Oware nọ U ro Wuzou re Ọkpako Ọ Kpọ Ọmọ Họ

EME U DHESẸ RE ỌKPAKO Ọ KPỌ ỌMỌ HỌ?

Nọ emọ a be rro ze na, a gwọlọ ọkpako nọ ọ rẹ kpọ ae họ hayo nọ ọ rẹ kẹ ae ohrẹ. Esẹgbini họ ahwo nọ u fo nọ a rẹ kpọ emọ rai họ edhere jẹ kẹ ae ohrẹ keme oyena yọ iruo rai. Rekọ amọfa nọ a kpako no a rẹ sae kẹ emọ ra ohrẹ re.

FIKIEME U RO WUZOU RE ỌKPAKO Ọ KPỌ ỌMỌ HỌ?

Evaọ eria buobu, emaha a wo oke nọ a rẹ rọ jọ kugbe ekpako tere he. Roro kpahe onana:

• Emọ a rẹ jọ obọ isukulu evaọ euwa buobu, yọ evaọ obei emọ isukulu a re bu vi iticha gbe ekpako efa.

• Nọ isukulu e tẹ fa no, izoge buobu ọvo a rẹ jọ obọ uwou fikinọ esẹgbini rai a gbẹ rrọ obọ iruo.

• Ekiakiẹ jọ nọ a ru i dhesẹ nọ evaọ obọ United States, emọ nọ e rrọ umuo ikpe 8 rite ikpe 12 a rẹ rọ enwenọ euwa 6 ro rri etẹlẹvisiọno, gaviezọ kẹ ile jẹ fa igemu kẹdẹ kẹdẹ.a

Obe na Hold On to Your Kids o ta nọ: “Enẹna, izoge a gbẹ be rọwo nyabru esẹgbini, iticha, gbe amọfa nọ e kpako no ho re a kẹ ae ohrẹ, vuẹ ae oware nọ a re ru hayo re a kpọ ae họ . . . rekọ ehwa rai a be nyabru.”

OGHẸRẸ NỌ U FO NỌ A RẸ RỌ KPỌ ỌMỌ HỌ

Hae raha oke kugbe emọ ra ziezi.

OHRẸ EBAIBOL: “Wuhrẹ ọmọ edhere nọ u fo nọ ọ rẹ nya; makọ okenọ ọ kpako no dede o re noi hi.”​—Itẹ 22:6.

Emọ a rẹ gwọlọ nọ esẹgbini rai a kpọ ae họ je fiobọhọ kẹ ae. Egba-eriariẹ a tubẹ ta nọ emọ e tẹ maki te izoge no, a rẹ mae gwọlọ gaviezọ kẹ ohrẹ ọsẹgboni rai vi orọ ehwa rai. Evaọ obe na You and Your Adolescent, ọzae jọ nọ a re se Dr. Laurence Steinberg o kere nọ: “Oware nọ esẹgbini a bi ru u re kpomahọ uruemu emọ rai gaga bọwo oke nọ a rẹ kpako vrẹ izoge no.” Ọ tẹ jẹ ta nọ: “Izoge a rẹ gwọlọ riẹ oghẹrẹ nọ who rri oware jẹ gaviezọ kẹ ẹme nọ whọ te ta kpahe iẹe, o tẹ make rọnọ a te rọwo oware kpobi hi.”

Nọ orọnọ whẹ họ ohwo nọ ọmọ ra ọ te mae gwọlọ nọ ọ rẹ kpọe họ na, daoma fiobọhọ kẹe. Hae raha oke kugbe emọ ra ziezi, vuẹ ae epanọ who rri eware, ta kpahe eware nọ e mai wuzou kẹ owhẹ evaọ uzuazọ, je gbiku eware nọ whọ rọ ẹro ruẹ no rọkẹ ae.

Gwọlọ emamọ ohwo nọ ọ rẹ sae kpọ ae họ hayo kẹ ae ohrẹ.

OHRẸ EBAIBOL: “Ọnọ o bi lele iwareghẹ nya usu o re wo areghẹ.”​—Itẹ 13:20.

Kọ whọ riẹ ohwo jọ nọ o wo emamọ uruemu nọ ọ rẹ sae kpọ ọmọ ra họ jẹ kẹe ohrẹ? Whọ sae ta kẹe re ọ hae raha oke kugbe ọmọ ra. Orọnikọ onana u dhesẹ nọ whọ rẹ nwane wọ owha ra wọhọ ọsẹ hayo oni kẹ omọfa jọ họ. Ehrẹ nọ ohwo nọ who fievahọ ọ te kẹ ọmọ ra gbe enọ whẹ omara whọ te kẹe, i ti fiobọhọ kẹ ọmọ ra nyaharo ziezi evaọ uzuazọ. Ebaibol na o dhesẹ nọ dede nọ Timoti ọ kpako te ohwo no, o wuhrẹ eware buobu mi Pọl ukọ na nọ avọ iẹe a gbẹ jọ egbẹnyusu, yọ Pọl omariẹ o wuhrẹ eware buobu mi ei re.​—Ahwo Filipai 2:20, 22.

Enẹna, iviuwou buobu a gbẹ be rria kugbe evaọ uwou hayo okegbe ọvona ha. Wọhọ oriruo, ọsẹ-ologbo gbe oni ologbo, oniọvo-ọsẹ hayo oniọvo-oni, gbe imoni efa a sae rria erẹwho efa. Otẹrọnọ ere o rrọ kẹ owhẹ, whọ sai fiobọhọ kẹ emọ ra re a wuhrẹ mi amọfa nọ a kpako no nọ a wo emamọ iruemu nọ whẹ gwọlọ nọ emọ ra a re wo.