Orọwọ Ovojọ Nọ U Notọ Ze U Re Su Kpohọ ofa

PỌL ukọ na o kere se Ileleikristi nọ e jẹ rria abọ urere ikpe-udhusoi ọsosuọ inọ: “Wha yọrọ oma.” Eme ọ jẹ vẹvẹ ae unu kpahe na? Ọ ta nọ: “Re ohwo ọvo ọ siọ eriariẹ ifofe gbe ẹghẹ rai ba ẹ rọ viẹ owhai họ, enọ erọ uwuhrẹ ahwo akpọ.”—Ahwo Kọlọsi 2:8.

Ghelọ unuovẹvẹ Pọl na, Ileleikristi jọ evaọ ikpe-udhusoi avivẹ a jẹ iwuhrẹ egbaeriariẹ anwae rehọ, jẹ rehọ ai fi otofa họ eware nọ a rọwo. Fikieme? A gwọlọ nọ ahwo nọ e riẹ ikpebe evaọ otọ esuo Rom a jẹ ae rehọ, re a jẹ rọ ere ru ahwo buobu kuomagbe ae.

Justin Martyr, omọvo Ileleikristi nana nọ a riodẹ ziezi, o wo orọwọ inọ Ọtota Ọghẹnẹ ọ romavia kẹ egbaeriariẹ Griki ikpe buobu nọ e vrẹ taure Jesu ọ tẹ ziọ otọakpọ. Evaọ eriwo Justin gbe otu-iwuhrẹ efa nọ i wo ọkpọ iroro riẹ, ọgwakugbe iwuhrẹ egbaeriariẹ gbe iwuhrẹ nọ i notọ ze u re ru nọ a jẹ jọ akpọ-soso jẹ Egagọ-Ileleikristi rehọ.

Ahwo buobu a je gine kuomagbe utu Ileleikristi nana nọ a jẹ ọgwakugbe iwuhrẹ rehọ wọhọ eriwo Justin Martyr na. Dedena, ẹjẹrehọ uwuhrẹ ovojọ nọ u notọ ze u su kpohọ ẹjẹrehọ ọkpọ iwuhrẹ itieye na efa, enọ a rehọ nẹnẹ wọhọ iwuhrẹ Ileleikristi. Re whọ sae ruẹ vuhumu inọ enana yọ iwuhrẹ uzẹme he, gbe se haro re whọ rehọ eme nọ ebe buobu e ta kpahe iwuhrẹ itieye na rọ wawọ oware nọ Ebaibol na o gine wuhrẹ.

[Enọ i wo iwoho nọ o rrọ ẹwẹ-obe avọ 9]

Ẹdhọ: Barrators—Giampolo/The Doré Illustrations For Dante’s Divine Comedy/Dover Publications Inc.; ikọ-odhiwu: Art Resource, NY; uwoho eghẹnẹ esa nọ e rrọ ọvo: Museo Bardini, Florence