Epanọ Geyọs O Ro Fiobọhọ Kẹ Ibe Ileleikristi Riẹ

GEYỌS avọ ibe Ileleikristi efa evaọ ubrobọ ekuhọ ikpe-udhusoi ọsosuọ a rẹriẹ ovao dhe ebẹbẹ. Otu nọ o je wuhrẹ iwuhrẹ erue a jẹ daoma whrehe ẹrọwọ amọfa je fi ohẹriẹ họ ukoko na. (1 Jọn 2:​18, 19; 2 Jọn 7) Ọzae jọ nọ a re se Diọtrẹfis ọ jẹ ta “eme iyoma” kpahe Jọn ukọ na gbe amọfa, ọ jẹ rọwo dede Ileleikristi nọ e jẹ hai weze bru ikoko rehọ họ, yọ ọ jẹ daoma ta udu amọfa raha re a rọ aro kele ekpehre uruemu riẹ. (3 Jọn 9, 10) Ẹbẹbẹ nana ọ jọ ukoko na evaọ okenọ Jọn o ro kere ileta se Geyọs. Ileta nana nọ o kere evaọ oware wọhọ 98 C.E. na ma bi se “Ileta Avọ Esa Jọn” evaọ Ikereakere Griki Ileleikristi Na.

Ghelọ ebẹbẹ nọ Geyọs ọ rẹriẹ ovao dhe, ọ ruabọhọ egagọ Jihova. Ẹvẹ o ro dhesẹ nọ o gine ru ere? Fikieme u ro fo nọ ma rọ aro kele oriruo Geyọs nẹnẹ? Ẹvẹ ileta Jọn e sai ro fiobọhọ kẹ omai ru ere?

ILETA RO SE OGBẸNYUSU NỌ A YOU GAGA

Oleleikristi nọ o kere ileta avọ esa Jọn na o se omariẹ “ọkpako na.” Oghẹrẹ nana nọ o dhesẹ omariẹ na u te epanọ Geyọs nọ ọ jọ wọhọ ọmọ oyoyou kẹe evaọ ukoko na, ọ rọ riẹ nọ Jọn ukọ na ọ be ta ẹme na. Jọn ọ nabi se Geyọs “oyoyou na, ọnọ me you gaga.” Kẹsena Jọn ọ tẹ ta nọ jọ u woma kẹe evaọ eware kpobi re o je wo omokpokpọ. Emamọ ẹme Jọn ọ ta kpahe Geyọs na, yọ emamọ ẹrro ọ lẹ kẹe re na!​—3 Jọn 1, 2, 4.

O sae jọnọ ọkpako ukoko Geyọs ọ jọ oke yena, dede nọ ileta na e nwane ta ere gbiae he. Jọn o jiri Geyọs fikinọ ọ jẹ hai dede inievo na rehọ, dede nọ ọ riẹ rai ẹdẹvo ho. Uruemu nana u dhesẹ kẹ Jọn nọ Geyọs o dikihẹ ga evaọ egagọ Ọghẹnẹ, keme notọ avọ otọ ze ọrara nọ a re dede rehọ yọ uruemu jọ nọ a re ro vuhu idibo Ọghẹnẹ.​—Emu. 18:​1-8; 1 Tim. 3:2; 3 Jọn 5.

Ujiro nọ Jọn o jiri Geyọs nọ o je dede ibe Ileleikristi rehọ na, u dhesẹ nọ Ileleikristi a jẹ hai no oria nọ Jọn ọ jọ kpohọ ikoko sa-sa je zihe ze, yọ u muẹro nọ inievo nana a jẹ hae vuẹ Jọn oware nọ a rọ ẹro ruẹ evaọ erẹ rai. O sae jọnọ enẹ a jẹ rọ vuẹ Jọn Kpahe ikoko na.

U muẹro nọ inievo nọ e jẹ hai weze bru ikoko na a te gwọlọ nọ ibe Ileleikristi rai a re lele rria. Iwou nọ erara e rẹ kpahe evaọ oke yena e jọ yoyoma, a jẹ hae riẹ erara na ru hu, yọ a jẹ hae jarai gbe-ọfariẹ gaga. Fikiere nọ o tẹ lọhọ, ahwo nọ a bi kperẹ a jẹ hae gwọlọ kpahe oria egbẹnyusu rai, inievo na kọ uwou ibe Ileleikristi rai.

“FIKI ODẸ RIẸ A RỌ RRỌ ONYA NA”

Jọn ọ wariẹ tuduhọ Geyọs awọ nọ ọ hai dede ahwo rehọ, inọ okenọ “[inievo na e] te ruọ edhere, fiobọhọ kẹ ae evaọ oghẹrẹ nọ o rẹ were Ọghẹnẹ.” Onana u dhesẹ nọ Geyọs ọ rẹ kẹ ae eware nọ a sae rọ rẹrote omarai bẹsenọ a re te ukoko ofa nọ a bi kpohọ. U muẹro nọ Geyọs o ru ere kẹ inievo nọ e kpahe riẹ no vẹre, keme inievo na a vuẹ Jọn kpahe uyoyou nọ o dhesẹ kẹ ae gbe ẹrọwọ riẹ.​—3 Jọn 3, 6.

