ENỌ IZOGE NA
Eware vẹ U Fo nọ Me re Ru nọ Mẹ tẹ Họ-Ame No?—Abọ avọ 2: Gbẹ Hae Nya Evaọ Ẹgbakiete
Ebaibol na ọ ta nọ “Jihova ọ rẹ siọ oware uwoma ba eru hu rọ kẹ enọ e be nya evaọ ẹgbakiete.” (Olezi 84:11) Eme u dhesẹ re whọ “nya evaọ ẹgbakiete”? U dhesẹ nọ who re ru eyaa nọ whọ ya kẹ Jihova gba. Whọ ya eyaa nọ who ti ru oreva Jihova evaọ okenọ whọ rọ uzuazọ ra mudhe kẹe. (Ọtausiuwoma Na 5:4, 5) Ẹvẹ whọ sae rọ nya evaọ ẹgbakiete nọ whọ tẹ họ-ame no?
Ma te ta kpahe eware nana
Gbẹ hai thihakọ ebẹbẹ nọ i bi te owhẹ
Ebaibol na ọ ta nọ: “Evaọ udevie ikpokpoma buobu nọ i re te omai hrọ ma te rọ ruọ Uvie Ọghẹnẹ.”—Iruẹru Ikọ 14:22.
Oware nọ onana u dhesẹ: Ebẹbẹ i re te Oleleikristi kpobi evaọ uzuazọ. Ebẹbẹ jọ i ti te owhẹ fikinọ whẹ yọ Oleleikristi. Wọhọ oriruo, a sai se owhẹ ẹkoko hayo wọso owhẹ. Rekọ ebẹbẹ efa wọhọ ugho nọ o rẹ jariẹ hẹ hayo ẹyao, e rẹ sai te ohwo kpobi.
Oware nọ o rẹ sae via: Eware e sai nwene kẹ owhẹ, yọ ẹsejọ evaọ oghẹrẹ nọ o te were owhẹ hẹ. Ebaibol na ọ ta nọ eware iyoma e sae via kẹ ohwo kpobi, te Oleleikristi hayo ohwo nọ ọ rrọ Oleleikristi hi.—Ọtausiuwoma Na 9:11.
Oware nọ whọ rẹ sai ru: Nọ whọ riẹ nọ ebẹbẹ i ti te owhẹ no na, o gwọlọ nọ who re ru eware nọ i re fiobọhọ kẹ owhẹ thihakọ rai. Rri ebẹbẹ wọhọ uvẹ nọ who re ro ru ẹrọwọ ra ga je fievahọ Jihova ziezi. (Jemis 1:2, 3) Nọ oke o be nyaharo na, whọ te sae ta oghẹrẹ eme evona nọ Pọl ukọ na ọ ta, inọ: “Evaọ eware kpobi, me bi wo ẹgba ẹkwoma ọnọ ọ be kẹ omẹ ogaga.”—Ahwo Filipai 4:13.
OWARE NỌ O VIA. “Nọ mẹ nwane họ-ame no, inievo-emezae mẹ a te no ukoko, ọsẹgboni mẹ a te kie ẹyao, me te je muhọ ẹmọ re. O hae te jọ lọlọhọ re udu u whrehe omẹ, o vẹ te thọrọ omẹ ẹro inọ egagọ Jihova mẹ ta nọ mẹ rẹ rọ karo evaọ okenọ mẹ rọ oma mẹ mudhe. Rekọ oware nọ u fiobọhọ kẹ mẹ thihakọ họ, mẹ kareghẹhọ nọ mẹ rọ uzuazọ mẹ mudhe kẹ Jihova.”—Karen.
Oware jọ nọ u re fiobọhọ: Se iku Josẹf. Whọ sae jọ Emuhọ uzou 37 gbe 39 rite 41 ruẹ iku riẹ. Kiyo enọ nana: Ebẹbẹ vẹ i te rie idudhe, kọ ẹvẹ ọ sai ro thihakọ rai? Kọ ẹvẹ Jihova o ro fiobọhọ kẹ Josẹf?
Eware efa nọ e rẹ sai fiobọhọ
Se:
Danlodu:
Gbẹ hai fi edawọ nọ i bi te owhẹ kparobọ
Ebaibol na ọ ta nọ: “Odawọ u re te omomọvo fiki isiuru obọriẹ nọ e rẹ wọe jẹ lẹliẹe họ.”—Jemis 1:14.
Oware nọ onana u dhesẹ: Ekpehre isiuru e rẹ ruọ omai udu ẹsejọ. Ma gbẹ daoma whaha ekpehre isiuru nana ha, e sae lẹliẹ omai thọ uzi.
