• Eme Họ Uvie Ọghẹnẹ?
    Reawere Uzuazọ Bẹdẹ Bẹdẹ!—Uwuhrẹ Ebaibol nọ O te Kẹ Owhẹ Erere
    • Uwuhrẹ avọ 31. Jesu Kristi nọ ọ rrọ Ovie evaọ obọ odhiwu nọ ọ rrọ aro Jihova.

      UWUHRẸ AVỌ 31

      Eme Họ Uvie Ọghẹnẹ?

      Ovuẹ nọ o mai wuzou evaọ Ebaibol na họ ovuẹ kpahe Uvie Ọghẹnẹ. Jihova ọ te rọ Uvie yena ru otọakpọ na fihọ epanọ ọ gwọlọ nọ ọ jọ evaọ oke ọsosuọ nọ ọ rọ mae. Eme họ Uvie na? Ẹvẹ ma rọ riẹ nọ u bi su enẹna? Eme Uvie na u ru no? Kọ eme u ti ru evaọ obaro? Ma te jọ uwuhrẹ nana avọ iwuhrẹ ivẹ nọ e rrọ aro na kẹ uyo enọ nana.

      1. Eme họ Uvie Ọghẹnẹ, kọ ono họ Ovie nọ o bi su ei?

      Uvie na yọ egọmeti nọ Jihova Ọghẹnẹ o ro mu. Jesu Kristi nọ ọ rrọ Ovie riẹ o bi su evaọ obọ odhiwu. (Matiu 4:17; Jọn 18:36) Ebaibol na ọ ta kpahe Jesu nọ: “Ọ te jọ Ovie nọ o ti su . . . bẹdẹ bẹdẹ.” (Luk 1:32, 33) Nọ orọnọ Jesu họ Ovie Uvie Ọghẹnẹ na, o ti su ohwo kpobi evaọ otọakpọ na.

      2. Amono a ti lele Jesu su?

      Jesu ọvo o ti su evaọ Uvie na ha. Ahwo nọ a no “orua kpobi, ẹrọunu kpobi, utu ahwo gbe orẹwho kpobi ze . . . a te jọ ivie nọ i ti su otọakpọ na.” (Eviavia 5:9, 10) Bro ahwo a ti lele Kristi su? Anwẹnọ Jesu ọ rọ ziọ otọakpọ je zihe kpobọ odhiwu no na, ima ahwo buobu a zihe ruọ ilele riẹ no. Rekọ ahwo idu udhuhrẹ-gbene (144,000) ọvo a ti kpobọ odhiwu nyai lele Jesu su. (Se Eviavia 14:1-4.) Ileleikristi efa kpobi a te jọ otọ Uvie na evaọ otọakpọ.—Olezi 37:29.

      3. Oghẹrẹ vẹ Uvie Ọghẹnẹ u ro woma vi egọmeti ahwo-akpọ?

      Nọ isu ahwo-akpọ a tẹ make gwọlọ ru eware iwoma, a wo ogaga nọ a sai ro ru oware kpobi nọ a gwọlọ ru hu. A te su te oria amọfa a ve nwene ai, yọ ẹsejọ, ahwo yena yọ ahwo nọ a wo oriobọ nọ a gwọlọ fiobọhọ kẹ ahwo ho. Rekọ uvumọ ohwo o ti nwene Jesu nọ ọ rrọ Ovie Uvie Ọghẹnẹ na vievie he. Ebaibol na ọ ta nọ Ọghẹnẹ ọ “rehọ uvie jọ mu, onọ a te raha vievie he.” (Daniẹl 2:44) Jesu o ti su otọakpọ na soso, yọ o ti dhesẹ ọriẹwẹ vievie he. Ọ rrọ yoyou, wowou, yọ o re bru uvioziẹ. O ti wuhrẹ ahwo kpobi re a ru epọvo na, re a dhesẹ uyoyou gbe uwowou je bru uvioziẹ.​—Se Aizaya 11:9.

      GBE WUHRẸ EWARE EFA

      Wuhrẹ kpahe oware nọ Uvie Ọghẹnẹ u ro woma vi egọmeti ohwo-akpọ.

      Jesu Kristi nọ ọ keria agbara-uvie riẹ evaọ obọ odhiwu bi su otọakpọ na soso. Ahwo nọ a bi lele iei su a keria obemu riẹ. Jihova o bi lo evaọ obemu rai.