O sae jọnọ inievo nana yọ imishọnare, enọ Jọn ọ jẹ hai vi uwou, hayo esẹro ọnyawariẹ. Oghẹrẹ nọ o jọ kpobi kẹhẹ, fiki usi uwoma na a je ro kpohọ erẹ na. Jọn ọ ta nọ: “Fiki odẹ riẹ a rọ rrọ onya na.” (3 Jọn 7) Jọn ọ jọ owọ avọ 6 fodẹ Ọghẹnẹ, onana u dhesẹ nọ okenọ ọ ta nọ “fiki odẹ riẹ,” odẹ Jihova ọ jẹ ta kpahe na. Fikiere, o gwọlọ nọ a re dede inievo nana rehọ ziezi keme a rrọ ukoko Ileleikristi na re. O nwane wọhọ epanọ Jọn o kere inọ: “O gba omai họ nọ ma re dede ahwo otiọye rehọ jẹ rẹrote ai, re mai kpobi ma jọ ibe iruiruo evaọ uzẹme na.”​—3 Jọn 8.

OBUFIHỌ EVAỌ ETOKE ẸBẸBẸ

Orọnikọ fiki uyere ọvo Jọn o ro kere ileta se Geyọs ho. Jọn ọ jẹ gwọlọ fiobọhọ kẹe fi ẹbẹbẹ ologbo jọ kparobọ re. Fiki ẹjiroro jọ, oniọvo jọ evaọ ukoko oke yena nọ a re se Diọtẹfis ọ jẹ rọwo dede inievo nọ e jẹ hai weze kpohọ ikoko na rehọ họ. Ọ jẹ tubẹ daoma whaha inievo efa nọ i je dede ae rehọ.​—3 Jọn 9, 10.

Avro ọ riẹ hẹ, inievo nọ i je weze kpohọ ikoko na a hae te gwọlọ lele Diọtẹfis rria ha, o hẹ make jọnọ uvẹ na u rovie fihọ. Ọ jẹ hae gwọlọ oria ọsosuọ evaọ ukoko na, ọ jẹ rọ adhẹẹ jẹ oware ovo nọ u no obọ Jọn ze rehọ họ, yọ ọ jẹ hae ta eme iyoma kpahe Jọn ukọ na gbe amọfa. Dede nọ Jọn o se rie owuhrẹ ọrue he, Diọtẹfis ọ jẹ wọso udu esuo Jọn ukọ na. Isiuru nọ Diọtẹfis o wo kẹ ọkwa, gbe uruemu riẹ nọ u fo ho, u ru no ohwo ọ sae rọ nọ sọ o gine wo emamọ usu kugbe Ọghẹnẹ. Uruemu Diọtẹfis na u ru omai riẹ epanọ isiuru kẹ ọkwa gbe omorro o sae rọ wha ohẹriẹ fihọ ukoko na. Fikiere, Jọn ọ ta kẹ Geyọs nọ: “Whọ rọ aro kele oware uyoma ha.” (3 Jọn 11) Ẹme nana o wuzou kẹ omai gaga re nẹnẹ.

OBỌDẸ ẸJIRORO NỌ MA RE RO RU EWOMA

Wo ohẹriẹ no Diọtẹfis, Jọn ọ ta nọ Demetriọus o dhesẹ emamọ uruemu nọ u fo aruorokele. Jọn o kere nọ: “A be ta emamọ ẹme kpahe Demitriọs, . . . ma bi se isẹri kpahe iẹe re, yọ whọ riẹ nọ isẹri mai yọ uzẹme.” (3 Jọn 12) O sae jọnọ o gwọlọ nọ Geyọs o re fiobọ jọ họ kẹ Demitriọs, yọ o sae jọnọ Jọn ukọ na ọ be rọ ileta riẹ nọ a se obe Jọn avọ esa na dhesẹ Demitriọs jẹ ta nọ jọ a fiobọhọ kẹe. O wọhọ nọ Demitriọs ọvo ọ rọ obọriẹ wha ileta na se Geyọs. Nọ ọ rrọ ọnyukọ Jọn, hayo oniọvo nọ ọ jẹ hai rri ikoko sa-sa na, u muẹro nọ Demitriọs o gine dhesẹ emamọ iruemu nọ a kere kpahe iẹe na ziezi.