Oware nọ o rẹ sae via: Whọ tẹ make họ-ame no, who ti gbe wo “isiuru uwo na.” (2 Pita 2:18) Oma o sae tubẹ wọ owhẹ re whọ dawo owezẹ ọzae-avọ-aye taure whọ tẹ te rọo.
Oware nọ whọ rẹ sai ru: Jiroro oware nọ who ti ru enẹna taure whọ tẹ te nyaku odawọ, re isiuru ra e gbẹ kpọ owhẹ hẹ. Kareghẹhọ ẹme nọ Jesu ọ ta inọ: “Ohwo ọvo ọ rẹ sae gbodibo kẹ ilori ivẹ hẹ.” (Matiu 6:24) Whọ sae salọ olori nọ whọ gwọlọ yoẹme riẹ. Jọ Jihova ọ jọ olori yena. Makọ epanọ ekpehre isiuru nọ e rrọ owhẹ udu e ga te kẹhẹ, whọ sae salọ nọ who re ru oware nọ u fo.—Ahwo Galesha 5:16.
Oware jọ nọ u re fiobọhọ: Riẹ eria nọ whọ jọ ga gbe eria nọ whọ jọ ga ha. Mu usu kugbe inievo nọ e rẹ sai fiobọhọ kẹ owhẹ ru oware nọ u kiehọ. Kẹnoma kẹ ahwo, eria, gbe eware kpobi nọ e rẹ sai ru ei bẹbẹ kẹ owhẹ re who ru oware nọ u kiehọ.—Olezi 26:4, 5.
Eware efa nọ e rẹ sai fiobọhọ
Gbẹ hai ru eware nọ i re fiobọhọ kẹ owhẹ wo ọwhọ kẹ iruo Ọghẹnẹ
Ebaibol na ọ ta nọ: “Whai omomọvo o gbe dhesẹ ajọwha ọvona . . . rite urere, re wha gbẹ moyẹlẹ hẹ.”—Ahwo Hibru 6:11, 12.
Oware nọ onana u dhesẹ: Ohwo ọ rẹ sae nyaharo ho nọ ọ gbẹ tẹrovi oware nọ o bi ru hu, yọ ọ rẹ moyẹlẹ.
Oware nọ o rẹ sae via: Nọ whọ họ-ame obọ, eva e jẹ were owhẹ gaga, whọ tẹ jẹ rọ ọwhọ ru iruo Ọghẹnẹ. Uyoyou nọ who wo kẹ Jihova o jọ gaga. Rekọ nọ oke o be nyaharo na, o sae jọ bẹbẹ kẹ owhẹ re who yoẹme kẹ Jihova evaọ oware kpobi. O tẹ via ere, udu o rẹ sae whrehe owhẹ je ru nọ who ti gbe ro wo ọwhọ te epaọ ọsosuọ họ.—Ahwo Galesha 5:7.
Oware nọ whọ rẹ sai ru: Hai ru oware nọ u kiehọ, o tẹ make rọnọ evaọ oke ọsosuọ o te jọ bẹbẹ kẹ owhẹ. (1 Ahwo Kọrint 9:27) Evaọ oke ovona, daoma gbe wuhrẹ kpahe Jihova Ọsẹ obọ odhiwu ra na evaọ Ebaibol na gbe ebe ukoko na, jẹ lẹ sei vi epaọ ọsosuọ re who si kẹle iẹe ziezi. Ofariẹ, gbẹ hai mu usu kugbe ahwo nọ a you Jihova, nọ a kruga evaọ egagọ riẹ.
Oware jọ nọ u re fiobọhọ: Kareghẹhọ nọ Jihova o you owhẹ gaga yọ ọ gwọlọ fiobọhọ kẹ owhẹ. Otẹrọnọ evaọ omoke jọ oma o dina lọhọ owhẹ, who du roro ho inọ Jihova o be muofu kẹ owhẹ. Ebaibol na ọ ta nọ: “Ọ rẹ kẹ ọnọ oma o rrọ no ogaga jẹ kẹ enọ i wo ẹgba ha ẹgba ologbo.” (Aizaya 40:29) Ọ te kẹ owhẹ ẹgba re whọ wariẹ wo ọwhọ kẹ egagọ riẹ.
Eware efa nọ e rẹ sai fiobọhọ
Se:
Rri ividio na:
Ẹme na họ: Whọ tẹ nya evaọ ẹgbakiete, who ti ru udu Jihova ghọghọ. (Itẹ 27:11) Eva e te were iẹe inọ whọ salọ nọ whọ rẹ jọ abọ riẹ, yọ o ti fiobọhọ kẹ owhẹ re whọ sai fi edawọ Setan kparobọ.