Eware nọ Ma Sai Wuhrẹ No Ileta Ivẹ Pita Ze

1. Nọ oke uwhu Pita o kẹle no, iruo ọfa vẹ Jihova ọ rehọ e riẹ ru?

PITA ukọ na ọ gọ Jihova ziezi ikpe buobu. O je lele Jesu no oria ruọ oria. Ọ ta usi uwoma kẹ ahwo nọ a ri yo usi uwoma na vievie he. Ọ tẹ jẹ jọ usu ikọ gbe ekpako nọ e jẹ rẹrote Ileleikristi ọsosuọ na. Nọ ọ ruẹ nọ oke nọ o ti ro whu o kẹle no, ọ tẹ gwọlọ nọ ọ rẹ tuduhọ inievo riẹ awọ. Evaọ oware wọhọ ukpe 62 C.E. rite 64 C.E., Jihova ọ tẹ rehọ ẹzi riẹ fiobọhọ kẹe kere ileta ivẹ nọ ma be jọ Ebaibol se obe Pita ọsosuọ gbe Pita avọ ivẹ na. Ọ jọ ileta nana ta nọ ọ gwọlọ tuduhọ Ileleikristi awọ re a sai dikihẹ ga nọ o te whu no.—2 Pita 1:12-15.

2. Ẹvẹ ma rọ riẹ nọ oware nọ u ti fiobọhọ kẹ inievo na dẹẹ Pita o kere fihọ ileta ivẹ riẹ?

² Okenọ Pita o kere ileta na, inievo na a wo ebẹbẹ buobu. O kere nọ: “Edawọ sa-sa e be wha idhọvẹ se owhai.” (1 Pita 1:6) Ahwo omuomu jọ a jọ ukoko na nọ a jẹ gwọlọ wuhrẹ ahwo thọ, yọ a je ru eware etọtọ. (2 Pita 2:1, 2, 14) U te no ere no, okenọ egbaẹmo Rom a te rọ nyaze te raha Jerusalẹm o kẹle no, oyejabọ o ro kere nọ: “Urere eware kpobi o kẹle no.” (1 Pita 4:7) Ileta ivẹ nọ Pita o kere na i ti fiobọhọ kẹ Ileleikristi thihakọ edawọ nọ i je te ai oke yena gbe enọ i ti te ai evaọ obaro.b

3. Eware jọ vẹ ma sai wuhrẹ evaọ ileta ivẹ nọ Pita o kere na?

³ Dede nọ Ileleikristi oke riẹ Pita o kere ileta na se, Jihova o ru nọ a ro fi ai họ Ebaibol na. Oyena u dhesẹ nọ i ti fiobọhọ kẹ omai nẹnẹ. (Rom 15:4) Nẹnẹ na ahwo buobu a bi ru eware etọtọ, yọ edawọ buobu i bi te omai. Edawọ nana e sae whae ze nọ o rẹ rọ jọ bẹbẹ re ma gọ Jihova. Oye ovo ho, uye ulogbo o rrọ obaro tha. O te ga vi onọ u te Ileleikristi gbe amọfa okenọ egbaẹmo Rom a nyaze te raha Jerusalẹm gbe etẹmpol na. Fikiere eware jọ nọ Pita ọ kareghẹhọ inievo na evaọ oke yena i ti fiobọhọ kẹ omai re. Ma te jọ ileta riẹ na ruẹ nọ u fo re ma hai rẹro ẹdẹ Jihova. Ma rẹ sae siọ ozọ ahwo ba ẹdhẹ. Ma ve je you ohwohwo gaga. Eme nọ Pita o kere e te jẹ kareghẹhọ ekpako ukoko re a rẹrote uthuru Ọghẹnẹ ziezi.

