Mosis Yọ Ọzae Nọ O Wo Ẹrọwọ

EME HỌ ẸRỌWỌ?

Ebaibol na o dhesẹ nọ “ẹrọwọ” yọ oware nọ ohwo ọ rọwo fiki imuẹro egaga nọ o wo. U re mu ohwo nọ o fi ẹrọwọ họ Ọghẹnẹ ẹro inọ Ọghẹnẹ o ti ru eyaa riẹ kpobi gba.

ẸVẸ ẸRỌWỌ MOSIS O RO DHESẸ OMA VIA?

Mosis ọ tẹrovi eyaa Ọghẹnẹ ẹsikpobi. (Emuhọ 22:15-18) O wo uvẹ nọ ọ hae te rọ riakpọ kuoma evaọ uwou ovie Ijipti, rekọ o ru ere he, ukpoye o “kuomagbe emọ Ọghẹnẹ ruẹ uye vi ikpenọ o re kuomagbe usu eva-ewerọ uzioraha.” (Ahwo Hibru 11:25) Kọ oyena yọ iroro nọ Mosis ọ jẹ asohẹrioke, nọ ọ te vioja riẹ evaọ obaro? Vievie, keme Ebaibol na ọ ta nọ Mosis “o thihi akọ [wọhọ ẹsenọ ọ be] ruẹ ọ nọ a rẹ ruẹ hẹ.” (Ahwo Hibru 11:27) Mosis ọ vioja iroro yena vievie he.

Mosis ọ bọ ẹrọwọ amọfa ga. Wọhọ oriruo, roro kpahe oware nọ o via nọ o wọhọ nọ Fẹro avọ egbaẹmo riẹ a ko emọ Izrẹl họ Abade Ọwawae na. Fikinọ emọ Izrẹl a roro nọ u re kẹ ai no, a te je bo se Jihova gbe Mosis. Kọ eme Mosis o ru?

O wọhọ nọ Mosis ọ riẹ hẹ sọ Ọghẹnẹ ọ te hẹriẹ Abade Ọwawae na re emọ Izrẹl a sae dhẹ vabọ. Rekọ u mu Mosis ẹro nọ Ọghẹnẹ o ti ru oware jọ re ọ sae thọ ahwo riẹ. Yọ Mosis ọ gwọlọ nọ emọ Izrẹl a wo ọkpọ imuẹro evona. Ebaibol ọ ta nọ: “Mosis ọ tẹ ta kẹ ahwo na nọ, ‘Ozọ u mu owhai hi, dikihẹ ga, re wha te ruẹ usiwo ỌNOWO na, nọ o ti ru kẹ owhai nẹnẹ na.’” (Ọnyano 14:13) Kọ Mosis ọ sae bọ ẹrọwọ emọ Izrẹl ga? Ee. Ebaibol ọ ta kpahe Mosis avọ emọ Izrẹl inọ: “Fiki orọwọ ahwo na a rọ nya Abade ọwawae vrẹ wọhọ otọ oyaya.” (Ahwo Hibru 11:29) Ẹrọwọ Mosis o fi obọ họ kẹ ọyomariẹ gbe amọfa kpobi nọ a fi ẹrọwọ họ Jihova.

EME MA WUHRẸ NO ORIRUO RIẸ ZE?

Ma rẹ sae rọ aro kele Mosis nọ ma tẹ be tẹrovi eyaa Ọghẹnẹ ẹsikpobi. Wọhọ oriruo, Ọghẹnẹ ọ ya eyaa nọ o ti ru ẹgwọlọ mai gba kẹ omai otẹrọnọ ma rọ egagọ riẹ karo. (Matiu 6:33) Uzẹme riẹ họ, o rẹ sae jọ bẹbẹ kẹ omai ẹsejọ re ma kpairoro vrẹ eware nọ ahwo kpobi a bi le jẹ rọ egagọ Ọghẹnẹ karo. Rekọ u mu omai ẹro nọ ma te bi yeri umutho uzuazọ, jẹ be rọ egagọ Jihova karo, o ti ru ẹgwọlọ mai gba kẹ omai. Ọ ya eyaa nọ: “Mẹ sae se owhẹ ba hayo kiukeku owhẹ gbehe.”—Ahwo Hibru 13:5.

O gwọlọ nọ ma rẹ bọ ẹrọwọ amọfa ga re. Wọhọ oriruo, esẹgbini a riẹ nọ a wo owha-iruo ulogbo re a fi obọ họ kẹ emọ rai wo ẹrọwọ ọgaga. Nọ emọ na e be rro ze na, o gwọlọ nọ esẹgbini a re fi obọ họ kẹ ae riẹ nọ Ọghẹnẹ ọ rrọ, ọnọ o bi wuhrẹ omai re ma sae hẹriẹ oware uwoma no uyoma. Ofariẹ, o tẹ jẹ gwọlọ nọ esẹgbini a re fi obọ họ kẹ emọ rai riẹ nọ izi Ọghẹnẹ nọ a re ru lele o rẹ wha erere se ai. (Aizaya 48:17, 18) Okẹ ovo nọ o ghare vi onana o riẹ hẹ, re esẹgbini a fi obọ họ kẹ emọ rai ‘rọwo nọ Ọghẹnẹ ọ rọ, jegbe nọ ọ te hwosa kẹ enọ e guọlọ e riẹ.’—Ahwo Hibru 11:6.