Fikieme Jọn o ro kere se Geyọs nọ ọ gbẹ hai dede erara rehọ, dede nọ o bi ru ere no vẹre? Kọ o sae jọnọ Jọn ọ ruẹ nọ u fo re ọ tuduhọ Geyọs awọ? Kọ o sae jọnọ Jọn ọ jẹ ruawa nọ ẹsejọhọ Geyọs ọ gbẹ te gwọlọ dede erara rehọ họ fikinọ Diọtẹfis ọ jẹ jowọ nọ o re ro si inievo nọ i bi dede ibe Ileleikristi rai rehọ no ukoko na? Oghẹrẹ kpobi nọ o jọ kẹhẹ, Jọn ọ tuduhọ Geyọs awọ nọ: “Ohwo nọ o bi ru oware uwoma ọ rrọ abọ Ọghẹnẹ.” (3 Jọn 11) Oyena yọ obọdẹ ẹjiroro jọ nọ ma re ro ru ewoma jẹ ruabọhọ iẹe.

Kọ ileta Jọn na i fiobọhọ kẹ Geyọs ruabọhọ uruemu riẹ nọ ọ jẹ hai ro dede ahwo rehọ na? Obe Jọn avọ esa nọ Ọghẹnẹ ọ kuvẹ re o jọ abọjọ Ebaibol na, re o hae tuduhọ omai awọ “rọ aro kele oware uwoma” na, o kẹ imuẹro onana.

EWARE NỌ MA RẸ SAI WUHRẸ NO JỌN AVỌ ESA ZE

Ebaibol na ọ gbẹ ta kpahe Geyọs vrẹ enẹ hẹ. Rekọ ma rẹ sai wuhrẹ eware jọ no umutho nana nọ ma riẹ kpahe iẹe na ze.

Orọ ọsosuọ, mai inievo jọ buobu ma wo otoriẹ uzẹme na fikinọ inievo efa a fialoma via je no erẹwho ruọ erẹwho fiki iruo Uvie na. Dede na, o nwane rọnọ Oleleikristi kpobi o kpohọ erẹ ugbothabọ no fiki iruo Uvie na no nẹnẹ hẹ. Rekọ wọhọ Geyọs, ma rẹ sae rọ oghẹrẹ jọ rọ uketha kẹ hayo tuduhọ inievo nọ e be hai no ẹkwotọ ruọ ẹkwotọ awọ, wọhọ esẹro okogho avọ eyae ra. Hayo whọ sae rọ oghẹrẹ jọ fiobọhọ kẹ inievo nọ e kwa kpohọ oria nọ a jọ mae gwọlọ iwhowho-uvie evaọ ẹkwotọ ra hayo orẹwho ofa nyai fiobọhọ. Fikiere ajọ ma “wo uruemu ọrara-odederehọ.”​—Rom 12:13; 1 Tim. 5:​9, 10.

Orọ avivẹ, u re gbe omai unu hu nọ ma tẹ ruẹ nọ oniọvo jọ ọ be wọso udu esuo evaọ ukoko na nẹnẹ, dede nọ onana o rẹ kake via ha. A wọso udu esuo Jọn, yọ oware ovona o via kẹ Pọl ukọ na re. (2 Kọr. 10:​7-12; 12: 11-13) Nọ o rrọ ere na, eme u fo nọ ma re ru nọ inievo jọ i te bi ru oware utiona evaọ ukoko na? Pọl ọ hrẹ Timoti nọ: “O gwọlọ nọ odibo Olori na ọ rẹ họre he, rekọ ọ rẹ jọ wolẹ kugbe ahwo kpobi, ọ rẹ jọ ọnọ ọ rẹ sai wuhrẹ ahwo, nyẹ oma riẹ nọ a te ru ei thọ, ọ rẹ rọ ẹwolẹ wuhrẹ enọ e be rọwo iwuhrẹ na ha.” Ma tẹ be hae jọ wolẹ nọ a tẹ maki ru omai eva dha, o rẹ sai ru nọ ahwo jọ nọ a rẹ jọ omamai rri gwọlọ ethobọ ọvo a re ro nwene uruemu rai. Ukuhọ riẹ, Jihova ọ rẹ sai “ru ai kurẹriẹ, a ve wo eriariẹ egbagba uzẹme na.”​—2 Tim. 2:​24, 25.

Orọ avesa, o gwọlọ nọ ma re muẹrohọ je jiri ibe Ileleikristi mai nọ e talamu Jihova dede nọ a be rẹriẹ ovao dhe ukpokpoma. Jọn ukọ na ọ tuduhọ Geyọs awọ ziezi jẹ vuẹe nọ oware uwoma o je ru na. Epọvo na re, u fo nọ ekpako ukoko a rẹ rọ aro kele oriruo Jọn nẹnẹ. O gwọlọ nọ a re jiri ibe Ileleikristi rai re “oma o [gbẹ] rọ ae he.”​—Aiz. 40:31; 1 Tẹs. 5:11.

Evaọ Ikereakere Griki ọsosuọ, eme egba ivẹ gbe ikpegbizii (219) i ru obe Jọn avọ esa na via. Ileta nana nọ Jọn o kere se Geyọs na họ obe Ebaibol nọ o mae kpẹre. Dede na, obe nana u wuzou gaga kẹ Ileleikristi nẹnẹ.