jihova ọ ta kẹ ae. A rehọ ekọtini owowoma jọ ghale uwou-udhu na kpohọ abava, a re se abọjọ Ọrẹri, yọ a re se abọ nọ o kiọkọ Ọrẹri Erẹri. Abọ Ọrẹri Erẹri na a wọ etehe ọvọ na họ, yọ igoru gbe ure akasia a ro ku ei. Whọ rẹ jọ abọ Ọrẹri na ruẹ ukpẹ-adada nọ a rehọ igoru ru, emẹjẹ, gbe agbada-idhe nọ a rẹ jọ mahe insẹnse. Whọ rẹ jọ etegu uwou-udhu na ruẹ odhe nọ a rehọ ẹroo ru, gbe agbada-idhe ologbo. Etehe ọvọ na ọ rẹ kareghẹhọ ahwo Izrẹl eyaa nọ a ya kẹ Jihova inọ ọye ọvo a re yoẹme kẹ. Kọ whọ riẹ oware nọ a re se ọvọ? Ọvọ yọ eyaa nọ i wuzou gaga.

Jihova ọ tẹ salọ Erọn avọ emezae riẹ re a jọ izerẹ nọ i re ru iruo evaọ uwou-udhu na. Ae a rẹ rẹrote uwou-udhu na jẹ jọ eva riẹ dhe idhe kẹ Jihova. Erọn ozerẹ okpehru na ọvo a kuvẹ re ọ ruọ oria Ọrẹri Erẹri na. Ọ rẹ ruọ oria Ọrẹri Erẹri na ẹsiẹvo ẹgbukpe re o dhe idhe izieraha rọkẹ omariẹ, uviuwou riẹ, gbe orẹwho Izrẹl soso.

Anwọ ẹgbukpe soso ọna nọ ahwo Izrẹl a ro no igbo Ijipti ze jẹ bọ uwou-udhu na re. Whaọ obọnana a wo oria nọ a rẹ jọ gọ Jihova no.

Oruaro Jihova o tẹ vọ uwou-udhu na soso, je ru ẹgho romavia evaọ ehru riẹ. Nọ ẹgho na ọ tẹ rrọ ehru uwou-udhu na, ahwo Izrẹl a re no oria nọ a wo họ na ha. Rekọ nọ ẹgho na ọ tẹ kpama, a vẹ riẹ nọ okenọ a re ro kpohọ oria ofa u te no. A vẹ kpare uwou-udhu na no, kẹsena a ve mu ẹgho na họ ẹnya lele.