HAI RẸRO ẸDẸ JIHOVA

4. Eme obe 2 Pita 3:3, 4 o ta nọ ahwo a rẹ ta, kọ eme ma gbe fi eme itieye na họ udu mai hi?

⁴ Ahwo buobu nẹnẹ a rọwo nọ eruẹaruẹ Ebaibol i ti rugba ha. Ejọ i re se omai ẹkoko inọ, ‘Nẹnẹ akpọ wha be ta nọ akpọ o ti re? Wha wha eme rai họ obei, akpọ o bi re kpohọ obọ ọvo ho.’ (Se 2 Pita 3:3, 4.) Nọ ohwo nọ ma be ta usi uwoma kẹ, hayo ohwo nọ ma gbe bi ru iruo, hayo ohwo uwou mai jọ ọ tẹ ta ere, o sai nuhu ẹrọwọ mai. Rekọ Pita ọ ta ẹme jọ nọ ọ sai fiobọhọ kẹ omai.

5. Eme o lẹliẹ omai riẹ nọ akpọ na nọ Jihova ọ ta nọ ọ te raha no na, u ri kri ga hrọ họ? (2 Pita 3:8, 9)

⁵ Ahwo jọ a rẹ ta nọ, ‘U lehie hrọ, eme Jihova ọ gbẹ be hẹrẹ re ọ tẹ te raha akpọ na?’ Rekọ Pita ọ ta ẹme jọ nọ u dhesẹ nọ oghẹrẹ nọ mai ahwo-akpọ ma re rri oke, ere Jihova o re rri rie he. (Se 2 Pita 3:8, 9.) Ikpe odu ọvo ọ wọhọ ẹdẹ ọvo gheghe evaọ aro Jihova. Jihova o bi thihakọ kẹ omai keme ọ gwọlọ nọ a raha ohwo ọvo no ho. Rekọ nọ ẹdẹ nọ o fihọ na o te te, ọ te siọ akpọ na ba ẹraha ha. Fikiere joma rehọ omoke nọ u kiọkọ na wuhrẹ ahwo Ebaibol re a sae zọ.

6. Eware jọ vẹ ma rẹ hai roro kpahe nọ u re dhesẹ nọ ma ‘wo ẹdẹ Jihova họ iroro ẹsikpobi’? (2 Pita 3:11, 12)

⁶ Pita ọ ta nọ joma hai ‘roro kpahe ẹdẹ Jihova ẹsikpobi.’ (Se 2 Pita 3:11, 12.) Kọ eme onana u dhesẹ? O tẹ lọhọ, kẹdẹ kẹdẹ, joma hai roro kpahe eghale nọ i ti te omai evaọ akpọ ọkpokpọ na. Hae jọ iroro ra ruẹ oghẹrẹ nọ whọ te rọ wẹ emamọ ofou rehọ, re emamọ emu, dede ahwo ra nọ a kpare ze, je wuhrẹ ahwo oke anwae epanọ eruẹaruẹ Ebaibol i ro rugba. Nọ ma tẹ be hai roro kpahe eware nana, o te lẹliẹ omai rẹro ẹdẹ Jihova ẹsikpobi, jẹ kareghẹhọ nọ edẹ urere na ma rrọ na. Yọ o te lẹliẹ omai dikihẹ ga re ahwo nọ a bi wuhrẹ iwuhrẹ erue ‘a gbe su omai thọ họ.’—2 Pita 3:17.

SIỌ OZỌ AHWO BA ẸDHẸ

7. Eme ozọ ohwo-akpọ o sae lẹliẹ omai ru?

⁷ Ẹdẹ Jihova nọ ma be hai roro kpahe na o be lẹliẹ omai ta usi uwoma kẹ ahwo kẹse kẹse. Rekọ ẹsejọ nọ ma tẹ rrọ oria jọ, ozọ nọ ma rẹ rọ ta usi uwoma u re mu omai. Binikọ ere he? U wo oke jọ nọ ozọ ahwo u je mu Pita re. Evaọ aso nọ a rọ rehọ Jesu guẹdhọ na, Pita ọ sae ta kẹ ahwo inọ olele Jesu ọ rrọ họ. Ọ tubẹ vro Jesu isiasa soso. (Mat. 26:69-75) Rekọ uwhremu na, udu o jariẹ awọ. O kere nọ: “Wha dhozọ oware nọ a be dhozọ riẹ hẹ, wha ruawa gbe he.” (1 Pita 3:14) Oriruo riẹ o dhesẹ nọ otẹrọnọ ma jẹ dhozọ ahwo vẹre, ma rẹ sae siọ ozọ yena ba.

