Enọ Ahwo nọ A s’Ebe
Eva Nehemaya 8:10, (NW) a ta kẹ ahwo Ju inọ a “re eware nọ i wo iwhri,” dede nọ Uzi na o ta evaọ Iruo-Izerẹ 3:17 inọ: ‘Wha re iwhri hi.’ Oghẹrẹ vẹ eme ivẹ nana e gbẹ rọ wọso ohwohwo ho?
Ẹme Hibru nọ a fa “eware nọ i wo iwhri” eva Nehemaya 8:10 gbe ẹme Hibru nọ a fa “iwhri” eva Iruo-Izerẹ 3:17 i wo ohẹriẹ. Ẹme Hibru che’lev, nọ a fa “iwhri” evaọ Iruo-Izerẹ 3:17 a rẹ rehọ iẹe ta ẹme kpahe iwhri erao hayo orọ ahwo-akpọ. (Izerẹ 3:3; Ibr. 3:22) Eme nọ e wariẹ Iruo-Izerẹ 3:17 họ i dhesẹ inọ emọ Izrẹl a rẹ re ekpalekpa iwhri nọ e rrọ ekuakua eva gbe ibieku arao nọ a bi ro dheidhe hayo iwhri nọ e rrọ ibieku na ha keme “iwhri kpobi e rọ ỌNOWO na.” (Izerẹ 3:14-16) Fikiere, a rẹ re iwhri arao nọ a bi ro dheidhe kẹ Jihova ha.
Evaọ abọdekọ riẹ, ẹme Hibru nọ a jọ Nehemaya 8:10 fa “eware nọ i wo iwhri” na họ mash·man·nim’, yọ etenẹ ọvo ẹme nana o jẹ roma via evaọ Ikereakere Hibru na. A rehọ e riẹ no ẹme nana ze sha·menʹ, nọ otofa riẹ o rrọ “jọ ruaro, jọ fuẹfu.” O wọhọ nọ eme efa nọ i wo otofa ovona họ ọruẹriọ gbe evawere. (Wawo Aizaya 25:6.) A rehọ ẹme Hibru na she’men no ẹme Hibru nọ a re se sha·men’ na ze, yọ ẹsibuobu a rẹ fa ẹme na she’men “ewhri,” onọ u kugbe “ewhri olivi.” (Izie. 8:8; Izerẹ 24:2) Wọhọ epanọ a rehọ mash·man·nimʹ tẹme evaọ Nehemaya 8:10, o wọhọ nọ o be ta kpahe emu nọ a rehọ ewhri buobu there yọ ẹsejọhọ arao nọ o wo iwhri omojọ a ro kugbe there emu na orọnikọ ekpalekpa iwhri arao ho.
Dede nọ a vẹvẹ emọ Izrẹl unu nọ a re ekpalekpa iwhri arao ho, a sae re emamọ emu ọwewere. Wọhọ oriruo, a jẹ hae rehọ ewhri, maero kọ ewhri olivi kugbe eka ro ru ikeki, orọnikọ iwhri arao ho. (Izerẹ 2:7) Fikiere, obe ọ Insight on the Scriptures o ta inọ “eware nọ i wo iwhri” nọ a jọ oria Ebaibol nana fodẹ na “họ eware epoporiẹ, enọ e yamu hu, emu ọwewere nọ a rọ ewhri there.” Evaọ Ebaibol Isoko, a fa “eware nọ i wo iwhri” na nọ “emamọ emu.”
Ileleikristi a rẹ kareghẹhọ inọ uzi ọ a re iwhri hi o jọ abọjọ uzi nọ a rọ kẹ emọ Izrẹl. Ileleikristi a rrọ otọ Uzi na ha, onọ u kugbe izi kpobi nọ i wo obọ kpahe erao nọ a re ro dheidhe.—Rom 3:20; 7:4, 6; 10:4; Kọl. 2:16, 17.