      4. Egọmeti nọ o wo ogaga o ti su otọakpọ na soso

      Jesu Kristi o wo ogaga vi osu ọfa kpobi nọ o su no. Se Matiu 28:18, kẹsena wha vẹ ta ẹme kpahe onọ nana:

      • Ẹvẹ udu-esuo nọ Jesu o wo u ro woma vi orọ osu ohwo-akpọ jọ kpobi?

      A re dhe egọmeti ohwo-akpọ enwenwene, yọ omoria jọ ọvo o re su evaọ akpọ na. Kọ ẹvẹ kpahe Uvie Ọghẹnẹ? Se Daniẹl 7:14, kẹsena wha vẹ ta ẹme kpahe enọ nana:

      • Fikieme u ro woma nọ “a te raha” Uvie Ọghẹnẹ hẹ?

      • Fikieme u ro woma nọ uvie na u ti su otọakpọ na soso?

      5. O gba họ nọ a re nwene egọmeti ohwo-akpọ

      Fikieme o rọ gba họ nọ Uvie Ọghẹnẹ u re nwene egọmeti ohwo-akpọ? Kporo IVIDIO na, kẹsena wha vẹ ta ẹme kpahe onọ nọ ọ rrọ obotọ na.

      IVIDIO: Eme họ Uvie Ọghẹnẹ?—Amabọ Jọ Riẹ (1:41)

      • Eme o no esuo ohwo-akpọ ze no?

      Se Ọtausiuwoma Na 8:9, kẹsena wha vẹ ta ẹme kpahe enọ nana:

      • Kọ who roro nọ u fo re Uvie Ọghẹnẹ u nwene egọmeti ohwo-akpọ? Fikieme?

      6. Isu Uvie Ọghẹnẹ a riẹ oghẹrẹ nọ ma rrọ

      Fikinọ Jesu nọ ọ rrọ Ovie mai ọ jọ ohwo-akpọ no vẹre na, ọ sai “roro kẹ omai . . . evaọ oria nọ ma jọ ga ha.” (Ahwo Hibru 4:15) Te ezae te eyae nọ i bu te idu udhuhrẹ-gbene (144,000) nọ i ti lele Jesu su na yọ ahwo nọ Jihova ọ salọ “no orua kpobi, ẹrọunu kpobi, utu ahwo gbe orẹwho kpobi ze.”​—Eviavia 5:9.

      • Kọ o were owhẹ inọ Jesu avọ ahwo kpobi nọ a ti lele iei su na a jọ ahwo-akpọ wọhọ owhẹ? Fikieme o rọ were owhẹ?

      Ezae gbe eyae nọ a rọ ẹzi wholo nọ i no erẹwho sa-sa ze jẹ rria evaọ etoke sa-sa.

      Jihova ọ salọ ezae gbe eyae no eria sa-sa ze re a lele Jesu su

      7. Izi Uvie Ọghẹnẹ i woma vi izi egọmeti ahwo-akpọ

      Egọmeti a re fi izi họ nọ e rẹ kpọ jẹ thọ ahwo nọ a rrọ otọ esuo rai. Ere ọvona Uvie Ọghẹnẹ u wo izi nọ ahwo nọ a rrọ otọ riẹ a re lele. Se 1 Ahwo Kọrint 6:9-11, kẹsena wha vẹ ta ẹme kpahe enọ nana:

      • Ẹvẹ who roro nọ akpọ na ọ te jọ evaọ okenọ ohwo kpobi o ti koko izi Ọghẹnẹ?a

      • Kọ who roro nọ u kiehọ nọ Jihova ọ rọ ta nọ ohwo kpobi nọ ọ te jọ otọ Uvie na o koko izi nana? Fikieme?

      • Eme u dhesẹ nọ ahwo nọ a bi koko izi nana ha a rẹ sai nwene? (Rri owọ avọ 11.)

      Iporisi nọ ọ be ta kẹ omoto nọ ọ daji evaọ oria nọ ahwo a rẹ jọ fa edhere nọ o bi zurie. Ahwo unuikpe sa-sa a be fa edhere na.

      Egọmeti o re fi izi họ nọ e rẹ thọ je fiobọhọ kẹ ahwo nọ a rrọ otọ rai. Izi Uvie Ọghẹnẹ i woma vi izi yena, yọ e rẹ thọ je fiobọhọ kẹ ahwo nọ a rrọ otọ riẹ

      OHWO JỌ Ọ TẸ NỌ OWHẸ NỌ: “Eme họ Uvie Ọghẹnẹ?”

