Kọ A Nwene Eme nọ E Rrọ Ikereakere na No?

Ahwo jọ a re roro nọ a nwene eme nọ e rrọ Ikereakere na no, rekọ Aizaya ọruẹaro na ọ ta nọ Ẹme Ọghẹnẹ “ọ rẹ jọ bẹdẹ bẹdẹ.” (Aizaya 40:8) Ẹvẹ u ro mu omai ẹro inọ eyaa Ọghẹnẹ nọ e rrọ Ikereakere na e gbẹ rrọ gbagba wọhọ epanọ a ro kere ai evaọ oke ọsosuọ?

Ọghẹnẹ o wo ogaga nọ ọ rẹ rọ sẹro Ẹme riẹ re ahwo a siọ iẹe ba enwene. Evaọ oke anwae, ahwo nọ a re se ikere-obe a jẹ hae rọ obọ kere eme nọ e rrọ obe jọ fihọ ọfa. Ikere-obe na a jẹ hae romatotọ kele ubiẹme ọvuọvo evaọ Ikereakere Efuafo na re a ruẹ nọ a fi ẹme ọvo bae he, a si noi hi, yọ a nwene i rie gbe he. Rekọ ahwo-akpọ a gba ha, fikiere ikere-obe jọ a kere eware jọ thọ.

ẸVẸ O SAI RO MU OMAI ẸRO INỌ IKEREAKERE NA Ọ GBẸ RRỌ GBAGBA?

Iko-ebe anwae buobu gbidi gbidi erọ Ikereakere Efuafo na e gbẹ riẹ nẹnẹ. Otẹrọnọ oware jọ u wo ohẹriẹ evaọ ọjọ, a rẹ sae rehọ iẹe wawo enọ i kiọkọ re a riẹ uzẹme na.​—Whọ tẹ gwọlọ gbe se kpahe ẹme nana, iviena se uzoẹme na, “Has the Bible Been Changed or Tampered With?” evaọ jw.org.

Wọhọ oriruo, u wo ebe anwae jọ nọ a se Iko-Ebe Abade Owhuowhu na, enọ ahwo Bedouin a jọ ighogho itho nọ e kẹle Abade Owhuowhu na ruẹ evaọ 1947. Abọjọ Ikereakere Efuafo na e rrọ iko-ebe nana, yọ i kri vrẹ ikpe idu ivẹ (2,000) no. Egba-eriariẹ a rọ iko-ebe anwae nana rọ wawo Ikereakere Efuafo nọ ma wo nẹnẹ na. Kọ eme a ruẹ?

A ruẹ nọ eme nọ e rrọ Ikereakere Efuafo na e gbẹ rrọ epọvo na wọhọ epanọ e rrọ iko-ebe anwae na.a Eware nọ a kiẹ via evaọ iko-ebe anwae nọ e mai kri no i dhesẹ nọ ovuẹ nọ o rrọ Ikereakere na nẹnẹ na o gbẹ rrọ wọhọ epanọ a ro kere iei evaọ oke ọsosuọ. Fikiere, ma wo imuẹro inọ Ọghẹnẹ ọ sẹro ẹme riẹ gbagba fihọ Ikereakere Efuafo na.

Fikiere nọ ma te bi se Ikereakere Efuafo na nẹnẹ, ma rẹ sai fievahọ iẹe inọ ọ rrọ gbagba. Nọ o rrọ ere na, joma ta kpahe oware nọ eruẹaro Jihova evaọ oke anwae a rẹ sai wuhrẹ omai kpahe Ọghẹnẹ.