Ẹbẹbẹ Nọ A Rọ Areghẹ Kuhọ

EMOHA esa jọ evaọ Central Africa a gwọlọ nọ a re kpohọ okokohọ ubrotọ evaọ orẹwho rai. Kọ ẹvẹ a sai ti ro te obei? No oria nọ a be ria rite ẹwho nọ a ti jo ru okokohọ na u thabọ te emaele udhosa, edhere na ọ rrọ yoyoma avọ ovu, yọ a wo oghẹrẹ ọvo nọ a sai ro te obei hi. A tẹ jiroro inọ a rẹ gwọlọ edhighere esa mi rekọ a ruẹ enọ i woma ha.

Nọ ọkpako ukoko jọ evaọ ukoko rai ọ ruẹ ẹbẹbẹ nọ a wo, ọ tẹ kẹ ae ẹdhighere riẹ—ẹdhighere na ọ who no rekọ ọ gbẹ re gaga. O te dhesẹ kẹ ai oware nọ ọye omariẹ avọ amọfa a ru evaọ okenọ o vrẹ re a sai kpohọ okokohọ ubrotọ. Ọkpako ukoko na ọ tẹ jiroro kẹ ai inọ jọ ae imasa a dhẹ ẹdhighere ọvo. Ifue na o jọ lọlọhọ, rekọ o gwọlọ omodawọ. Ẹvẹ imasa a sae rọ dhẹ ẹdhighere ọvo?

Re a siọ uvo ogaga ba ẹdhẹ, inievo na a te kokohọ evaọ irioke frifri a tẹ gba ewha rai fihọ ẹdhighere na. Ohwo ọsosuọ na ọ be dhẹ ẹdhighere na yọ imava nọ i kiọkọ a rrọ obemu siawọ ze. Nọ ọ tẹ dhẹ enwenọ ubro emaele no, o ve nwrotọ, rehọ ẹdhighere na rẹrẹ ure. Rekọ, ọ rẹ ruẹ inọ okenọ ọ be rehọ ẹdhighere na rẹrẹ na yọ imava nọ i kiọkọ na a be rue riẹ re oji ọ siẹe ba etho no. Ohwo ọsosuọ na o ve mu otọ họ ẹnya.

Nọ imava na a tẹ nyate ẹdhighere na, omọvo ọ vẹ dhẹ iẹe yọ omọvo nọ o kiọkọ ọ gbẹ be nya otọ oware wọhọ ubro emaele ọfa taure ọ tẹ te dhẹ ẹkẹ riẹ. Fikiere avọ emamọ omaa gbe ọtamuo, ukpenọ ae imasa a rẹ nya oware wọhọ emaele udhosa kọ oware wọhọ emaele udhuvẹ a nya. Onya rai na o jọ uvrẹvru hu. A kuomagbe inievo emezae gbe erọ emetẹ Ileleikristi rai a tẹ reawere okokohọ na. (Izie. 31:12) Kọ whọ te daoma re whọ ruẹ nọ who kpohọ okokohọ ubrotọ evaọ ukpe ọnana?