      • Didi uyo whọ te kẹ?

      EME WHO WUHRẸ NO?

      Uvie Ọghẹnẹ yọ egọmeti nọ ọ rrọ obọ odhiwu nọ o ti su otọakpọ na soso.

      Ọkiẹkpemu

      • Amono a ti su Uvie Ọghẹnẹ?

      • Oghẹrẹ vẹ Uvie Ọghẹnẹ u ro woma vi egọmeti ohwo-akpọ jọ kpobi?

      • Izi jọ vẹ Jihova ọ gwọlọ nọ ahwo nọ a rrọ otọ Uvie na a re koko?

      Utee nọ whọ rẹ sai fihọ

      KIẸ KPAHE EFA

      Se oware nọ Jesu o wuhrẹ ahwo kpahe oria nọ Uvie na o rrọ.

      “Kọ Uvie Ọghẹnẹ Yọ Oware nọ O Rrọ Udu Ohwo?” (Uzoẹme nọ o rrọ itanẹte)

      Fikieme Isẹri Jihova a rọ salọ nọ a rẹ romakpotọ kẹ esuo Uvie Ọghẹnẹ vi esuo ohwo-akpọ?

      A Romakẹ Uvie Ọghẹnẹ (1:43)

      Se kpahe oware nọ Ebaibol na ọ ta kpahe ahwo idu udhuhrẹ-gbene (144,000) nọ Jihova ọ salọ nọ a ti lele Jesu su.

      “Amono A ti Kpobọ Odhiwu?” (Uzoẹme nọ o rrọ itanẹte)

      Eme ọ kẹ aye jọ nọ ọ jọ uwou-odi imuẹro inọ Ọghẹnẹ ọvo o rẹ sai si okienyẹ no akpọ na?

      “Oghẹrẹ nọ Mẹ rọ Riẹ Epanọ Okienyẹ O ti ro Notọ” (Awake!, Akpegbọvo 2011)

      a Ma te ta ẹme kpahe izi nana jọ evaọ Abọ avọ 3.

  • Uvie Ọghẹnẹ U bi Su Enẹna!
    Reawere Uzuazọ Bẹdẹ Bẹdẹ!—Uwuhrẹ Ebaibol nọ O te Kẹ Owhẹ Erere
    • Uwuhrẹ avọ 32. Jesu Kristi nọ ọ rrọ Ovie evaọ obọ odhiwu o kru ọkpọ-isuẹsu, yọ o bi su otọakpọ na soso.

      UWUHRẸ AVỌ 32

      Uvie Ọghẹnẹ U bi Su Enẹna!

      Uvie Ọghẹnẹ u muhọ esu evaọ obọ odhiwu evaọ ukpe 1914. Ukpe yena edẹ urere esuo ohwo-akpọ i ro muhọ re. Ẹvẹ ma rọ riẹ? Joma ta ẹme kpahe eruẹaruẹ Ebaibol na jọ gbe oghẹrẹ nọ eware e rrọ evaọ akpọ na anwọ 1914 ze.

      1. Eme eruẹaruẹ Ebaibol i dhesẹ?

      Obe Daniẹl nọ o rrọ Ebaibol na u dhesẹ nọ Uvie Ọghẹnẹ u ti muhọ esu evaọ obọ ekuhọ etoke nọ a se “eke ihrẹ.” (Daniẹl 4:16, 17) Nọ ikpe buobu e vrẹ no, Jesu o te je se etoke ọvo yena “oke nọ a fihọ kẹ erẹwho na,” yọ ọ ta nọ etoke yena o ri kuhọ họ. (Luk 21:24) Wọhọ epanọ ma bi ti wuhrẹ na, eke ihrẹ na i kuhọ evaọ ukpe 1914.

      2. Oghẹrẹ vẹ eware e rrọ evaọ akpọ na anwọ 1914 ze?

      Ilele Jesu a nọ riẹ nọ: “Eme ọ te jọ oka ọzino ra gbe orọ oke urere uyero-akpọ na?” (Matiu 24:3) Nọ Jesu ọ jẹ kẹ ae uyo, ọ fodẹ eware buobu nọ e te via oke nọ o te mu Uvie Ọghẹnẹ họ esu no. Eware nana jọ họ ẹmo, ohọo nọ u ti mu, gbe etọ nọ i ti nuhu. (Se Matiu 24:7.) Ebaibol na ọ tẹ jẹ ta nọ iruemu ahwo evaọ “edẹ urere na” u ti ru nọ akpọ na ọ te rọ “bẹ ẹria.” (2 Timoti 3:1-5) Anwọ ukpe 1914 ze ma be mae rọ ruẹ eware nana.