8. Eme o ti ru nọ ma gbẹ te rọ dhozọ ohwo-akpọ họ? (1 Pita 3:15)

⁸ Kọ eme o ti fiobọhọ kẹ omai siọ ozọ ahwo ba ẹdhẹ? Pita ọ ta nọ: “Wha jọ udu rai rọwo inọ Kristi họ Olori, ọ tẹ jẹ rrọ ọrẹri.” (Se 1 Pita 3:15.) Ẹme yena o dhesẹ nọ ma rẹ hai roro kpahe ogaga nọ Jesu o wo gbe ọkwa riẹ. Hae kareghẹhọ nọ ọye họ Olori gbe Ovie mai. Ozọ nọ whọ rẹ rọ ta usi uwoma kẹ ohwo o te bi mu owhẹ, kareghẹhọ Ovie mai na. Jọ o jọ wọhọ ẹsenọ whọ be ruẹ e riẹ nọ ọ keria agbara-uvie riẹ evaọ obọ odhiwu, yọ ikọ-odhiwu gbidi gbidi e wariẹ e riẹ họ. Kareghẹhọ nọ a kẹ riẹ “udu-esuo kpobi . . . evaọ odhiwu gbe otọakpọ” no, yọ ọ te jọ kugbe owhẹ “edẹ na kpobi rite oke urere uyero-akpọ na.” (Mat. 28:18-20) Pita ọ tẹ jẹ vuẹ omai nọ ma hae “ruẹrẹ oma kpahe ẹsikpobi” re ma ta usi uwoma. Kọ whọ gwọlọ nọ whọ rẹ ta usi uwoma evaọ obọ isukulu, obọ iruo, hayo eria efa? Roro kpahe ẹme nọ whọ te rọ ta usi uwoma gbe oke nọ uvẹ utioye na o sai ro te owhẹ obọ. Lẹ se Jihova re ọ kẹ owhẹ udu. Rẹroso ẹe inọ o ti fiobọhọ kẹ owhẹ siọ ozọ ahwo ba ẹdhẹ.—Iruẹru 4:29.

“WHA YOU OHWOHWO GAGA”

9. Eme Pita o ru ẹdẹ jọ nọ ohwo nọ o you amọfa o re ru hu? (Rri uwoho na re.)

⁹ Pita ọ riẹ nọ u fo re o you inievo na. Ọ jariẹ nọ Jesu ọ ta nọ: “Mẹ be kẹ owhai ujaje okpokpọ inọ wha you ohwohwo; nwane wọhọ epanọ me you owhai na, wha you ohwohwo re.” (Jọn 13:34) Rekọ oke jọ, fiki ozọ epanọ a ti rri rie, o gbe je lele Ileleikristi nọ e rrọ ahwo Ju hu re emu hu. Pọl ukọ na o se uruemu yena “ẹghẹ” hayo eviẹhọ. (Gal. 2:11-14) Nọ Pọl ọ whọku ei, ọ gaviezọ kẹe, jẹ siọ uruemu na ba. Evaọ ileta ivẹ nọ o kere na, o dhesẹ nọ u wuzou gaga re ma you inievo mai no obọ udu mai kpobi ze, je ru eware nọ u re dhesẹ nọ ma you rai.

