A Kẹ Rai Enọ E Mai Woma

Nọ a fi Ẹmo Akpọ Avivẹ no evaọ 1945, whọ rẹ ruẹ ewho buobu nọ a raha no evaọ Germany. Whọ rẹ ruẹ oware ovo evaọ isukulu buobu hu, a raha eware buobu evaọ isipito, yọ ebọmbo nọ a gbolo fihọ otọ e gbẹ jọ eria kpobi. Emu ọ jariẹ tere he, fikiere emu ọ ghare thesiwa. Oke yena, osa iruo eka ezeza soso whọ rẹ rọ dẹ ugbogbo ebọta ọvo.

Akpọ ọ jẹ bẹ Isẹri Jihova buobu, mae ga kọ inievo mai buobu nọ i no uwou-odi ze obọ. Egọmeti o fi inievo nana họ uwou-odi ikpe buobu keme a se inọ a re kpohọ ẹmo hayo jọ abọ egọmeti ọvo ho. Nọ a siobọno ai evaọ 1945, iwu nọ a ro no uwou-odi ze ọvo họ oware nọ a wo. Isẹri Jihova efa e jariẹ nọ a gbe wo eware nọ a re ro yeri akpọ họ. Ohọo ọvo u je ti kpe ejọ whu, ibiaro i bi ejọ kie fihọ otọ evaọ obọ ewuhrẹ.

Isẹri Jihova nọ E Rrọ Erẹwho Efa A Fiobọhọ Vẹrẹ Vẹrẹ

Isẹri Jihova nọ e rrọ eghagha avọ eghagha akpọ na a rehọ emu gbe iwu se inievo obọ Germany. Ọfisi nọ o wuzou iruo Isẹri Jihova evaọ akpọ soso, nọ o rrọ United States, o ta kẹ uwou ogha nọ o rrọ Bern evaọ Switzerland inọ a daoma fiobọhọ kẹ inievo obọ Germany. O jọ etẹe kuhọ họ. Brọda Nathan H. Knorr, o no obọ United States kpobọ Europe re ọ nya onya eware nọ a ti ro se inievo obọ Germany na vẹrẹ vẹrẹ.

Isẹri Jihova nọ e rrọ Switzerland a zọhọ emu, te iwu, gbe igho ze. A kaki vi eware na kpobọ Bern, a tẹ jọ obei ruẹrẹ ae họ jẹ fae kpobọ Germany. Isẹri Jihova nọ e rrọ erẹwho efa, te enọ e rrọ Sweden, Canada, gbe United States, a zọhọ eware se enọ e rrọ Germany gbe erẹwho buobu evaọ Europe gbe Asia, nọ e jẹ reoja nọ a fi Ẹmo Akpọ Avivẹ no.

A Daoma Kẹhẹ!

U kri hi, uwou ogha obọ Switzerland o tẹ fa coffee, imiliki, isugẹ, eware wọhọ eka gbe eraese, ibi-ire eyaya, ẹbe gbe ibi-ire, te erao gbe iyei gbe igho se inievo na.

U te no emu no, a zọhọ iwu buobu gbidi gbidi, te ikotu gbe oghoghẹrẹ iwu ezae gbe erọ eyae se inievo na. Uwou-Eroro Ọvo 15, 1946 o ta nọ: “Orọnikọ thakpinọ a kẹ ae omoware jọ inọ a ro kru oma ha, rekọ a vi eware rai nọ e mai woma se inievo rai nọ e rrọ obọ Germany. A ru utho nọ a rẹ sai ru kpobi kẹ inievo na.”

Isẹri Jihova nọ e rrọ obọ Switzerland a te je vi emamọ eviẹ nọ i bu te 1,000 soso se inievo na. Nọ inievo nọ e rrọ Wiesbaden evaọ obọ Germany a rovie ekpa iwu gbe eware sa-sa nọ a vi se ai, jẹ ruẹ epanọ i woma te, akpọ o gbe rai unu. Oniọvo jọ ọ ta nọ: “Me roro nọ uwou-eki ọvo o riẹ nọ a sae jọ ruẹ emamọ eware itiena evaọ Germany hi.”

Ẹfẹfa a jẹ fa eware nya ri bọo Aria 1948. Eware nọ Isẹri Jihova obọ Switzerland a fa nya e vọ ikreti ewha 444, yọ ikreti ọvo ọ gbẹdẹ vi ẹkpa isimeti. Wọhọ epanọ ma ta no ẹsejọ na, orọnikọ obọ Switzerland ọvo a fa eware no ze he. Inievo nọ e zọhọ eware ze evaọ erẹwho efa eye e mai bu, keme Isẹri Jihova 1,600 ọvo e jọ Switzerland oke yena.

Wha You Ohwohwo

Jesu Kristi ọ ta kẹ ilele riẹ nọ: “Onana ahwo kpobi a te rọ riẹ nọ whai yọ ilele mẹ, otẹrọnọ wha te wo uyoyou evaọ udevie rai.” (Jọn 13:34, 35) Fikinọ Isẹri Jihova a you inievo rai, a kẹ rai eware nọ e mai woma nọ a wo, orọnikọ enọ a wha bẹ no ho. (2 Ahwo Kọrint 8:1-4) Ileta jọ nọ a kere no obọ Zurich ze o ta nọ: “Inievo buobu nọ a wo eware nọ a re vi hi, a vi itikẹte nọ a rẹ rọ dẹ eware jọ evaọ orẹwho rai gbe igho se inievo nọ uvuhu o jọ oma na.”

Dede nọ a lahiẹ inievo mai obọ Germany gaga evaọ oke ẹmo na, uvuhu o tẹ jẹ jarai oma nọ ẹmo na o kuhọ no, inievo na a fiobọhọ kẹ ae keme a you rai gaga. Yọ u ru oma voro ai.