      3. Fikieme eware i ro yoma thesiwa anwẹnọ Uvie Ọghẹnẹ u ro muhọ esu na?

      Nọ Jesu ọ nwani muhọ esu no, o te lele Setan avọ idhivẹri riẹ fi ẹmo evaọ obọ odhiwu. Ẹmo na o kiekpe Setan. Ebaibol na ọ ta nọ “a gbolo i rie fihọ otọakpọ, yọ a gbolo ikọ-odhiwu riẹ lele iei.” (Eviavia 12:9, 10, 12) Eva e be dha Setan krekrekre keme ọ riẹ nọ a te raha iẹe no. O tẹ be lẹliẹe wha edada gbe uye-oruẹ fihọ akpọ na soso. Agbẹta nọ eware i ro yoma thesiwa na! Rekọ Uvie Ọghẹnẹ u ti ku ebẹbẹ na kpobi họ.

      GBE WUHRẸ EWARE EFA

      Wuhrẹ kpahe oghẹrẹ nọ ma rọ riẹ nọ Uvie na u muhọ esu evaọ 1914 gbe oware nọ onana o rẹ wọ omai ru.

      4. Ikelakele oke nọ a fodẹ evaọ Ebaibol na u dhesẹ nọ 1914 Uvie na u ro muhọ esu

      Kporo IVIDIO na..

      IVIDIO: Uvie Ọghẹnẹ U Muhọ Esu Evaọ 1914 (5:02)

      Ọghẹnẹ o ru Nebukadneza nọ ọ jọ ovie Babilọn wezẹ ewezẹ jọ nọ e rrọ eruẹaruẹ. Ewezẹ na gbe oghẹrẹ nọ Daniẹl ọ fa otọ riẹ u dhesẹ nọ i kiekpahe esuo Nebukadneza gbe Uvie Ọghẹnẹ.​—Se Daniẹl 4:17.a

      Se Daniẹl 4:20-26, kẹsena wha vẹ rọ echate na rọ kẹ uyo enọ nọ e rrọ obotọ na:

      Oghẹrẹ nọ Ewezẹ Ure na U ro Kiekpahe Uvie Ọghẹnẹ

      ERUẸARUẸ NA (Daniẹl 4:20-36)

      Isuẹsu

      (A) Okpure

      Ure nọ o theri gaga.

      Isuẹsu na i serihọ

      (B) “Ko ure na fihọ otọ,” o vẹ jọ ere bẹsenọ “eke ihrẹ e rẹ vrẹ”

      Ehri ure nọ a rehọ ayọno avọ ekọpa gba wariẹ họ.

      A zihe isuẹsu na ze

      (C) “Uvie ra o te wariẹ te owhẹ obọ”

      Ure nọ o theri gaga.

      Evaọ orugba ọsosuọ eruẹaruẹ nana . . .

      ORUGBA ỌSOSUỌ

      Isuẹsu

      (D) Nebukadneza ovie Babilọn

      Nebukadneza nọ o dikihẹ avọ omorro.

      Isuẹsu na i serihọ

      (E) Nọ ukpe 606 B.C.E. o vrẹ no, Nebukadneza o te mu oruẹ họ ẹmọ, ọ gbẹ sai su evaọ ikpe ihrẹ hẹ

      Nebukadneza nọ ọ rrọ otọ be re ẹbe wọhọ arao.

      A zihe isuẹsu na ze

      (F) Oruẹ Nebukadneza o te ti kpo no, ọ tẹ wariẹ muhọ esu

      Nebukadneza nọ o bi rri obọ odhiwu yọ ọ kpare abọ kpehru.

      Evaọ orugba avọ ivẹ eruẹaruẹ nana . . .

      • (G) Amono ure na u dikihẹ kẹ?—Se 1 Iruẹru-Ivie 29:23.

      • (H) Oke vẹ a rọ seba esu? Ẹvẹ ma rọ riẹ nọ makọ okenọ Jesu ọ jọ otọakpọ yọ a re wariẹ muhọ esu hu?—Se Luk 21:24.