10. Eme o te lẹliẹ omai wo “uyoyou-inievo nọ o kare eviẹhọ”? (1 Pita 1:22)

¹⁰ Pita ọ ta nọ joma “wo uyoyou-inievo nọ o kare eviẹhọ.” (Se 1 Pita 1:22.) Oware nọ u ti fiobọhọ kẹ omai wo uyoyou yena họ “ẹmeoyo kẹ uzẹme na.” Oware jọ nọ ma riẹ nọ uzẹme họ “Ọghẹnẹ o wo ọriẹwẹ hẹ.” (Iruẹru 10:34, 35) Fikiere, re ma sai you inievo mai wọhọ epanọ Jesu ọ ta na, orọnikọ ahwo jọ ọvo ma re you evaọ ukoko na ha. Nọ ma rrọ ukoko na, ma riẹ nọ ahwo jọ a rẹ kẹle omai vi ejọ. U wo ilele jọ nọ e mae kẹle Jesu evaọ oke ẹdẹ re. (Jọn 13:23; 20:2) Rekọ Pita ọ be kareghẹhọ omai nọ joma daoma gaga re ma wo “uyoyou-inievo.” Oghẹrẹ uyoyou yena o rẹ so ẹe ze nọ ma re ro lele inievo na kpobi yeri wọhọ ẹsenọ a rrọ inievo eva mai.—1 Pita 2:17.

11. Eme o re dhesẹ nọ ma “you ohwohwo gaga no udu ze”?

¹¹ Pita ọ ta nọ joma “you ohwohwo gaga no udu ze.” Evaọ ẹme Pita nana, re ma “you ohwohwo gaga” u dhesẹ nọ o gbẹ make lọhọ kẹ omai re ma you oniọvo jọ họ, ma rẹ daoma re ma you rie ghele. Nọ oniọvo jọ evaọ ukoko na o te ru omai oware nọ o da omai gaga, eme ma re ru? Ẹsejọhọ oware nọ udu mai o te kake vuẹ omai họ joma ru ei kele. Rekọ Jesu o wuhrẹ Pita nọ uruemu yena o rẹ dha Ọghẹnẹ eva. (Jọn 18:10, 11) Oye o soriẹ nọ Pita o ro kere nọ: “Wha rehọ eyoma hwosa eyoma ha hayo rọ ekela hwosa ekela ha. Ukpoye, wha rehọ emamọ ẹme hwa zihe.” (1 Pita 3:9) Nọ who te you inievo ra no udu ze, ọjọ ọ tẹ maki ru owhẹ thọ, whọ te daoma rọvrẹ riẹ je lele iei riẹ yeri ziezi.

12. (a) Nọ ma te you inievo mai gaga, eme o te lẹliẹ omai ru? (b) Eme whọ jọ ividio Sẹro Okugbe nọ O Rrọ Udevie Mai na wuhrẹ nọ whọ gwọlọ nọ whọ rẹ hai ru?

¹² Evaọ ileta ọsosuọ nọ Pita o kere, ọ ta nọ joma “wo uyoyou ogaga kẹ ohwohwo.” Uyoyou utioye na “u re ruru izieraha buobu” orọnikọ imizieraha jọ ọvo ho. (1 Pita 4:8) Ẹsejọhọ Pita ọ kareghẹhọ oware nọ Jesu o wuhrẹ i riẹ kpahe erọvrẹ ikpe buobu nọ i kpemu. Oke ọsosuọ, Pita o je roro nọ ọ tẹ sae rọvrẹ ohwo “te isiahrẹ” yọ ọ daoma kpe no. Jesu ọ tẹ ta kẹe nọ: “U re te isia udhosa gbe ikpegbihrẹ.” Ẹme yena o dhesẹ nọ ẹsikpobi nọ ohwo o te ru omai thọ joma rọvrẹ riẹ. Erọvrẹ o wo unuẹse he. (Mat. 18:21, 22) Otẹrọnọ ẹsejọ o rẹ bẹ owhẹ re who ru ere, jọ o kẹ owhẹ uye he. Mai kpobi na, ohwo ọvo nọ ọ gba ọ riẹ hẹ. O rẹ dina bẹ omai ẹsejọ re ma rọvrẹ ohwo. O make rrọ ere na, daoma ru oware kpobi nọ u fo nọ who re ru re whọ sae rọvrẹ oniọvo ra je ku ẹwhọ nọ wha wo na họ.c

