UWOU-EBE ITANẸTE Uwou-Eroro
UWOU-EBE ITANẸTE
Uwou-Eroro
Isoko
Ọ
  • Ẹ
  • ẹ
  • Ọ
  • ọ
  • EBAIBOL
  • EBE GBE EWARE EFA
  • IWUHRẸ
  • w17 Asoi ẹwẹ. 31-32
  • ‘Ajọwha gbe Uyoyou O Vọ Udu Mai Vi Epaọ Anwẹdẹ’

Ọnana o wo ividio ho.

Eva e dha owhẹ hẹ, ividio na ọ rọwo kporo ho.

  • ‘Ajọwha gbe Uyoyou O Vọ Udu Mai Vi Epaọ Anwẹdẹ’
  • Uwou-Eroro Na Nọ U Bi Whowho Uvie Jihova (Uwuhrẹ)—2017
Uwou-Eroro Na Nọ U Bi Whowho Uvie Jihova (Uwuhrẹ)—2017
w17 Asoi ẹwẹ. 31-32
Ọgwa nọ ahwo a vọ evaọ okokohọ obọ Cedar Point, Ohio, ukpe 1922

IRUẸRU MAI ERỌ OKE NỌ U KPEMU

‘Ajọwha gbe Uyoyou O Vọ Udu Mai Vi Epaọ Anwẹdẹ’

MAI ahwo idu eree (8,000) ma kokohọ evaọ ohiohiẹ Ediso-Oka ọrọ Azie 1922, nọ oke o be nyaharo na ọgwa nọ ma jọ na o te muhọ ẹroro. Ohwo-agbara na o te whowho nọ evaọ abọ nana okokohọ na nọ o wuzou gaga na, ohwo nọ u je kpobi ọ rẹ sae kpama vrẹ, rekọ a te kẹ ohwo ọvo uvẹ zihe rueva ha.

A so ile evaọ abọ emuhọ nọ a re se “Ile Egagọ” na, kẹsena Brọda Joseph F. Rutherford ọ tẹ ruọ eplatfọmo. Ahwo buobu evaọ ogbotu na a je rẹro oware nọ u ti lele iei. Ibi ahwo jọ a tẹ jẹ nya kpenẹ avọ enẹ evaọ ọdha na. Brọda Rutherford ọ tẹ ta nọ jọ a keria re a gaviezọ. Nọ ovuẹ riẹ u muhọ no, ma riẹ hẹ sọ ohwo jọ o muẹrohọ omohọ ulogbo nọ a kpiri wowoma jẹhọ obehru evaọ ọgwa na!

Uzoẹme ovuẹ nọ Brọda Rutherford ọ jẹ kẹ na họ, “Uvie odhiwu na o kẹle no.” Oware wọhọ auwa ọvo gbe ubro, uvou riẹ o jẹ rua evaọ ọgwa na, yọ ọ jẹ ta kpahe epanọ eruẹaro oke anwae a je ro whowho ovuẹ Uvie Ọghẹnẹ nọ ma bi rẹro riẹ na ududu. Nọ ọ joma kẹ ovuẹ na re no, ọ tẹ nọ inọ, “Kọ u mu owhai ẹro nọ Ovie oruaro na o mu esuo riẹ họ no?” Ogbotu na kpobi o te bo nọ: “Ee!”

Brọda Rutherford ọ tẹ ta avọ uvo oruarua nọ, “O tẹ rrọ ere, wha zihe kpohọ usiuwoma ota, O whai emọ Ọghẹnẹ nọ ọ mai kpehru na! . . . Rri, Ovie na o muhọ esuo no! Whai họ ahwo-ẹro riẹ. Fikiere wha whowho, wha whowho, wha whowho.”

Okioke yena, omohọ nọ a kpiri na u te ghelie rovie, yọ a kere fihọ iẹe nọ: “Wha Whowho Ovie na avọ Uvie Riẹ.”

Brọda Ray Bopp ọ ta nọ: “Ogbotu na kpobi o te duwuku.” Sista Anna Gardner ọ ta nọ o wọhọ ẹsenọ “ikpo uwou na kpobi i je nuhu fiki abọ nọ a jẹ tehe.” Brọda Fred Twarosh ọ ta nọ: “Ogbotu na kpobi ọ tẹ kpama ẹsiẹvo.” Brọda Evangelos Scouffas ọ ta nọ: “O wọhọ nọ oghẹrẹ ẹgba jọ ọ wọ omai kpama no ekpala nọ ma keria, ma te dikihẹ avọ aro mai nọ o je su-ame.”