      • (I) Oke vẹ a ro zihe isuẹsu na ze, kọ evaọ oria vẹ?

      ORUGBA AVỌ IVẸ

      Isuẹsu

      (G) Ivie Izrẹl nọ i dikihẹ kẹ isuẹsu Ọghẹnẹ

      Ivie Izrẹl nọ e keria agbara-uvie rọ kpahe ohwohwo. Elo o bi lo no obọ ehru ze mu ai.

      suẹsu na i serihọ

      (H) A raha Jerusalẹm, o tẹ whae ze nọ esuo ivie Izrẹl u ro serihọ evaọ ikpe 2,520

      Jerusalẹm nọ erae e be to raha evaọ 607 B.C.E. Kẹsena ikpe 2,520 e tẹ vrẹ.

      A zihe isuẹsu na ze

      (I) Jesu o zihe ruọ Ovie Uvie Ọghẹnẹ evaọ obọ odhiwu o te muhọ esu

      Jesu nọ ọ keria agbara-uvie evaọ obọ odhiwu bi su otọakpọ na evaọ ukpe 1914 C.E. Elo o bi lo no oma riẹ ze.

      Ẹvẹ eke ihrẹ na i theri te?

      Eme nọ e rrọ oria jọ evaọ Ebaibol na i re fiobọhọ kẹ omai riẹ otọ eme nọ e rrọ oria ofa. Wọhọ oriruo, obe Eviavia o ta nọ eke esa gbe ubro i theri te edẹ 1,260. (Eviavia 12:6, 14) Eke ihrẹ yọ akuava inọmba yena, hayo edẹ 2,520. Evaọ ẹsejọ, Ebaibol na ọ rẹ rehọ ẹdẹ ọvo ro dhesẹ ẹgbukpe. (Izikiẹl 4:6) Ere eke ihrẹ nọ a fodẹ evaọ obe Daniẹl na e rrọ, koyehọ, edẹ na i dikihẹ kẹ ikpe 2,520.

      5. Akpọ na o nwene no anwọ ukpe 1914 ze na

      Kporo IVIDIO na.

      IVIDIO: Akpọ na O Nwene No Anwọ Ukpe 1914 Ze Na (1:10)

      Jesu ọ ta kpahe epanọ eware e te jọ evaọ akpọ na nọ o te zihe ruọ Ovie no. Se Luk 21:9-11, kẹsena wha vẹ ta ẹme kpahe onọ nana:

      • Evaọ usu eware nana, evẹ who muẹrohọ no hayo who yo kpahe no?

      Pọl ukọ na ọ fodẹ iruemu nọ ahwo a ti dhesẹ evaọ edẹ urere esuo ohwo-akpọ. Se 2 Timoti 3:1-5, kẹsena wha vẹ ta ẹme kpahe onọ nana:

      • Evaọ usu iruemu nana, evẹ whọ ruẹ nọ ahwo a bi dhesẹ nẹnẹ?

      Iwoho: Iwoho nọ i dhesẹ oghẹrẹ nọ eware e rrọ evaọ akpọ na evaọ edẹ urere na. 1. Osu nọ ọ rrọ osoja nọ o bi denu avọ abọ nọ ọ kpare evaọ aro agbada ẹmeọta. 2. Iwou nọ e raha kuotọ fiki otọ nọ u nuhu. 3. Irupre isoja. 4. Ahwo nọ a ku emaske họ nọ a be nyonya evaọ okore. 5. Iwou nọ a re se Twin Towers evaọ New York nọ e be to evaọ okenọ otu ugbarugba a dhẹ arupre duwu ae. 6. Ọzae nọ ọ be rehọ imu egaga. 7. Ọzae nọ ọ fare obọgo yọ ọ be va ku aye riẹ. 8. Oghoghẹrẹ imu gbe idi egaga. 9. Eyae ivẹ nọ i ku iwu-osẹ ọgbọna họ je ku emero ezọ gbe erọ abọ họ nọ e be rehọ omobọ rai ifoto. 10. Ohwo nọ o re kporo ile kẹ ahwo nọ o bi kporo ile je bi gbile na evaọ ehaa. 11. Ohwo nọ ọ rrọ usu ahwo nọ a bi ru ozighi nọ ọ gwọlọ gbolo ọgọ nọ ọ be ware erae.

