Oghẹrẹ nọ Olẹ O Sai ro Fiobọhọ Kẹ Owhẹ

Nọ okpẹyao jọ o kie aye jọ nọ a re se Pamela, ọ tẹ jẹ dhogbo epanọ o re ro siwi oma riẹ. Rekọ ọ jẹ lẹ se Ọghẹnẹ re, inọ o fiobọhọ kẹe thihakọ ẹbẹbẹ riẹ na. Kọ olẹ u gine fiobọhọ kẹe?

Pamela ọ ta nọ: “Evaọ ẹsibuobu, ozọ ẹyao na o jẹ hai mu omẹ gaga. Rekọ nọ mẹ tẹ lẹ se Jihova no, udu u re te omẹ otọ, ozọ u gbe mu omẹ hẹ. Edada ẹyao na e gbẹ rrọ omẹ oma, rekọ olẹ u bi fiobọhọ kẹ omẹ nọ eva e be sae rọ were omẹ ghele. Nọ ahwo a tẹ nọ omẹ kpahe epanọ oma mẹ o rrọ, mẹ rẹ ta kẹ ae nọ, ‘Oma na o gbẹ be kẹ omẹ uye, rekọ eva e be were omẹ ghele.’”

Uzẹme riẹ họ, orọnikọ ma rẹ hẹrẹ bẹsenọ eware egaga i re ru omai taure ma tẹ te lẹ hẹ. Mai kpobi na ma wo ọvuọ ebẹbẹ riẹ, te esese te ilogbo, yọ ma gwọlọ oware nọ u re fiobọhọ kẹ omai thihakọ. Kọ olẹ o sai fiobọhọ?

Ebaibol ọ ta nọ: “Gbolo owha ra kẹ Jihova, ọ te rẹrote owhẹ. Ọ rẹ kuvẹ vievie he re ohwo okiẹrẹe o kie.” (Olezi 55:22) Ẹme yena ọ rẹ ginẹ sasa ohwo oma! Kọ ẹvẹ olẹ o sai ro fiobọhọ kẹ owhẹ? Whọ tẹ ginẹ lẹ se Ọghẹnẹ evaọ oghẹrẹ nọ u fo, ọ te kẹ owhẹ oware nọ u re fiobọhọ kẹ owhẹ thihakọ ẹbẹbẹ na.—Rri ẹkpẹti na “Oware nọ Olẹ O rẹ Sai Fiobọhọ Kẹ Owhẹ Wo.”

Oware nọ Olẹ O Rẹ Sai Fiobọhọ Kẹ Owhẹ Wo

Udhedhẹ Ọghẹnẹ

‘Ta ayare ra via kẹ Ọghẹnẹ; udhedhẹ Ọghẹnẹ nọ u vi otoriẹ kpobi o vẹ te sẹro udu ra gbe ogaga iroro ra ẹkwoma Kristi Jesu.’ (Ahwo Filipai 4:6, 7) Whọ tẹ ginẹ ta eva ra kẹ Jihova, o ti ru udu te owhẹ otọ, whọ vẹ sai ru oware nọ u fo ghelọ ebẹbẹ ra na.

Areghẹ nọ o no obọ Ọghẹnẹ ze

“Otẹrọnọ ohwo jọ evaọ usu rai o wo areghẹ tere he, jọ ọ hae yare Ọghẹnẹ, keme ọ rẹ kẹ ahwo kpobi no eva ze buobu, yọ ọ rẹ poviẹ ohwo ho, ọ te rehọ iẹe kẹe.” (Jemis 1:5) Nọ ma te wo ẹbẹbẹ ologbo jọ, ẹsejọ ma rẹ gbẹ riẹ oware nọ ma re ru hu. Rekọ nọ whọ tẹ lẹ se Ọghẹnẹ nọ ọ kẹ owhẹ areghẹ, o ti ru nọ whọ te rọ kareghẹhọ eware buobu nọ who wuhrẹ no Ebaibol na ze no, nọ e rẹ sai fiobọhọ kẹ owhẹ riẹ oware nọ u fo nọ who re ru.

Ẹgba gbe omosasọ

“Evaọ eware kpobi, me bi wo ẹgba ẹkwoma ọnọ ọ be kẹ omẹ ogaga.” (Ahwo Filipai 4:13) Jihova họ Ọghẹnẹ Erumeru na, fikiere, ọ rẹ sae kẹ owhẹ ẹgba nọ who re ro thihakọ ẹbẹbẹ kpobi nọ whọ rẹriẹ ovao dhe. (Aizaya 40:29) U te no ere no, Ebaibol na o se Jihova “Ọghẹnẹ omosasọ kpobi.” Yọ ọ rẹ sae sasa omai oma “evaọ edawọ mai kpobi.”—2 Ahwo Kọrint 1:3, 4.

KỌ WHỌ TE RUABỌHỌ OLẸ?

Jihova ọ rẹ gba owhẹ họ nọ whọ lẹ sei hi. Ukpoye, o bi zizie owhẹ nọ whọ rọ iroro obọ ra lẹ sei. (Jerimaya 29:11, 12) Kọ who roro no ẹdẹ jọ inọ Ọghẹnẹ ọ be kuyo elẹ nọ whọ be lẹ hẹ? O tẹ rrọ ere, gbẹ hae lẹ ghele. Joma rehọ oriruo jọ dhesẹ oware nọ u ro fo nọ whọ rẹ gbẹ lẹ. Nọ ọmọ ọ tẹ ta kẹ ọsẹgboni riẹ nọ a ru oware jọ kẹe, ẹsejọhọ a te nwani ru oware nọ ọ gwọlọ na dẹẹ hẹ hayo evaọ okioke nọ ọ gwọlọ nọ a ro ru ei na ha. Keme o sae jọ nọ ọsẹgboni na a riẹ oware ofa nọ u woma vi onọ ọmọ na ọ be ta nọ a ru na. Oghẹrẹ kpobi nọ o rrọ kẹhẹ, ma riẹ nọ esẹgbini nọ i you emọ rai a rẹ siọ oware jọ ba eruo ho re a ro fiobọhọ kẹ emọ na.

Ere ọvona Jihova Ọghẹnẹ ọ gwọlọ nọ o re fiobọhọ kẹ owhẹ re, yọ a rẹ ruẹ ọsẹ nọ o you omai te Jihova ha. Whọ tẹ romatotọ roro kpahe eware nọ ma jọ Ebaibol na wuhrẹ kpahe olẹ no na je ru ai, Ọghẹnẹ o ti ru oware nọ o mai woma rọ kuyo olẹ kpobi nọ whọ lẹ sei.—Olezi 34:15; Matiu 7:7-11.