Ono Ọ rẹ Sae Riẹ Oware nọ O te Via Evaọ Obaro?

“Mẹ họ Ọghẹnẹ . . . Me dhesiẹ urere na no umuhọ ze, gbe eware nọ e te via ha no umuhọ ze.” —Aizaya 46:9, 10.

EVAỌ oke mai nana nọ eware e jọ dọmu hu na, ahwo nọ a re ru ekiakiẹ kpahe esuo, okọ-ugho, gbe oyerikugbe ahwo-akpọ, a be kiẹ eware nọ e via vrẹ no gbe enọ e be via enẹna re a ruẹse rọ ere riẹ obaro. Fikinọ a gwọlọ riẹ obaro-akpọ rai, ahwo jọ a be nya bru ebuẹva-isi hayo ahwo nọ a re ru iruẹru-imizi. Ghele na, a be sae ruẹ oware ovo kru dhobọ họ. Kọ ginọ uzẹme inọ ma sae riẹ oware nọ o te via kẹ akpọ na, uviuwou mai, gbe omai omomọvo vievie he? Kọ ohwo jọ ọ sae ginẹ riẹ obaro-akpọ?

Evaọ ẹme nọ ọ ta kẹ Aizaya ọruẹaro na, nọ ma wariẹ evaọ obehru na, Jihova Ọghẹnẹ Erumeru na o dhesẹ inọ ọ rẹ sae ta oware nọ o te via evaọ obaro. Ọghẹnẹ ọ rehọ ẹkwoma Aizaya ta epanọ a ti ro siwi emọ Izrẹl oke anwae no igbo Babilọn gbe epanọ a ti ro kpo nyae wariẹ bọ Jerusalẹm avọ etẹmpol riẹ. Ugogo eware vẹ eruẹaruẹ nana i dhunu te? Oware wọhọ ikpe egba-ivẹ (200) re oke na u te ti te, Aizaya ọ ta inọ Sairọs họ ọnọ o ti fi Babilọn kparobọ. Ofariẹ, Aizaya o dhesẹ epanọ Sairọs o ti ro ru ei—inọ ọ rẹ te kpọ ame Ethẹ Yufretis, onọ o jọ ọthọwẹ kẹ okpẹwho na kpohọ oria ofa. Ọ tubẹ ta inọ oke nọ Sairọs o ti te okpẹwho na, ethẹ ilogbo erọ ogba okpẹwho na i ti kpefihọ, onọ u ti ru ei lọhọ kẹ Sairọs ruọ okpẹwho na je fi ei kparobọ vẹrẹ.—Aizaya 44:24–45:7.

Wo ohẹriẹ no Ọghẹnẹ, ohwo-akpọ o wo ẹgba nọ ọ sae rọ riẹ obaro-akpọ họ. Solomọn ovie owareghẹ na o kere nọ: “Who seha hẹrẹ odẹ hẹ, keme whọ riẹ oware nọ ẹdẹ ọ rẹ wha tha ha.” (Itẹ 27:1) Ma gbẹ be ruẹ uzẹme ẹme yena nẹnẹ. Ohwo-akpọ ọvuọvo ọ rẹ sae riẹ obaro-akpọ omobọ riẹ dede he. Eme o ru Ọghẹnẹ wo ohẹriẹ no omai? Ọ riẹ eware kpobi nọ ọ ma fiotọ, te oghẹrẹ nọ ahwo-akpọ a rrọ gbe iroro eva rai. Nọ ọ tẹ gwọlọ, Ọghẹnẹ ọ rẹ sae kparo ruẹ oware nọ omomọvo gbe orẹwho soso u ti ru evaọ obaro. Ofariẹ, o wo ogaga nọ u thesiwa nọ ọ sae rọ kpọ epanọ eware e rẹ nya. Nọ ọ tẹ rọ ẹkwoma eruẹaro riẹ ta nọ oware jọ o be te via, ọ rẹ ‘tua ẹme idibo riẹ, je ru ẹjiroro ikọ riẹ gba.’ (Aizaya 44:26) Jihova Ọghẹnẹ ọvo ọ rẹ sae ginẹ ta ẹme otiọye.

No oke Aizaya rite okenọ a ro yẹ Jesu, Mesaya na, u te ikpe egba-ihrẹ (700). Ghele na, Aizaya ọ ruẹaro kpahe ẹtha Mesaya na. Dede na, no umuo ikpe-udhusoi avọ ikpegberee ze, otu nọ o re si-ikẹ kpahe Ebaibol a be vro ẹgbagba ọrọ obe Aizaya. A ta nọ eme Aizaya na yọ eruẹaruẹ hẹ, rekọ eware nọ e via vrẹ no re a te kere ai fihotọ. Kọ ere o ginẹ rrọ? Evaọ ukpe 1947, a ruẹ uko-obe Aizaya gbe iko-ebe efa jọ evaọ eghogho utho kẹle Abade Owhuowhu na. Egba-eriariẹ a kiẹ via inọ a kere uko-obe Aizaya na vrẹ oware wọhọ ikpe ẹgba-ọvo (100) no taure a te ti yẹ Mesaya hayo Kristi nọ a ya eyaa riẹ na. Ẹhẹ, Ebaibol na e ta oware nọ o te jọ obaro via kpahotọ!

O sae jọnọ otoriẹ obọrai Aizaya gbe amọfa nọ a kere Ebaibol na a ro kere eware nọ a ruẹaro rai kpahotọ evaọ Ebaibol na ha. Ukpoye, “Ẹzi Ẹri o mu ae a [tẹ] ta ẹme nọ o no obọ Ọghẹnẹ ze.” (2 Pita 1:21) Evaọ uzoẹme nọ o rrọ aro na, ma te tẹrovi eware jọ nọ Aizaya ọ ruẹaro rai fihotọ nọ i rugba evaọ uzuazọ Jesu. Kẹsena ma vẹ te ta ẹme kpahe eware nọ Jesu avọ ikọ riẹ a ruẹaro rai kpahe oke mai na gbe obaro.