Ahwo buobu nọ a jọ okokohọ yena a jẹ ta usiuwoma Uvie na no anwẹdẹ. Rekọ a wo ajọwha ọkpokpọ kẹ iruo na evaọ okokohọ nana. Sista Ethel Bennecoff ọ ta nọ Emọ-Uwuhrẹ Ebaibol na a no okokohọ na “avọ ajọwha gbe uyoyou nọ o vọ udu rai vi epaọ anwẹdẹ kpobi.” Sista Odessa Tuck nọ ọ jọ ikpe ikpegberee oke yena o no okokohọ na avọ ọtamuo inọ ọ rẹ kpahe fihọ use na, “Ono ọ rẹ nya?” Ọ ta nọ: “Mẹ riẹ oria nọ mẹ te nya ha, hayo oghẹrẹ nọ mẹ te rọ nya, gbe oware nọ me ti ru. Oware ovo nọ mẹ riẹ họ, mẹ gwọlọ jọ wọhọ Aizaya, ọnọ ọ ta nọ, ‘Mẹ na! Vi omẹ.’” (Aiz. 6:8) Brọda Ralph Leffler ọ ta nọ: “Obọdẹ ẹdẹ . . . yena nọ ma ghọghọ kẹ na họ ẹdẹ nọ ma ro gine mu ovuẹ Uvie na họ ewhowho, ovuẹ nọ o nya akpọ na soso duwu no nẹnẹ.”

Agbẹta nọ okokohọ nana nọ a jọ Cedar Point, Ohio ru evaọ ukpe 1922 na o rọ rrọ oware oka evaọ ikuigbe iruẹru idibo Ọghẹnẹ! Brọda George Gangas ọ ta nọ: “Okokohọ yena o ru omẹ wo ọtamuo inọ okokohọ ọvuọvo o re vo omẹ hẹ.” Ọ ta nọ anwọ oke yena vrẹ, okokohọ ọvuọvo o vo rie he. Sista Julia Wilcox o kere nọ: “Mẹ rẹ sai dhesẹ epanọ eva e rẹ were omẹ te he, oke kpobi nọ a tẹ fodẹ okokohọ Cedar Point nọ a ru evaọ ukpe 1922 na evaọ ebe mai. Oma o rẹ wọ omẹ bo nọ, ‘Me yere owhẹ Jihova, nọ whọ rọ kẹ omẹ uvẹ jọ etẹe.’”

Ẹsejọhọ, u wo okokohọ jọ nọ o kẹ omai otujọ buobu evawere gaga je ru omai wo ọwhọ gbe uyoyou ulogbo kẹ Ọghẹnẹ oride mai gbe Ovie riẹ na. Nọ ma bi roro kpahe okokohọ nana gbe efa itieye, oma o rẹ sae wọ omai ta re inọ, “Me yere owhẹ Jihova, nọ whọ rọ kẹ omẹ uvẹ jọ etẹe.”

Ibieme nọ Ma Riẹ Otọ Rai Hi

A kere ibieme na “ADV” fihọ oria kpobi, te ire, igbẹhẹ, gbe makọ iprogramo okokohọ na! Ahwo nọ a jọ okokohọ na a jẹ gwọlọ riẹ oware nọ ibieme yena i dikihẹ kẹ.a

“A rọ ame ugbẹ obiebi kere ADV gbalọ fihọ ewẹ ebe efuafo tamu inuethẹ kpobi. Ma jẹ nọ oware nọ ibieme na i dikihẹ kẹ, rekọ o wọhọ nọ uvumọ ohwo ọ riẹ hẹ, yọ a rọwo vuẹ omai hi o tẹ make rọnọ a riẹ.”​—Edith Brenisen.

a Rite inẹnẹ ma re gbẹ ruẹ uwoho ibieme yena evaọ oria ovo ho. Makọ utu inievo nọ i re koko iruẹru mai erọ oke nọ u kpemu họ dede a re ruẹ e rai hi.