WHAI EKPAKO, WHA RẸROTE UTHURU NA

13. Fikieme ekpako na a gbe ro wo uvẹ tuduhọ inievo na awọ ẹsejọ họ?

¹³ Nọ a kpare Jesu ze no, ọ tẹ ta kẹ Pita nọ: “Sẹro igodẹ esese mẹ.” (Jọn 21:16) Ẹme yena ọ thọrọ Pita ẹro ho. Otẹrọnọ whẹ ọkpako ukoko, whọ riẹ nọ ẹme yena o te owhẹ re. Ma riẹ nọ o lọhọ kẹ owhai ekpako na ha, keme iruo e vọ otọ kẹ owhai. Wha rẹ kake rẹrote ahwo uwou rai, lele ai gbiku jẹ zaro re eva e sae were ae. Wha ve je fiobọhọ kẹ ae re a sai kruga. Wha rẹ wha inievo na kpohọ usi uwoma. Yọ wha rẹ ruẹrẹ oma kpahe kẹ eme nọ wha ti ru evaọ ewuhrẹ gbe ikokohọ esese gbe ilogbo. Whai ejọ wha rrọ Egbẹgwae Ẹmeọta-Kugbe Ahwo Iwou-Imu. Efa a be hai fiobọhọ kẹ inievo nọ e rrọ obọ uwou ogha nya onya epanọ a rẹ rọ bọ Egwa Uvie gbe iwou efa, jẹ rẹrote ai. Ekpako a gine wo uvẹ hẹ!

14. Eme o ti fiobọhọ kẹ ekpako na re a hae tuduhọ inievo na awọ? (1 Pita 5:1-4)

¹⁴ Pita ọ jọ ọkpako ukoko, yọ o kere se ekpako ukoko nọ: “Wha sẹro uthuru Ọghẹnẹ.” (Se 1 Pita 5:1-4.) Otẹrọnọ whẹ yọ ọkpako ukoko, ma riẹ nọ who you inievo na, yọ whọ gwọlọ tuduhọ ae awọ. Rekọ ẹsejọ whọ sai roro nọ who wo uvẹ tere he nọ whọ te hae rọ tuduhọ inievo na awọ. Yọ ẹsejọ oma o rẹ rrọ owhẹ no. Kọ eme who ti ru? Lẹ se Jihova re whọ vuẹe oghẹrẹ nọ eware e rrọ kẹ owhẹ. Pita o kere nọ: “Otẹrọnọ ohwo jọ ọ be gbodibo, jọ ọ rẹroso ẹgba nọ Ọghẹnẹ ọ rẹ kẹ.” (1 Pita 4:11) Ebẹbẹ buobu nọ i bi te inievo mai nẹnẹ na Uvie Ọghẹnẹ ọvo u ti ku ae họ. Rekọ riẹ nọ Jesu “othuru-igodẹ ologbo na” o wo ẹgba nọ ọ sai ro fiobọhọ kẹ ae vi epanọ whọ hai fiobọhọ kẹ ae te. Ọ sai fiobọhọ kẹ ae enẹna, yọ ọ te rẹrote ae gaga evaọ akpọ ọkpokpọ na. Oware nọ Ọghẹnẹ ọ gwọlọ nọ whai ekpako na wha ru ọvo họ, wha you inievo rai, wha hae tuduhọ ae awọ, wha vẹ jẹ “jọ oriruo kẹ uthuru na.”