      6. Oware nọ u fo nọ ma re ru nọ orọnọ Uvie Ọghẹnẹ u bi su na

      Se Matiu 24:3, 14, kẹsena wha vẹ ta ẹme kpahe enọ nana:

      • Obọdẹ iruo vẹ i dhesẹ nọ Uvie Ọghẹnẹ u bi su enẹna?

      • Ẹvẹ whọ sai ro wobọ evaọ iruo nana?

      Uvie Ọghẹnẹ u bi su enẹna, yọ okenọ u ti ro mu otọakpọ na soso họ esu o kẹle no. Se Ahwo Hibru 10:24, 25, kẹsena wha vẹ ta ẹme kpahe onọ nana:

      • Eme u fo nọ mai omomọvo o re ru nọ ma “be ruẹ nọ ẹdẹ na o bi si kẹle na”?

      Iwoho: 1. Ohwo nọ o bi wuhrẹ Ebaibol na nọ o kpohọ ewuhrẹ Isẹri Jihova. 2. Ohwo yena ọvona nọ ọ be ta usi uwoma kẹ ohwo jọ nọ ọ riẹ.

      Whọ tẹ riẹ oware jọ nọ o sai fiobọhọ kẹ amọfa je siwi ai, eme o te wọ owhẹ ru?

      OHWO JỌ Ọ TẸ NỌ OWHẸ NỌ: “Fikieme Isẹri Jihova a be hae rọ ta ẹme kpahe ukpe 1914 gaga?”

      • Didi uyo whọ te kẹ?

      EME WHO WUHRẸ NO?

      Eruẹaruẹ gbe ikelakele oke nọ a fodẹ evaọ Ebaibol na, jegbe oghẹrẹ nọ eware e rrọ evaọ akpọ na i dhesẹ nọ Uvie Ọghẹnẹ u bi su enẹna. Ma re dhesẹ nọ ma rọwo onana nọ ma tẹ be ta usi uwoma kpahe iẹe je kpohọ iwuhrẹ ukoko.

      Ọkiẹkpemu

      • Eme ọ via evaọ obọ ekuhọ eke ihrẹ nọ a fodẹ evaọ obe Daniẹl na?

      • Eme o ru rie mu owhẹ ẹro nọ Uvie Ọghẹnẹ u muhọ esu evaọ 1914?

      • Ẹvẹ whọ sai ro dhesẹ nọ u mu owhẹ ẹro nọ Uvie na u bi su enẹna?

      Utee nọ whọ rẹ sai fihọ

      KIẸ KPAHE EFA

      Se oware nọ igbiku gbe amọfa a ta kpahe oghẹrẹ nọ eware i ro nwene evaọ akpọ na anwọ 1914.

      “Etoke nọ Uruemu Ahwo U ro Muhọ Eyoma Gaga” (Awake!, Ane 2007)

      Se kpahe epanọ eruẹaruẹ nọ e rrọ Matiu 24:14 i ro ru ọzae jọ nwene uzuazọ nọ o je yeri.

      “Me You Ebọro nọ A rẹ rọ Umure Fa vi Oware Ofa Kpobi!” (Uwou-Eroro Na Ọrọ avọ 3 2017)

      Ẹvẹ ma rọ riẹ nọ eruẹaruẹ nọ e rrọ Daniẹl izou 4 na i kiekpahe Uvie Ọghẹnẹ?

      “Okevẹ Uvie Ọghẹnẹ U ro Muhọ Esuo? (Abọ 1)” (Uwou-Eroro Na, Akpegbọvo 1, 2014)

      Eme o dhesẹ nọ “eke ihrẹ” nọ a fodẹ evaọ obe Daniẹl izou 4 na i kuhọ evaọ 1914?

      “Okevẹ Uvie Ọghẹnẹ U ro Muhọ Esuo? (Abọ avọ 2)” (Uwou-Eroro Na, Ọvo 1, 2015)

      a Rri izoẹme urere ivẹ nọ e rrọ oria “Kiẹ Kpahe Efa” evaọ uwuhrẹ nana.

  • Eware nọ Uvie na U ti Ru
    Reawere Uzuazọ Bẹdẹ Bẹdẹ!—Uwuhrẹ Ebaibol nọ O te Kẹ Owhẹ Erere
    • Uwuhrẹ avọ 33. Ahwo nọ a be rria aparadase evaọ otọakpọ na.