Ọghẹnẹ Ọ Kuyo Olẹ jọ nọ Ogbotu na Ọ Riẹ Kpahe He

Ọzae-avọ-aye jọ nọ a re se Arthur avọ Nellie Claus a kake ziọ ọgwa na re a sae ruẹ emamọ oria keria. Arthur ọ ta nọ: “Mẹ jẹ gwọlọ nọ ẹme ọvuọvo o re fi omẹ ezọ vrẹ hẹ.” Idudhe na, eva i te mu ei họ ẹda. Fikinọ ọ gbẹ be sai thihakọ riẹ hẹ, ọ tẹ tubẹ kpama re ọ ruọ otafe, rekọ ọ riẹ nọ a te gbẹ kẹe uvẹ rueva ha. Oniọvo jọ nọ ọ be ruẹrẹ ahwo họ oria ẹkeria ọ tẹ nọe nọ: “Ẹvẹ whọ rẹ kpama vrẹ evaọ oke utiona?” Arthur ọ riẹ nọ o gbahọ nọ ọ rẹ ruọ otafe.

Nọ Arthur o je zihe ze, o te yo edo abọ nọ a jẹ tehe evaọ ọgwa na. Ọ tẹ jẹ gwọlọ oria jọ evaọ otafe nọ ọ rẹ sae jọ yo ẹme nọ a be ta, kẹsena ọ tẹ ruẹ oria jọ nọ ọ sae rọ gadiẹ kpobọ ehru ebọ, yọ oria na u kpehru te irula ikpegbezeza. Ọ tẹ rọ oghẹrẹ jọ gadiẹ jẹ ruẹ oria jọ nọ u rovie fihọ lafi ọgwa na.

Arthur ọ tẹ jọ oria nọ ọ gadiẹ kpohọ na ruẹ inievo jọ nọ e be manọ, yọ a be rọ oria nọ u rovie fihọ na rri Brother Rutherford nọ o bi ru ẹme na. A vuẹ rai nọ a jọ obọ ehru bru ifi sa-sa nọ a ro thuru omohọ na re u ghelie rovie. Rekọ re a sai bru ifi na kpobi ẹsiẹvo, a gbẹ gwọlọ amagha ọvo ọfa. Kọ o sae jọnọ Arthur o wo amagha ọsese evaọ ẹkpa riẹ? Eva e were inievo na gaga inọ Arthur o wo amagha ọsese otiọye. Kẹsena Arthur avọ inievo nọ i kiọkọ a tẹ ruẹrẹ oma fihọ ọvuọ oria riẹ be hẹrẹ oke nọ a ti ro bru ifi nọ a ro thuru omohọ na. Nọ Brọda Rutherford ọ tẹ ta nọ “Wha whowho” ọrọ avivẹ, inievo na a ve bru ifi na.

Inievo nọ e jọ okokohọ na a dhesẹ nọ omohọ ulogbo nọ u wo ekọlọ esa na o nabi ghelie rovie malẹ. Yọ a drọ uwoho Jesu fihọ udevie riẹ.

Kẹsena inievo na a tẹ vuẹ Arthur nọ ewewe ae omarai a rọ gadiẹ kpohọ etẹe na, rekinọ a gadiẹ no, a tẹ wọ ewewe na no wọhọ epanọ a ma omaa riẹ. Nọ o rrọ ere na, a rẹ sai gbe zihe nyae rehọ amagha ọfa ha, fikiere a tẹ lẹ se Jihova re o vi oniọvo jọ avọ amagha ze. U mu inievo nana ẹro nọ Jihova ọ rọ edhere igbunu yena kuyo olẹ rai na.

    Ebe Isoko Kpobi (1992-2025)
    Noi No
    Rueva
    • Isoko
    • Vi Ei Se Omọfa
    • Ru Ei Fihọ Oghẹrẹ nọ O Were Owhẹ
    • Copyright © 2025 Watch Tower Bible and Tract Society of Pennsylvania
    • Izi Kpahe Eroruiruo Evuẹ Na
    • Izi Oria Evuẹ Omobọ Ra
    • Esẹtini Oria Evuẹ Omobọ Ra
    • JW.ORG
    • Rueva
    Vi Ei Se Omọfa