Nọ ekiotọ Izrẹl na a te okpẹwho Jeriko, a te wo họ uwou aye jọ nọ a re se Rehab. Nọ ovie Jeriko o yo kpahe onana, o te vi isoja riẹ kpobọ uwou Rehab. Rekọ Rehab o te si ekiotọ na no họ ehru uwou riẹ, jẹ ta kẹ isoja na nọ ekiotọ na a nyavrẹ no. Ọ tẹ ta kẹ ekiotọ na nọ: ‘Me ti fiobọhọ kẹ owhai keme mẹ riẹ nọ Jihova ọ rrọ abọ rai, yọ wha ti fi ẹkwotọ na kparobọ. Ivie wha ya eyaa kẹ omẹ nọ wha ti siwi omẹ avọ uviuwou mẹ.’

Ekiotọ na a tẹ ta kẹ Rehab nọ: ‘Ma ya eyaa kẹ owhẹ nọ ohwo kpobi nọ ọ rrọ evaọ uwou ra ọ te zọ.’ A tẹ jẹ ta kẹe nọ: ‘Thuru ufi owawae họ unwido ra, kẹsena ahwo uviuwou ra a vẹ te zọ.’

Rehab o te thuru ufi họ unwido riẹ, ekiotọ na a tẹ rọ ufi na ruọ otọ. A tẹ dhẹ kpobọ igbehru, je dhere obei edẹ esa taure a te ti zihe bru Joshua. Kẹsena ahwo Izrẹl a tẹ fa ethẹ Jọdan vrẹ, jẹ ruẹrẹ oma kpahe re a fi okpẹwho na kparobọ. Jeriko họ okpẹwho ọsosuọ nọ a fi kparobọ. Jihova ọ tẹ ta kẹ ahwo Izrẹl nọ a nya okpẹwho na wariẹ họ ẹsiẹvo okpẹdẹ evaọ edẹ ezeza. Evaọ ẹdẹ avọ ihrẹ, a tẹ nya okpẹwho na wariẹ họ asia ihrẹ. Nọ izerẹ na a bi kporo egba rai na, yọ isoja na a bi bo gaga. Kẹsena igbẹhẹ okpẹwho na i te kporo fihọ otọ! Rekọ uwou Rehab nọ o jọ ugbẹhẹ na u kporo ho, u dikihẹ. Rehab avọ uviuwou riẹ a zọ keme a fievahọ Jihova.

Usi epanọ a ro fi Jeriko kparobọ u do ruọ otọ Kenan soso. Ivie Kenan a te kuomagbe re a họre ahwo Izrẹl. Rekọ ahwo Gibiọn a te ru oware jọ. A te ku iwu nọ e bẹre no fihọ jẹ nyabru Joshua ze, a tẹ ta kẹe nọ: ‘Ugbothabọ ma no ze. Ma yo kpahe Jihova gbe oware nọ o ru kẹ owhai evaọ obọ Ijipti gbe evaọ obọ Moab. Wha ya eyaa kẹ omai inọ wha te họre omai hi, ma vẹ te jọ erigbo rai.’

Joshua ọ ginẹ rọwo ẹme nọ a ta na, jẹ ya eyaa nọ a te họre ai hi. Nọ edẹ esa e vrẹ no, a tẹ vuẹ Joshua nọ kpakọ ugbothabọ a no ze he. Kpakọ ẹkwotọ Kenan etenẹ a no ze. Joshua ọ tẹ nọ ahwo Gibiọn nọ: ‘Fikieme wha rọ ta ọrue kẹ omai?’ A te yo kẹe nọ: ‘Ozọ u je mu omai! Ma riẹ nọ Jihova Ọghẹnẹ rai ọ be họre kẹ owhai. Ivie wha kpe omai no ho.’ Joshua o gine ru eyaa riẹ na gba jẹ kẹ ai uvẹ.

U kri hi, ivie isoi Kenan avọ egbaẹmo rai a tẹ gwọlọ nọ a re kpe ahwo Gibiọn. Rekọ Joshua avọ egbaẹmo riẹ a tẹ nya aso okioke re a sai fiobọhọ kẹ ai. Ohọre na u muhọ evaọ irioke frifri. Ahwo Kenan a te muhọ ẹdhẹ. Oria kpobi nọ a dhẹ te, Jihova ọ jẹ rehọ oso-itho tehe ai. Kẹsena Joshua ọ tẹ yare Jihova nọ o ru ọre na daji oria ovo. Fikieme Joshua ọ rọ yare Jihova nọ o ru ọre na daji kpakiyọ ọre ọ re daji ẹdẹvo ho? Keme Joshua o fievahọ Jihova. Okpẹdoke soso ọre na o kiediwi hi bẹsenọ ahwo Izrẹl a ro fi ivie Kenan gbe egbaẹmo rai kpobi kparobọ riẹriẹriẹ.