ENỌ IZOGE NA
Kọ Otẹrọnọ Oware Hayo Uwou O Bẹ Omẹ No?
Rọkẹ ahwo jọ, a rẹ ruẹ oware nọ uyoma tei hi nọ oso o te ko ai họ uwou evaọ oke uvo yọ a wo oware ovo nọ a bi ru hu gbe oria ọvo nọ a rẹ nya ha. Uzoge ọmọzae jọ nọ a re se Robert ọ ta nọ, “Evaọ oke utioye na, mẹ rẹ keria ọvo kpoko, mẹ gbẹ riẹ oware ovo nọ me re ru hu.”
Kọ o jọ owhẹ oma ere no ẹdẹ jọ? O tẹ rrọ ere, uzoẹme nana o sai fiobọhọ kẹ owhẹ!
Oware nọ u fo nọ whọ rẹ riẹ
Eware wọhọ etẹlẹvisiọno hayo Itanẹte i re fiobọhọ tere he.
A rẹ sae rehọ Itanẹte nọ a rẹ kiẹ ro le oke haro, rekọ o sae jẹ whaha owhẹ nọ whọ gbẹ sai ro roro thabọ họ, u ve fiba ehoo hayo elọhoma na. Jeremy nọ ọ rrọ ikpe udhegbọvo ọ ta nọ, “Whọ vẹ te ruẹ nọ whe kpovao fihọ bi rri etẹlẹvisiọno hayo ifonu ra ọvo ababọ ugogo oware jọ nọ who bi roro kpahe.”
Ọmọtẹ jọ nọ a re se Elena ọ ta ọkpọ ẹme yena re. Ọ ta nọ, “Oware kpobi whọ rẹ sae rehọ Itanẹte ru hu, u re reghe owhẹ no, te epanọ akpọ ọ rẹ rọ vẹso owhẹ tube viere evaọ okenọ who te fi okwakwa Itanẹte ra họ otọ no!”
Oghẹrẹ uruemu nọ who wo o sai fiobọhọ.
Kọ nọ ohwo o te wo iruo buobu nọ o re ru, oye uwou o gbẹ bẹe no ho? Ijo, isiuru nọ who wo fihọ oware nọ who bi ru u re kpomahọ owhẹ gaga. Wọhọ oriruo, ọmọtẹ jọ nọ a re se Karen ọ kareghẹhọ nọ: “Isukulu e jẹ bẹ omẹ ẹnya gaga, dede nọ o lẹliẹ omẹ wo eware nọ me re ru okikpo. U fo nọ udu ra o rẹ jọ oware nọ who bi ru re o siọ owhẹ ba ẹbẹ no.”
Kọ whọ riẹ nọ: “Nọ who gbe wo oware ovo nọ who re ru hu” yọ ọzadhe he, rekọ uvẹ nọ u rovie fihọ? Emamọ otọ nọ whọ rẹ kọ eware sa-sa fihọ nọ e rẹ sae rro.
Oke nọ whe wo yọ emamọ otọ nọ whọ rẹ kọ eware sa-sa fihọ nọ e rẹ sae rro
Oware nọ whọ rẹ sai ru
Daoma ru eware sa-sa. Mu egbẹnyusu ekpokpọ. Wo arozaha omaweromẹ ọkpokpọ. Ru ekiakiẹ kpahe izoẹme ekpokpọ. Nọ ahwo nọ a re ru eware sa-sa nọ i re siuru a tẹ rrọ oria goli, eware e rẹ kake bẹ ae he, yọ a rẹ kake bẹ ahwo gbe he nọ a tẹ rrọ kugbe amọfa!
Ehri-uzi Ebaibol: “Oware kpobi nọ who bi ru, rọ ẹgba ra kpobi ru ei.”—Ọtausiuwoma Na 9:10.
“U ri kri nọ me ro mu ẹvẹrẹ Mandarin Chinese họ ewuhrẹ hẹ, rekọ nọ me bi wuhrẹ onana kẹdẹ kẹdẹ na, u ru omẹ ruẹ nọ yọ oware nọ mẹ rẹ sai wuhrẹ. O rẹ were omẹ re me wuhrẹ ugogo uzoẹme jọ. O rẹ lẹliẹ omẹ roro ziezi je fiobọhọ kẹ omẹ rehọ oke mẹ ruiruo ziezi.”—Melinda.
Tẹrovi ẹjiroro ra. Whọ tẹ riẹ ẹjiroro nọ who bi ro ru oware, o rẹ lẹliẹ isiuru nọ who wo kẹe ga. Makọ iruo isukulu dede e te bẹ owhẹ hẹ nọ who te muẹrohọ ẹjiroro ra.
Ehri-uzi Ebaibol: ‘Oware ovo o rrọ họ nọ u woma kẹ ohwo-akpọ vi akpọ nọ ọ rẹ re kuoma evaọ iruo egaga riẹ.’—Ọtausiuwoma Na 2:24.
“Evaọ obọ ekuhọ isukulu mẹ, euwa eree me je se obe kẹdẹ kẹdẹ keme me je se vẹre he. Kọ o jẹ bẹ omẹ? Kakaka! Keme oware nọ u ti noi ze ọvo mẹ jẹ tẹrovi—epanọ mẹ rẹ rọ pase—yọ oye o jẹ kẹ omẹ ẹgba se vrẹ ọvo.”—Hannah.
Nọ oware nọ whọ sai nwene he o tẹ via, rehọ iẹe ere. Makọ eware nọ e rẹ kẹ omaweromẹ gaga e sai wo ofẹ nọ e rẹ jarai fou ehoo. Yọ ẹsejọ dede, emamọ egbẹnyusu e sae raha omaa nọ wha gbe wo, o ve fi owhẹ họ ababọ. Nọ o rrọ ere na, ukpenọ who re mu ovao họ hayo jọ ọkọkora, daoma sasa oma je rẹro ewoma.
Ehri-uzi Ebaibol: “Ohwo nọ eva e be were o wo ehaa ẹsikpobi.”—Itẹ 15:15.
“Ogbẹnyusu mẹ jọ ọ ta kẹ omẹ nọ me wuhrẹ epanọ mẹ rẹ rọ reawere oke nọ mẹ ọvo ọ tẹ rrọ oria. Ọ ta nọ, re ohwo ọ riẹ epanọ o re ru nọ ọ tẹ rrọ kugbe amọfa gbe okenọ ọye ọvo ọ tẹ rrọ yọ emamọ oware ulogbo jọ nọ u fo nọ ohwo kpobi o re wuhrẹ evaọ uzuazọ.”—Ivy.