      UWUHRẸ AVỌ 33

      Eware nọ Uvie na U ti Ru

      Ma be ta ẹme na, Uvie Ọghẹnẹ u bi su. Uviemenẹ u ti ru eware kpobi woma evaọ otọakpọ na. Joma ta ẹme kpahe emamọ eware jọ nọ whọ sai rẹro rai evaọ Uvie Ọghẹnẹ.

      1. Ẹvẹ Uvie Ọghẹnẹ u ti ro ru re udhedhẹ gbe uvioziẹ e jọ otọakpọ na?

      Jesu nọ ọ rrọ Ovie Uvie Ọghẹnẹ na ọ te raha ahwo omuomu gbe egọmeti na no evaọ ẹmo Amagidọn. (Eviavia 16:14, 16) Evaọ oke yena, eyaa nana nọ e rrọ Ebaibol na i ve ti rugba riẹriẹriẹ: “Omoke kakao ọvo u kiọkọ, ahwo omuomu na a gbẹ te jọ họ.” (Olezi 37:10) Evaọ Uvie na, Jesu o ti ru udhedhẹ vọ otọakpọ na je bru uvioziẹ.​—Se Aizaya 11:4.

      2. Ẹvẹ uzuazọ o te jọ evaọ okenọ a ti ru oreva Ọghẹnẹ evaọ otọakpọ na?

      Evaọ Uvie Ọghẹnẹ, “ahwo okiẹrẹe na a te rọ otọakpọ na reuku, yọ a te rriae bẹdẹ bẹdẹ.” (Olezi 37:29) Dae rehọ iẹe nọ whọ rrọ akpọ nọ ohwo kpobi o jo kiẹrẹe, ahwo kpobi a te je you Jihova gbe ohwohwo! O gbẹ te were? Ohwo ọvo ọ te mọ họ, ahwo kpobi a te rria bẹdẹ bẹdẹ.

      3. Eme Uvie Ọghẹnẹ u ti ru okenọ a tẹ raha ahwo omuomu na no?

      Nọ a tẹ raha ahwo omuomu no, Jesu o ti su evaọ ikpe odu ọvo (1,000). Evaọ oke yena, tei te ahwo idu udhuhrẹ-gbene (144,000) nọ a ti lele iei su na a ve ti fiobọhọ kẹ ahwo-akpọ jọ gbagba. Evaọ obọ ekuhọ etoke yena, yọ a zihe akpọ na ruọ aparadase owowoma no, yọ ahwo nọ eva e be were fikinọ a bi yoẹme kẹ Jihova ọvo a te jariẹ. Jesu o ve ti zihe esuo na kẹ Jihova Ọsẹ riẹ. Evaọ oke yena, “odẹ [Jihova] o [vẹ te] jọ fuafo.” (Matiu 6:9, 10) O te jọ vevẹ nọ Jihova yọ emamọ Osu nọ ọ be rẹrote ahwo kpobi nọ o bi su. Kẹsena Jihova ọ vẹ te raha Setan, idhivẹri na, gbe amọfa kpobi nọ a be wọso esuo riẹ no. (Eviavia 20:7-10) Eware iwoma nọ Uvie Ọghẹnẹ u ti ru na e te jọ bẹdẹ bẹdẹ.

      GBE WUHRẸ EWARE EFA

      Wuhrẹ oware nọ o sai ro mu omai ẹro nọ Ọghẹnẹ ọ te rehọ Uvie na ru eyaa kpobi nọ ọ yaa evaọ Ebaibol na gba evaọ obaro.

      4. Uvie Ọghẹnẹ u ti si egọmeti ahwo-akpọ notọ

      “Ohwo o . . . su ọrivẹ riẹ ruọ uye” no. (Ọtausiuwoma Na 8:9) Jihova ọ te rọ Uvie na si uye nọ okienyẹ ọ wha ze no notọ.

      Se Daniẹl 2:44 gbe 2 Ahwo Tẹsalonika 1:6-8, kẹsena wha vẹ ta ẹme kpahe enọ nana:

      • Eme Jihova avọ Jesu Ọmọ riẹ a ti ru egọmeti ahwo-akpọ avọ ahwo nọ a rrọ abọ rai kpobi?

      • Ẹvẹ eware nọ who wuhrẹ kpahe Jihova avọ Jesu no e rọ kẹ owhẹ imuẹro nọ a ti kienyẹ ohwo ọvo ho?

      Jesu nọ ọ rrọ obọ odhiwu bi su aparadase otọakpọ.