15. Eme ọkpako ukoko jọ o ru ro fiobọhọ kẹ inievo ukoko na? (Rri uwoho na re.)

¹⁵ Oniọvo jọ nọ a re se William nọ ọ rrọ ọkpako ukoko kri no ọ riẹ nọ u wuzou gaga re a hae tuduhọ inievo na awọ. Fikiere nọ ẹyao COVID-19 na o je vo gaga, ọye avọ ekpako efa a te mu oware jọ họ eru. A jẹ hai se oniọvo kpobi nọ ọ rrọ utu usi uwoma ota rai koka koka. Oniọvo na ọ ta oware nọ o jẹ lẹliẹ ae ru ere na. Ọ ta nọ: “Inievo na buobu, ae ọvo a mu unu họ uwou. Fikiere a sae jọ ọkọkora, a ve mu ekpehre iroro họ eroro.” Nọ oniọvo jọ ọ tẹ be vuẹ Brọda William oware nọ o be kẹe uye, ọ rẹ romatotọ gaviezọ kẹe re ọ riẹ epanọ eware e rrọ kẹe. O je ru no, ọ vẹ gwọlọ ividio hayo uzoẹme jọ evaọ oria itanẹte mai nọ ọ sae rọ tuduhọ iẹe awọ. Ọ ta nọ: “Enẹna o mae roja re ma hae kọ họ inievo mai jẹ tuduhọ ae awọ. Re ma wuhrẹ ohwo te epanọ ọ sai ro kurẹriẹ ziọ ukoko na, ọmọziọ iruo ho. Fikiere inievo nọ e rrọ ukoko na no na, ma rẹ daoma fiobọhọ kẹ ae re a gbe no ukoko na ha.”

JIHOVA O TI WUHRẸ OWHẸ TOTỌ

16. Eware jọ vẹ ma re ru nọ u re dhesẹ nọ ma bi ru eware nọ ma wuhrẹ evaọ ileta ivẹ Pita na?

¹⁶ Evaọ ileta ivẹ nọ Ọghẹnẹ ọ rọ Pita kere na, ma jarai wuhrẹ eware jọ nọ i re fiobọhọ kẹ omai no. Ẹsejọhọ who muẹrohọ oware jọ nọ whọ be hai ru te he nọ whọ te hae daoma ru ziezi no. O sae jọ nọ whọ ruẹ nọ whọ be hai roro kpahe akpọ ọkpokpọ na tere he. Hayo who muẹrohọ nọ u fo nọ whọ rẹ gbẹ daoma re whọ hae ta usi uwoma evaọ obọ isukulu, evaọ oria nọ who bi jo ru iruo, hayo nọ who te kpohọ ore. O sae jẹ jọ nọ whọ ruẹ nọ eware efa e gbẹ riẹ nọ who re ru nọ i re dhesẹ nọ who gine you inievo na gaga. Otẹrọnọ whẹ yọ ọkpako ukoko, kọ whọ gwọlọ nọ no umuo enẹna vrẹ, whọ te hae daoma tuduhọ inievo na awọ ziezi? Who te roro ziezi, ẹsejọhọ whọ te ruẹ oware jọ nọ whọ be riẹ ru tere he. Rekọ jọ o kẹ owhẹ uye ga hrọ họ. “Olori na ọ rrọ wowou,” yọ o ti fiobọhọ kẹ owhẹ. (1 Pita 2:3) Pita ukọ na ọ vuẹ omai nọ: “Ọghẹnẹ . . . o ti wuhrẹ owhai totọ. O ti ru owhai ga, o ti ru owhai dikihẹ ga, o ti ru owhai dowọ muotọ ziezi.”—1 Pita 5:10.

17. Ma tẹ gbẹ be gọ Jihova vrẹ jẹ rọwo nọ o wuhrẹ omai, oghale vẹ o ti te omai?

¹⁷ Oke jọ o jariẹ nọ Pita o je ro roro nọ o te ohwo nọ ọ rẹ jọ akotọ Jesu hu. (Luk 5:8) Rekọ Jihova avọ Jesu a you rie, yọ a fiobọhọ kẹe gaga. O tẹ so ẹe ze nọ Pita ọ rọ talamu Jesu dede nọ eware jọ e thọ riẹ obọ. A kẹ Pita uvẹ nọ ọ “rọ ruọ Uvie ebẹdẹ bẹdẹ Olori gbe Osiwi mai, Jesu Kristi.” (2 Pita 1:11) Kọ oghale o rẹ gbẹ rro viere? Whọ tẹ be gbẹ gọ Jihova vrẹ wọhọ epanọ Pita o ru na, whọ jẹ rọwo nọ Jihova o wuhrẹ owhẹ, Jihova ọ te ghale owhẹ. Whọ te rria bẹdẹ bẹdẹ. Who ti “wo utee ẹrọwọ [ra] na tobọ, koyehọ esiwo [ra].”—1 Pita 1:9.