KỌ WHỌ RIẸ?

Fikieme ahwo a jẹ hai ro keke aro fihọ bẹre iwu rai evaọ oke ahwo nọ a gbiku rai fihọ Ebaibol na?

IKEREAKERE na e ta kpahe ahwo buobu nọ a bẹre iwu rai. Ẹsejọhọ onana o rẹ sai gbe ahwo nọ a bi se Ebaibol na unu nẹnẹ, rekọ ahwo Ju a jẹ hai ru onana ro dhesẹ epanọ oware o kẹ rai uye te, wọhọ okenọ a tẹ rrọ uweri, ọkora, ofu hayo nọ oware jọ o tẹ wha omovuọ se ai.

Wọhọ oriruo, Rubẹn ọ “za iwu riẹ” okenọ ọ ruẹ nọ omaa nọ ọ gwọlọ ro siwi Josẹf ọsọvo riẹ o raha fikinọ a zẹ Josẹf kpohọ igbo no. Okenọ Jekọp ọsẹ rai o roro nọ arao ojihẹ o kpe Josẹf no, “ọ tẹ za iwu riẹ.” (Emu. 37:18-35) Job ọ “bẹre ewu riẹ” okenọ a vuẹe nọ emọ riẹ kpobi i whu no. (Job 1:18-20) Ọnyukọ jọ ọ dhẹ bru Ilai Ozerẹ Okpehru na ze “avọ iwu ebẹbẹre” te vuẹe nọ a fi Izrẹl soso kparobọ no evaọ ẹmo, inọ a kpe emezae ivẹ Ilai no yọ a wọ etehe-ọvọ na rehọ no. (1 Sam. 4:12-17) Nọ Josaya o yo ẹme obe Uzi na nọ a se kẹe jẹ riẹ epanọ ahwo Izrẹl a ruthọ te, “ọ tẹ bẹre iwu riẹ.”—2 Iv. 22:8-13.

Okenọ a je gu Jesu ẹdhọ, Ozerẹ Okpehru na, Kayafas ọ “bẹrẹ iwu riẹ” fiki ẹme jọ nọ Jesu ọ ta, nọ ọyomariẹ o rri nọ ẹme-aghọ. (Mat. 26:59-66) Uzi egagọ ahwo Ju o ta nọ ohwo kpobi nọ a jọ iraro riẹ ta ẹme-aghọ kpahe odẹ Ọghẹnẹ ọ rẹ bẹre iwu riẹ. Rekọ nọ a raha Jerusalẹm no, uzi egagọ ahwo Ju ofa jọ o tẹ ta nọ “ohwo kpobi nọ a jọ iraro riẹ ta ẹme-aghọ kpahe odẹ Ọghẹnẹ ọ gbẹ bẹre iwu riẹ hẹ, o gbẹ rrọ ere he iwu ahwo i ti zihe ruọ inwrehọ.”

Dede na, nọ uweri ohwo u gbe no udu riẹ ze he nọ ọ tẹ make bẹre iwu riẹ, Ọghẹnẹ o re se onana gb’oware he. Fikiere, Jihova ọ tẹ ta kẹ emọ Izrẹl nọ, ‘wha bẹre eva rai orọnọ iwu rai hi; re wha kurẹriẹ bru omẹ ze.’—Joẹl 2:13.