      5. Jesu họ Ovie nọ ọ mai woma kpaobọ

      Jesu nọ ọ rrọ Ovie Uvie Ọghẹnẹ na o ti ru eware buobu nọ e te kẹ ahwo nọ o bi su erere. Kporo IVIDIO na re whọ ruẹ oghẹrẹ nọ Jesu o ro dhesẹ no inọ ọ gwọlọ fiobọhọ kẹ ahwo, o te je wo ogaga nọ Ọghẹnẹ ọ kẹ riẹ nọ o re ro ru ere.

      IVIDIO: Jesu O Dhesẹ Eware nọ Uvie na U ti Ru (1:13)

      Okenọ Jesu ọ jọ otọakpọ, o ru eware nọ i dhesẹ eware nọ o ti ru evaọ Uvie na. Eghale vẹ evaọ usu eghale nana whọ be mae rẹro rai? Se eria Ebaibol nana nọ a jọ fodẹ eghale yena.

      NỌ JESU Ọ JỌ OTỌAKPỌ . . .

      NỌ JESU Ọ RRỌ OBỌ ODHIWU NA, O TI . . .

      • o ru okpofou gbe ẹkporo serihọ.​—Mak 4:36-41.

      6. Uvie Ọghẹnẹ u ti ru akpọ na woma evaọ obaro

      Uvie na u ti ru oware nọ Jihova o wo họ iroro rọ ma ahwo-akpọ evaọ oke ọsosuọ gba. Ahwo a te rria bẹdẹ bẹdẹ evaọ aparadase otọakpọ. Kporo IVIDIO na re whọ ruẹ epanọ Jihova ọ be rọ rehọ Jesu Ọmọ riẹ ru ẹjiroro Riẹ gba.

      IVIDIO: Epanọ Akpọ na O ti Woma Te Evaọ Obaro (4:38)

      Se Olezi 145:16, kẹsena wha vẹ ta ẹme kpahe onọ nana:

      • Kọ o were owhẹ nọ whọ rọ riẹ inọ Jihova o ti “ru ẹgwọlọ oware kpobi nọ o rrọ uzuazọ kẹe”?

      AHWO JỌ A RẸ TA NỌ: “Mai kpobi ma te kuobọgbe, ma sai ku ebẹbẹ akpọ na họ.”

      • Didi ebẹbẹ Uvie Ọghẹnẹ u ti kuhọ nọ egọmeti ahwo-akpọ a sai kuhọ họ?

      EME WHO WUHRẸ NO?

      Uvie Ọghẹnẹ u ti ru eware nọ Ọghẹnẹ ọ gwọlọ. U ti ru otọakpọ na soso fihọ aparadase nọ emamọ ahwo a te jọ gọ Jihova bẹdẹ bẹdẹ.

      Ọkiẹkpemu

      • Oghẹrẹ vẹ Uvie Ọghẹnẹ u ti ro ru odẹ Jihova fo?

      • Fikieme u ro mu omai ẹro nọ Uvie Ọghẹnẹ u ti ru eyaa nọ Ebaibol ọ ya na gba?

      • Eware jọ vẹ evaọ usu eware nọ Uvie na u ti ru na who bi rẹro rai gaga?

      Utee nọ whọ rẹ sai fihọ

      KIẸ KPAHE EFA

      Se kpahe oware nọ Amagidọn u dhesẹ.

      “Eme họ Ẹmo Amagẹdọn?” (Uzoẹme nọ o rrọ itanẹte)

      Se kpahe eware nọ e te via evaọ oke nọ Jesu o se “uye ulogbo” na.—Matiu 24:21.

      “Eme Họ Uye Ulogbo Na?” (Uzoẹme nọ o rrọ itanẹte)

      Rri epanọ ahwo nọ a rrọ uviuwou a sai ro kuomagbe roro kpahe epanọ Aparadase na ọ te jọ.

      Ruẹ Omara Evaọ Aparadase (1:50)

      Jọ evaọ iku nana nọ uzoẹme riẹ o ta nọ, “Me Wo Enọ Buobu nọ I Je Kpokpo Omẹ Udu” se kpahe epanọ ohwo jọ nọ ọ jẹ wọso egọmeti ọ rọ ruẹ iyo enọ riẹ.

      “Ebaibol O re Nwene Uzuazọ Ohwo” (Uwou-Eroro Na, Ọvo 1, 2012)